منين اتأكد ان العربية عالزيرو فعلا؟؟!!

بشتري عربية بالتقسيط و بصراحة اتدبست فمعرض عربيات اي كلام ..حظي بأة اعمل ايه
المهم حاسة كدة انهم ناس نصابين عمالين بيأجلوا الترخيص بتاع العربية كل شوية بحجة ،، و كلها حجج واهية مش مقنعة.
المهم بدأت احس ان فيه حاجة غلط و ان الناس دي بيهرجوا و شغلهم مش مظبوط.
عدم ثقتي فيهم خلاني اشك حتى فإن العربية ممكن تكون فيها حاجة غلط.
قولولي اعمل ايه و اتأكد ازاي انها عالزيرو فعلا...ماحدش يقول لي اجيب ميكانيكي عشان انا ماعرفش حد...انا حتى ناوية لما تعطل اوديها التوكيل على طول مش عايزة استعمل اختراع الميكانيكي دة خاااااالص

لو حا سة ان فى مشكلة ابعدى عن المعرض ده لأن فى ناس محترفين فى النصب

لو مش هاتقدري تخلصي من المعرض...يبقي تاخدي معاكي واحد بيفهم في العربيات ومش لازم يكون ميكانيكي....هو المفروض يفحص الآتي:

1-حالة جسم العربية كلة ودهانها من برة....ملاحظة اي اختلافات في الطلاء
2-هايفحص برضة صدر العربية وحالة ونضافة الموتور وباقي مكونات العربية
3-فحص دقيق لكاوتش السيارة طبعا المفروض انها زيرو يعني بالكتير عاملة 50 كم مش اكتر
وان كان في بعض المعارض بيمشي العربية اكتر من كدة وبيفصل عداد المسافة بس بيبان من
حالة الكاوتش وخصوصا بصمة الكاوتش
4- حالة الصالون من الداخل...نضافتة..وجود اي علامات علي دواسات البنزين والفرامل والدبرياج ان وجد (لو كانت اوتوماتيك مافيهاش دواسة دبرياج طبعا) وطبعا بيكون في اكياس علي اكراسي والكنب بس برضة يشيلهم ويشوف اي آثار استخدام...
5- صوت ابواب العربية ...المفروض انها لسة بتزيقة الزيرو....
6-حالة عصا الفتيس...والجلد ايلي عليها...لو فيها اي علامات تدل علي الاستخدام الكتير..زي مثلا درجة الوانها مش متناسقة نتيجة العرق والتراب من الاستخدام
7-ودي اخر شيء وهو عداد المسافات المقطوعه...ودة مش مقياس قوي لان اغلب المعارض بيفصلة ويعيد تركيبة قبل بيع السيارة...

وعموما العربية بتبان علي طول....بس لو حسة ان التأخير غير مبرر...خلي بالك من الشاسية اكتر....لان كان في زميل في المنتدي حاجز فيرنا من التوكيل وحاولو يسلموة عربية مخبوطة ورشة الرفرف...

وربنا معاكي ويكفيكي شر....النصابين..

انتو ناسيين ان العربيه المستعمله بتكون علقت نمر

و الزيرو بيكون معاه جواب المرور.......ولا دى فيها لعب دى كمان

صعب ابعد عن المعرض يا اخ احمد لأن البنك طرف تالت في الموضوع و انا مضيت الشيكات خلاص و دافعة كمان مبلغ جدية تعاقد حيروح علية لو الرجوع في الاتفاق كان مني

انا مش عارفة اشكر الاخ هيرو ازاي الحقيقة على رده المفصل الف شكر ليك و ربنا يكفيك انت كمان كل الشرور يا رب و النقط اللي انت قلتها مهمة فعلا و انا لما رحت اتفرج عالعربية كان بالليل فماعرفتش اشوف حاجة...بكرة الاستلام و حتأكد من كل الحاجات دي بإذن الله

الاستاذ ابو شريف...الحقيقة ان العربية بتترخص زيرو و المفروض اني كمان ححضر الترخيص و مع ذلك بيخموا انا مش عارفة ازاي.

على فكرة هي العربية ماروتي 800 تفتكروا مستاهلة انهم ينصبوا فيها؟

في مصر ربنا يستر علينا

ايه هي بصمة الكاوتش؟؟ اللي هي النقش يعني ؟

اولا ...العملية مش محتاجة لشكر ولا حاجة ....احنا هنا كلنا اخوات ....وبنحاول نساعد بعض علي قدر المستطاع....وزي ما قولتلك خدي برضة حد تاني معاكي.....لما يكون اتنين بيفحصوا احسن من واحد...

تمام بالظبط.....هي النقش ايلي في الكاوتش...

بجانب ان الكاوتش الزيرو....بيكون فية زوائد مطاطية رفيعه قوي...علي حواف الكاوتش نفسة...ودي بتروح خالص مع اول 200 او 300 كيلو....

وربنا يستر..وما تخافيش ...بس برضة الحرص في مصر شيء اساسي....

وبالتوفيق...

يا ريت لو حضرتك تقولى على أسم المعرض دة علشان كل الأخوة هنا ممكن حد منهم يشترى منهم ولا حاجه خصوصا الأسكندارنيه زى حضرتك

أعتقد أن الموضوع مش نصب

أعتقد أنهم يا إما الورق بتاع العربية مش جاهز ودي بتحصل كتير يعني لسة ما سددوش الفلوس عشان يجي الأفراج الضريبي وترخصي العربية

ودا بيقى ساعات عطل من التوكيل نفسة

أو بيبقى المعرض صرف الفلوس إلي أديتهولوا ولسة مسددش الفلوس عشان الأفراج يجي

الاخ هيرو ... بص يا مان .. انا تاجر قطع غيار سيارات مستعمله علي فكره .. و مش هاقولك اكنر من ان كل اللي انت قلته ده انا ممكن اعملهولك في عربيه موديل 70 ...
ابو شريف بقي بيتكلم صح .. الزيرو زيرو .. اي عربيه زيرو بيبقي الورق بتاعه نظام الافراج الجمركي او جواب المصنع .. عشان تتاكدي ان العربيه زيرو هاتستني لحد ما تصرفي النمرتين و تطلعي علي الشباك تكلمي الموظف .. "تفقعيه" البريزه و تقوليله يشوف لو فيه مالك سابق للعربيه ولا لاء.. الورق مافهوش لعب (هوه فيه برضه .. بس صعبه يعني مش اي حد يعمله غير المحترفين نصب فقط)
الاخت بيري .. بجد .. النصب بقي حتي في الشرابات .. النصب موجود في كل حاجه دلوقتي ..
جالاكسي مان بيتكلم صح برضه .. الافراج بياخد وقت .. الوقت بيبقي بالكتير 30 يوم .. في خلال ال 30 يوم بيتعلق نمر تجاريه ..

"لاخ هيرو ... بص يا مان .. انا تاجر قطع غيار سيارات مستعمله علي فكره .. و مش هاقولك اكنر من ان كل اللي انت قلته ده انا ممكن اعملهولك في عربيه موديل 70 ..."

اولا: احنا بنتكلم علي ان العربية ما تمش ترخيصها قبل كدة...ودة بيبان من الورق بتاعها...انا هنا باتكلم عن عربية زيرو لم يتم ترخيصها....بس ممكن تكون بتجري في الشوارع ياما من غير نمر...او بنمر تجاري...

ثانيا: لو العربية ايلي موديل 70 ايلي بتتكلم عليها هاتبقي فابريقة من جوة...يعني كل سيورها وتروسها جديدة ونضيفة ولا ملطخة زيت ولا مهببة....ولا في طين وتراب علي الطنابير...ولا كل ايلي الكلام ايلي عارفة...تبقي فعلا زيرو....لكن الكلام دة نظري بس.....
يعني مافيش واحد هايروح يجيب عربية ماشية حتي لو 1000 كيلو....ويروح يغسل كل سم فيها ...وحتي لو عمل كدة برضة بيبان ان العربية ماشية وجرت علي الارض ....

وبما ان حضرتك تاجر قطع غيار سيارات....يبقي اكيد عارف ان في ناس شغلتها انها تفرز سيارات....وزي ما في نصابين في كتير قوي مفتحين....:)

متهو ده اللي باقوله يا اخ هيرو .. العمليه مش بالمظاهر .. الهمليه هنا بالرسميات .. و الرسميات هنا هيا الورق.. يبقي زي ما بيقولو .. الرك علي الورق ;) .. و بكلمك بكل صدق .. بتلاقي عربيات موديل قديم .. تشوفها من بره تقول عليها زيرو .. زيرو .. صدقني .. . و بتبقي نظام .. من بره هالله هالله و من جوه يعلم الله ..و فيه كمان عربيات الناس محافظه عليها و احسن من الزيرو ماتضربش فيها مفك !! (شفت انا بقي فولفو 240 استشن موديل 85 فعلاً بحاله الزيرو و توهم !! ) و يا باشا المصريين احترفوا فن النصب .. و مش هاقولك غير .. يبقي انتي اكيد في مصر ..
القصد من الكلام .. العربيه مش هاتعرفها من فتحه ابوابها ولا الكلام ده .. اكنر من الورق اللي قدامك و "ريحه" الزيرو .. و ضمير التاجر بقي مفيش في ايدينا حاجه نعملها .. فكل اللي نقدر نعمله .. لما ورقها يجي المرور .. نشوف فيه حد اتملك العربيه قبلنا ولا لاء ..

يا جماعة الف شكر ليكم كلكم على اهتمامكم و ردودكم القيمة
الموضوع تم بنجاح الحمد لله و رحت النهاردة و رخصت و اخذت نمر و فحصت العربية كويس لأني حتى ماكنتش بصيبت عالشاسيه و لا فتحت الكابوت من اصله و لو ماكانش "هيرو" قاللي ماكنتش بصيت برضه...باين طبعا انها جديدة و الحمد لله مافيهاش غلطة و لا اي حاجة تدل على ان حد استعملها.
هما بس كانوا سخفا اوي و بيماطلوا جامد لدرجة اني شكيت انهم نصابين.
مش حقول بأة اسمهم بما ان الموضوع تم على خير من غير مشاكل (لحد دلوقت)

بيقولولي ان الضمان عالعربيات الجديدة كله بأة ضمان 1000مش 5000 كم زي الاول...صحيح الكلام دة وللا دي نصباية برضه؟ :)

الف كيلو بس؟؟ دا الواحد يعملهم فى اسبوعين

زمان كان اقل واجب فى الضمان بيبقى سنة و 20 الف و ساعتها دايو كانت الوحيدة اللى ضمانها سنتين و 40 الف و بعد كدة بقى 3 سنوات و 60 الف... اكيد الف دى قصة مش صحيحة بالمرة لان اساسا بعد اول الف بيبقى فيه صيانة مجانية بيتراجع فيها على العربية... يعنى معنى كدة لما يخلصوا مراجعة تبقى علاقتهم بالعربية انتهت...

مش مقتنع بالكلام دة خالص و لو دة فعلا حقيقى يبقى الناس دى بتهرج

MMamdouh

أولاً 1000 مبروك على العربية الجديدة
وربنا يديكى خيرها ويكفيكى شرها

بالنسبة لموضوع الضمان ، زى ما مكتوب فى الضمان لسيارات سوزوكى كلها
أنها لمدة 36 شهر أو 60000 كم أيهما أسبق ( وبالمناسبة أستلمت الضمان من المعرض ولا لسه ؟)

ثانياً : خلى بالك من موضوع تليين العربية الزيرو ، يعنى تمشى واحدة واحدة
الغيار الأول لايتعدى 15 كم ، الثانى لايتعدى 35 كم ، الثالث لايتعدى 50 كم ، الرابع لايتعدى 80 كم
والتليين لغاية لما توصلى الـــ 1000 كم

ثالثاً: هل أستلمت كتيب الصيانة مع العربية ؟ والفرش الموكيت فى الدواسات والعدة زى الكوريك وطقم مفاتيح ومفكات ولا لأ ؟

بالمناسبة أنا برضه معايا ماروتى 2007 ، وعملت صيانة ال 1000 كم فى التوكيل بالدقى ، وبصراحة ناس ممتازين فى شغلهم وتعاملهم ، ولكن كنت أعتقد أن الصيانة للــ 1000 كم كلها مجانية يعنى مش هادفع ولا مليم ، ولكن دفعت 121 ج نظير تغيير 3 لتر زيت ( هل الماروتى بتاخد 3 لترفعلاً ؟ ) بــ 75 ج + تغيير فلتر بــ 35 ج + 10% ضريبة مبيعات = 121 ج على الصبح

أخيراً ربنا يباركلك فيها ويكفيكى شر الطريق والسواقين المصريين الهمج

الف مبروك علي العربية...وربنا يديكي خيرها ويعافيكي من شرها...
وعلي مهلك في شوارع المحروسة.....

بالتوفيق...

فى معرض اسمه الكرنك فى اسكندريه ناس محترمه جدااا انا اشتريت عربيتى الانوس
ناس تثق فعلا فى كلمتهم انا استلمت ورخصت تانى يوم
لو اى حد عاوز انا فى خدمته وشكراا لاعضاء المنتدى الرائع الى كتير اوى
استفدت منه

اقتباس:

---

المشاركة الأصلية كتبت بواسطة Xpert

متهو ده اللي باقوله يا اخ هيرو .. العمليه مش بالمظاهر .. الهمليه هنا بالرسميات .. و الرسميات هنا هيا الورق.. يبقي زي ما بيقولو .. الرك علي الورق ;) .. و بكلمك بكل صدق .. بتلاقي عربيات موديل قديم .. تشوفها من بره تقول عليها زيرو .. زيرو .. صدقني .. . و بتبقي نظام .. من بره هالله هالله و من جوه يعلم الله ..و فيه كمان عربيات الناس محافظه عليها و احسن من الزيرو ماتضربش فيها مفك !! (شفت انا بقي فولفو 240 استشن موديل 85 فعلاً بحاله الزيرو و توهم !! ) و يا باشا المصريين احترفوا فن النصب .. و مش هاقولك غير .. يبقي انتي اكيد في مصر ..
القصد من الكلام .. العربيه مش هاتعرفها من فتحه ابوابها ولا الكلام ده .. اكنر من الورق اللي قدامك و "ريحه" الزيرو .. و ضمير التاجر بقي مفيش في ايدينا حاجه نعملها .. فكل اللي نقدر نعمله .. لما ورقها يجي المرور .. نشوف فيه حد اتملك العربيه قبلنا ولا لاء ..

---

مش حرام عليك تغلط فى كل المصرين ؟؟؟ هو انت من اين بالظبط ؟؟

نيااااااهاها .. انا مصري و ابويا مصري .. و شغلتي محترف نصب
بص يا مان .. انا اتعاملت كتير مع الشعب المصري .. انا كنت شغال تاجر قطع غيار .. و تقدر تقول ماسدتش مع النصب المصري في السوق كتير .. و بعد 5 سنين قفلت و انا عليا ضرايب ....
الموقع .. بني سويف ... الجنسيه : مصري .. جنسيات اخري : سويسري ...
النشاط : عاطل عن العمل مؤقتاً ... و طالب في كليه التجاره اخر سنه ..
اي خدمه
:d

يا كابتن خالد انت معاك ماروتي يا اهلا و سهلا
انا استلمت كل الحاجات اللي انت قلت عليها بس لسة ما استلمتش الضمان..برضه مافهمتش منك هي عربيتك ضمانها قد ايه؟
هو انا بعرف منين انا قطعت كام كيلو؟؟ العداد اللي عندي عامل اكتر من الف..اكون عديتهم و انا مش حاسة تبقى مصيبة.
ربنا يبارك فيكو كلكو...بس بجد السواقة شيء اغبى من اللي كنت متخيلاه مليون مرة...الناس كلها ماشية بدماغها و عشان تروح بيتك سليم و عربيتك سليمة لازم تتوقع دماغ كل واحد فيها ايه و انت سايق!
شكرا لاهتمامكم جميعا

اقتباس:

---

المشاركة الأصلية كتبت بواسطة perri

بس بجد السواقة شيء اغبى من اللي كنت متخيلاه مليون مرة...الناس كلها ماشية بدماغها و عشان تروح بيتك سليم و عربيتك سليمة لازم تتوقع دماغ كل واحد فيها ايه و انت سايق!

---

Welcome to Egypt

MMamdouh

اقتباس:

---

المشاركة الأصلية كتبت بواسطة perri

يا كابتن خالد انت معاك ماروتي يا اهلا و سهلا
انا استلمت كل الحاجات اللي انت قلت عليها بس لسة ما استلمتش الضمان..برضه مافهمتش منك هي عربيتك ضمانها قد ايه؟
هو انا بعرف منين انا قطعت كام كيلو؟؟ العداد اللي عندي عامل اكتر من الف..اكون عديتهم و انا مش حاسة تبقى مصيبة.
ربنا يبارك فيكو كلكو...بس بجد السواقة شيء اغبى من اللي كنت متخيلاه مليون مرة...الناس كلها ماشية بدماغها و عشان تروح بيتك سليم و عربيتك سليمة لازم تتوقع دماغ كل واحد فيها ايه و انت سايق!
شكرا لاهتمامكم جميعا

---

بتستلمى الضمان من معرض البيع
العربية بتاعتى ضمانها 3 سنوات أو 60 ألف كيلومتر أيهما أسبق
يعنى لو أنا قطعت الــ 60 ألف كم فى سنتين يبقى خلاص الضمان خلص وتبقى مدته سنتين بس ، والعكس لو عدى على 3 سنين الأول ولسه ماكملتيش الــ 60 ألف كم يبقى مدة الضمان 3 سنين
يعنى بأختصار أقصى مدة للضمان هية 3 سنين أو أقل فى حالة وصولك للــ 60 ألف كم بدرى ! ناس ناصحة جداً ! مش كدة برضه ؟!

بالنسبة للعداد اللى قدامك فى التابلوه Odometer، هوه اللى بيقولك قطعتى كام كيلومتر وده العداد اللى فةق ومش سهل تصفيره ( يعنى مش ممكن يديكى قراءة صفر ألا بمعرفة متخصص )
أما العداد اللى تحته Tripmeter فده بيبين ليكى المشوار الواحد خد كام كم ؟ وبعدين ممكن تصفرى العداد للمشوار اللى بعده وهكذا عن طريق الضغط على الزر الطويل الأسود

بالنسبة للعداد اللى عندك وعامل أكتر من 1000كم ده طبعاً من المعرض مشيوا بيها كتير ، مش معقولة تكونى أستهلكتيهم بسرعة كدة !
وعلى العموم ماتنسيش صيانة الــ 1000 كم ، وديها التوكيل علشان يغيروا الزيت والفلتر ويظبطوا العربية كلها ، ولو ليكى أى ملاحظات قوليلهم عليها زى موضوع الفتيس ، مع العلم بأن الصيانة كلها مجانية (للـ 1000 كم وقبل ماتعدى الــ 2000كم ) ماعدا ثمن الزيت والفلتر ( أنا دفعت 121 ج تمن زيت HP 5000 + فلتر )
مع خالص تحياتى

شكرا الف شكر و كل عام و الجميع بخير

غريبه معلش ازاى عربيه زيرو و تبقى عامله 1000 كيلو . انتى متأكده من الموضوع ده ؟؟؟؟

مش عاملة حاجة العربية انا اللي جاهلة كنت ببص عالعداد اللي تحت مش اللي فوق

اصلي ماكنتش قريت الكتالوج p:

هو ممكن يكون كده فعلا
انا برضه اخروني في ورق عربيتي قعدت فترة مركونة قدام البيت لحد ما جه الجواب بتاعها
وبعد كده المعرض اللي انا جبت منه ماجبليش كتاب الضمان وقعد اكتر من شهر لدرجة اني عملت صيانة الالف من غيره وطبعا دفعت فلوس
عموما ربنا ييسر لك الامر ويطلع شكوكك مش في محلها احسن المواضيع دي بتدايق جدا
وان شاء الله نبارك لك عما قريب علي العربية
وربنا يكفيكي ويكفينا شر الطريق.

م/محمد اسماعيل

في مصر ربك يسترها معاك ومع الناس كلها