تقييم للسيارة اسبيرنزا بوجة عام والسيارة التيجو 2000 سى.سى اتوماتيك 2x4
تقييم للسيارة اسبيرنزا بوجة عام والسيارة التيجو 2000 سى.سى اتوماتيك 2x4
السلام عليكم ورحمة اللة وبركاتة
اولاً/ كل سنة واعضاء المنتدى الافاضل بخير وسلام، ويارب يكون عام 2010 افضل من عام2009، والى ظهر عندة مشاكل فى الاسبيرنزا عام2009 متظهرش عام 2010 ان شاء اللة،،،،امييييييييييييييي يييييييييييين.
ثانياً/بخصوص السيارة الاسبيرنزا فخلونا نعمل بالمثل البيقول((اسأل مجرب ومتسألش طبيب)) - خصوصاً انى ملاحظ كثرة الكلام سواء من ناس ركبتها اومن ناس مجرد شافتها او سمعت عنها وبنت حكمها على هذا الاساس، وناس تانية مجرد ما ظهر مشكلة بسيطة او كبيرة حكمت على كل العربيات بالفشل، علماً بان المشاكل ممكن تلاقيها فى كل انواع العربيات(وهى برضة على الزيرو) سواء اوربية او اسيوية او حتى امريكية – واخرها المشكلة فى محرك سيارة اسكودا استوجب تغيرالسيارة عند 2600كم (ما نشر بالجرايد الاسبوع الماضى)، ولاكن احنا لما بنسمع حاجة بسيطة فى الصينى بنقول طبعاً مهو صينى ، لاكن لو سمعنا حاجة كبيرة فى عربية تانية بنقول عادى.
وعشان كدة اسمحولى انقل ليكم ملاحظاتى عن الاسبيرنزا بصورة عامة والتيحو بصورة خاصة، ودة بعد 3 سنوات تجربة ، مع 3 سيارات اسبيرنزا ، حيث انى غيرت خلال الفترة دة (516 +620+ تيجو).
أولاً/ تجربتى مع الاسبيرنزا بشكل عام اقدرالخصها فيما يلى:
- السيارة الاسبيرنزا سيارة بدرجة جيد مرتفع وليس امتياز.
- اغلب مشاكل السيارة-ان وجدت - ترجع الى التقفيل المحلى وليس مشاكل فنية.
- الاهتمام بالسيارة والخدمة يتحسن من جانب الوكيل بشكل كبير يوم بعد يوم، ولكن المشكلة فى الناس - على طول معترضة.
- السيارة متينة جداً وثابتة جداً ودرجة الامان فيها عالية جداً،والمشكلة فيها لو جدت بتكون محصورة بشكل كبير فى العفشة،بتتفكك بسرعة شوية – وبعض المشاكل الاخرى الى ى الغالب بتكون مقبولة.
- نقدر تقول ان السيارات اليابانية او الكورية اكثر جودة- ولاكن موش بدرجة فرق السعر العالى(مثلاً الفيترا المعادلة للتيجو وبنفس الموصفات تقترب من200 الف جم - وهى احسن من التيجو، بس موش بدرجة فرق يصل الى ضعف السعر).
- يعنى انتى راكب سيارة بمواصفات وامكانيات اكثر من السعر المدفوع فيها تحت اى مسمى – ودة الخلانى بغير بنفس النوع (مناسب جداً لامكانياتى وموش ممكن يتناسب فى اى عربية تانية).
- اعادة البيع ليها وعن تجربة جيدة جداً.
- معظم الناس العيبت فيها اصلاً لم تركبها - واعترضت عليها من باب الاعتراض وبس.
ثانياً/تقييم للسيارة اسبيرنزا تيجو 2000 سى.سى اتوماتيك 2x4 عن فترة استخدام 12 شهر:
مع ملاحظة الاتى:
- المشاكل التى ظهرت بالسيارة ، ليس شرط انها ظهرت بكل السيارات المسلمة.
- سيارتى تعتبر من الدفعة الاولى وبالتالى هناك احتمال معالجة اى مشاكل ظهرت فى الدفعات اللاحقة.
بيانات عن السيارة:
- استلام السيارة وبدء الاستخدام : 1/1/2009
- فترة الاستحدام : 12 شهر
- الكيلو متر المستهلك :11000كم
- متوسط استهلاك البنزين : داخل المدينة 20لتر/150كم
طريق سفر 20لتر/200كم متوسط سرعة100كم/ساعة
- عدد المستخدمين للسيارة : 2
- عدد السفريات : 4 سفريات (اسكندرية/الساحل/العين السخنة/الفيوم)
العيوب:
- تقفيل الابواب سيىء شوية ، حيث تسمع صوت شخشخة عند القفل والفتح والزجاج نازل – خصوصاً فى الابواب الامامية،وباب الشنطة( يمكن يكون عشان الاستبن راكب علية) وهناك تقل شوية فى التعامل مع الابواب الخلفية.
- عفشة السيارة بتحتاج تربيط كل فترة – ودى يكفيها صيانة ال5000كم.
- ظهرت رنة فى الشكمان – نتيجة الساجة البتمنع سخونة الشكمان من التاثيرعلى جسم السيارة، وتم معالجتها فى مركز الخدمة.
- التعامل مع الفتيس الاتوماتيك قد يبدو سيىء فى الاول من حيث استجابة السيارة للسحب لو عاوز تزود السرعة (كويك دون) لتفادى سيارة او ما شبة ذلك - ولاكن بعد السؤال والشرح اتضح ان الفتيس الاستبترونيك الراكب فى السيارة يعتبر من احدث النظم المستخدمة فى السيارات – لانة فتيس كهربائى وتغير السرعة المفاجئة(كويك دون) فية يعتمد على حساسات كهربائية وليس بنظام الكبل المستخددم فى الفتيس الاوتوماتيك التقليدى – ويتم استعاضة هذا الامر بوجود الفتيس اليدوى ، فيمكن النقل للفتيس اليدوى فى حالة عدم الاستجابة السريعة (هذا نقلاً عن مهندسين فى مركز الخدمة واللة اعلم)- وعلى كل حال الفتيس مريحنى جداً وجربتة اوتوماتيك ويدوى ومعملش معايا اى مشاكل.
المزايا:
- حجم و ابعاد السيارة ومقاس الكاوتش المستخدم وارتفاعها عن الارض فوق الممتاز – وفعلاً بيسهل سوقتها جداً والتحكم فيها عالى وهى سيارة ثابتة ووزنها تقيل والبدى بتاعها قوى ، وفراملها ووسائل الامان فيها بشكل عام جيدة جداً.
- طبعاً حجم السيارة مع المحرك 2000 سى سى ، مخلى عزمها عالى.
- السيارة سريعة وثابتة فى السرعات العالية (جربتها لغاية 170كم ودة موش اخر سرعة ليها).
- ادوات وادراج التخزين فى السيارة كتيرة ومفيدة، وحجم الشنطة بيشيل كتير، خصوصاً مع وجود امكانية تقديم الكراسى الخلفية وطى احداها او كلاهما (فادتنى جداً فى السفر شالت خمس افراد وشنطهم، وشنط 2 فى عربية كانت مسافرة معانا ودة بعد ماشلت الشماسة الخلفية) دة طبعاً غير امكانية استخدام عوارض السقف.
- التكييف كافى جداً، ومفيش مشاكل سخونة علماً بانى سافرت بيها بدون توقف.
- كماليات العربية كاملة، والنظام الصوتى فيها عالى جداً وممكن تركب علية شاشات L.C.D – (انا ركبت مخدعين بالشاشات والريموت كنترول عند الوكيل بتاع الكاسيت بشارع احمد عرابى ودة كلفنى 975جم – واستغرق التركيب حوالى30دقيقة وبضمان سنة).
تقديرى الشخصى العام:
- سيارة بدرجة جيد مرتفع.
- عيوبها محددة وموش قاتلة – وممكن تلاقى عيوب زيها او اكتر فى عربيات تانية أسيوى او أوربى.
- سعرها هايل بالنسبة لمثيلتها – واعتقد انها متقلش كتير عن التريوس او الفيترا – يمكن يكون الفرق فى الصالون الداخلى (التيجو فقيرة شوية من جوة)- لاكن شكلها الخارجى اعتقد انة اجمل من التريوس – وقريب جداً للفيترا. (((على فكرة التيجو هى النسخة الصينية للتويوتا راف بما فى ذلك التابلوة – والمقدمة مستوحاة من الهوندا الSUV)) بس موديلات 2005نقريباً ،وعلى فكرة برضة التويوتا الراف الجديدة سعرها حوالى 500 الف جم ---- اى خدمة.
- مراكز الخدمة جيدة وبتتحسن جداً يوم بعد يوم – والحقيقة اى حاجة كانت فى العربية عملوها بدون اى اعتراض او كلام.
وفى النهاية دة تجربتى ورأى الشخصى فى التيجو الممكن يتعارض مع حد تانى ممكن يكون ماقبلتوش المشاكل القابلتها او يختلف معايا فى المزايا والعيوب – ارجو ان تقريرى دة يكون مفيد اكتر من ضررة وشكراً،،،،،،،،
وانا تحت امر احد واحد يحب يسأل عن حاجة .
===================================
