الإكصدام إتخبط

**mirage** · 09-12-2007 12:04 PM

الإخوة الأعزاء
السلام عليكم ورحمة الله وبركاته.
واحد ابن حلال ماشي عكس الاتجاه خبطلي الإكصدام (منه لله)

المهم انا عاوز أسأل عن أفضل مكان أصلح فيه الخبطة ولو التوكيل عاوز عنوانه وكمان ايه الإجراءات المطلوبة مع العلم إني مأمن علي العربية في الجمعية وهي لانسر 2007

وربنا يكفيكوا ويكفينا شر الحوادث

أخوكم وليد

**مصراوي جدا** · 09-12-2007 12:40 PM

أولا حمد لله على سلامتك والحمد لله انك مأمن على العربية وباذن الله ترجع زي الأول لأن الاكصدام بيتغير ويترش بلون العربية

هي خطوات الاصلاح لو عايز تصلح في التوكيل بتتصل بمركز الخدمة وتاخد موعد
وتيجي في الموعد لعمل مقايسة والاتصال بشركة التأمين لحضور مهندس التأمين للمعاينة والموافقة على المقايسة
بعدها بيتم الاصلاح وحضرتك بتدفع الفاتورة وتحاسب التأمين عليها

مراكز خدمة التوكيل مصرية
الأول الرئيسي في الكيلو 16 طريق الاسكندرية الزراعي بعد كوبري قليوب على الشمال ت: 42157629
والثاني في جسر السويس أمام سوق القنال الدولي ت : 26981976 - 26982975

أنصحك بالاتصال بالمركز الرئيسي لأن الزحام فيه أقل من فرع جسر السويس وبالتالي ممكن تاخد موعد قريب للحضور وعمل المقايسة

**أبوسيف** · 09-12-2007 02:46 PM

لو تكلفة الإصلاح أقل من 4000 جنيه ، يبقى انت مش محتاج محضر أصلا ، وعموما اللى يرد عليك فى النقطة دى شركة التأمين نفسها مش التوكيل. زى ما قالك البشمهندس طارق ، روح اعمل المقايسة الأول وبعدين اطلع على شركة التأمين إعمل إخطار ، وان شاء الله ترجع زى الأول.

**mirage** · 09-12-2007 03:19 PM

شكرا أبو سيف بارك الله فيك . وشكرا لكل أعضاء المنتدي .

**اسلام المصرى** · 09-12-2007 07:53 PM

قدر الله و ما شاء فعل.
ربنا يعوض عليك خير يا أستاذ وليد. ان شاء الله الأكصدام يتصلح و كله يبقى تمام.
أنا من رأى طالما حضرتك مأمن على العربية يبقى تتصلح فى التوكيل و الله المستعان.
ربنا يوفقك و ماتزعلش نفسك :)

**boody2** · 09-12-2007 08:14 PM

فداك الاكصدام

انا برضه معايا 1600 2007 و الاكصدام الخلفي اتكسر و كنت مامن علي العربية و غيرته و دهنته بنفس اللون السيارة في مركز بوش ب 2000 جنيه

و ربنا يستر طريقنا كلنا

**mirage** · 10-12-2007 09:58 AM

والله يا جماعة الواحد بيزعل في أول الحادثة لكن بعد كده الواحد بيحمد ربنا لما بيشوف الناس اللي كل يوم بتموت في الحوادث وبقول قدر ولطف واللي ييجي في الريش بقشيش .

بس الحاجة الوحيدة اللي بتضايق هي الجري بين التوكيل والتأمين والقعدة من غير عربية فترة الإصلاح وانتوا عارفين اللي بيتعود علي العربية حاله بيقف من غيرها بس والله الردود الجميلة بتاعتكوا ريحتني كتير وربنا يبارك فيكم جميعا ويسترها معانا جميعا .

وليد