لوجان 7 راكب

**kemozico** · 07-01-2010 12:28 AM

انا يا جماعه عندى عربيه بيجو 504 وشغال اسكندريه القاهره وبصراحه العربيه قدمه اووووووووى وكمان فى اخبار انو مش هيجددوا للبجو بعد كده كمان سنين اوى حاجه زى دى اجره وانا كنت عايز اخد رايكم لو اجيب اللوجان 7 راكب هل تستحمل السفر والشغل ولا ايه الكلام يا ريت الافاده ضرورى لان محتار ما بين التويوتا افنزا واللوجان بس انا برجح اللوجان ويا ترى اخبار اسعار قطع الغيار وكده يعنى؟؟؟؟

**cementman** · 07-01-2010 01:25 AM

لوجان الجزاير والمغرب كلهك مشغلينها أجرة توكل على الله

**zkralla** · 07-01-2010 10:46 AM

طبعا اللوجان وأن شاء الله متخافش من موضوع قطع الغيار خالص عشان انشار العربية بيزيد يوم عن يوم
أنا كنت سمعت من واحد صاحبى أن هيحصل احلال لل 504 زى التاكسى الابيض وهتخش اللوجان بدلها بس ما عنديش تأكيد للكلام ده

**kemozico** · 07-01-2010 11:57 AM

شكرا يا جماعه

**mostafabakry** · 07-01-2010 12:54 PM

هي بالفعل اللوجان mcv شغالة في الأقصر و الغردقة تاكسي و ماشية زي الفل
بس خد بالك العربية دي 7 راكب يالسائق مش زي البيجو 7 راكب بدون السائق يعني انت هتركب 6 راكب معاك ( 1امام + 3 وسط + 2اخر كنبة )

انا معايا اللوجان ال 7 راكب و الحمدلله هي فعلا عربية محترمة جدا و تستحق قيمتها
بس انا مش عارف هل العربية هتقدر تحل مكان الوحش اللي اسمح بيجو 504 من ناحية قوة تحمل ظروف التشغيل الصعبة جدا جدا علي اي عربية تاني زي الحمولة اللي بيشيلها البيجو ؟؟؟
يعني هل العربية هتتحمل 6 راكب بشنطهم و كراتينهم و قفاصتهم زي ما بنشوف البلاوي الزرقا اللي بيبقي البيجو 504 شايلها علي ظهره و ماشي زي الباخرة في البحر
والله انا بشوف مناظر للبيجو دا طالع من ميناء سفاجا بالناس اللي جايه من الخليج و الله بدون مبالغة بتبقي حمولة حوالي 1 طن من شنط و عفش مناظر تخلي العربية تصعب عليك

يعني اقصد اقولك انت ممكن تشتغل بالبيجو سنه كاملة و انت بتمرمط فيه و تيجي اخر السنة تشده من تاني و تعمل عفشة و مساعدين ب 2000 جنية بالكتير
طيب هل اللوجان ممكن تبقي كدا ؟؟؟
انا عن نفسي اتمني تكرار اسطورة البيجو ال504 مع اللوجان mcv و ان كنت انا شايف انه البيجو 504 اتظلم في موضوع التكهين دا لأني بصراحة بشوف عربيات بيجو 504 مافيهاش اي مشاكل و بتجري عالطريق زي العربيات الزيرو بالظبط لا عادم و لا دخان و يمكن كمان احسن من عربيات حديثة موديلها بقاله 8-10 سنين بس و حالتها وحشة جدا

خلاصة الكلام انا بقول ان اللوجان ال 7 راكب عربية عائلية محترمة بجد كملاكي و كتاكسي تشتغل زي الفل لأن التاكسي استخدامه مش صعب

اما الأجرة و مع الحمولات اللي انا بشوفها فوق البيجو و اللي اكيد كلنا بنشوفها عالطرق مش عارف بصراحة ايه هتكون اخبار اللوجان معاها

عموما انا كنت في مرة في فرع رينو الغردقة اللي انا اشتريت عربيتي منهم و عرفت من مهندس المبيعات هناك انه واحد من اصحاب البيجو ال 504 اللي بيشتغل السويس الغردقة تقريبا غير عربيته باللوجان mcv و تقريبا عمل تصميم خاص بالشبكة اللي هتركب فوق السقف عشان تتحمل شغل السفر بتاعه
بس بصراحة مش عارف ايه اخبار حاليا

انت افضل شئ تعمله انك تروح تشوف العربية بنفسك و تعاينها و انت هتقدر تحكم بحكم عليها خبرتك
اما موضوع قطع الغيار فهي طبعا لا تقارن باسعار قطع غيار البيجو 504 ابدا
بس انت لوجيت تقارنها بكل الموديلات الحديثة هتلاقيها كويسة جدا و لسه كمان علي ما العربية انتشرت هتلاقي قطع الغيار بيترخص و تنتشر و مصادرها تكتر

اما بالنسبة للتويوتا أفانزا فبصراحة مقدرش اقولك اي حاجة عالعربية لأني مجربتهاش بنفسي و لكن انا لما كنت لسه بفكر اشتري عربية كنت فكرت في الأفانزا بس بصراحة ما حدش شكر لي فيها ابدا و كل الكلام عنها كان مش كويس و خصوصا اتزان العربية
و انا عندي احساس ان الأفانزا مش بنفس وسع اللوجان من جوا لأنه مكعبرة شوية و العربية ملمومة اوي يعني تحس ان مساحتها من جوا اقل شوية من اللوجان

ربنا يوفقك للإختيار الصحيح و اهلا بيك معانا في المنتدي و تحت امرك في اي استفسار تاني

**mohamed2710** · 09-01-2010 12:39 AM

السلام عليكم
كونت عاوز النصيحة بالنسبة للرينو mcv من حيث الثبات والمتانة لاني المسافة بين الشغل والبيت كبيرة وهي احسن ولا الكيا كارينز لاني محتار اوي ارجو الرد بسرعة اخوك محمد

**mostafabakry** · 11-01-2010 06:15 PM

المشاركة الأصلية كتبت بواسطة mohamed2710

السلام عليكم
كونت عاوز النصيحة بالنسبة للرينو mcv من حيث الثبات والمتانة لاني المسافة بين الشغل والبيت كبيرة وهي احسن ولا الكيا كارينز لاني محتار اوي ارجو الرد بسرعة اخوك محمد

من ناحية الثبات فالعربية ثباتها جيد جدا حتي 150 كم/س وانت راكب لوحدك في العربية و دا عن تجربة
يعني ما تقلقش من النقطة دي نهائيا
من ناحية المتانة فبصراحة العربية عملية جدا و عفشتها عملية و مناسبة لطرقنا السيئة و الحمدلله ما ظهرتش اي مشكلة حتي الآن

اما مقارنتها مع الكارينو فبصراحة ماقدرش افيدك لأني مركبتش الكارينز عشان احكم عليها لكن العربيتين بيجمعهم نفس التوكيل المحترم و دي نقطة بتميز العربيتين

لكن اللي اقدر اقولهولك ان اللوجانmcv اللي نازلة بموتور 16 صباب عربية كويسة جدا و لا يعيبها غير انها هاف اوبشن (زجاج مانيوال مش كهربا - سنتر مفتاح مش ريموت - مافيش فوج لايت - مافيش كمبيوتر رحلات ) و انا معنديش اي مشكلة في عدم وجود الكماليات دي
يمكن الزجاج الكهرباء هو اللي فارق لكن عادي انا بفكر اركبه بس مستني العربية تنتشر شوية عشان اسعار اكسسواراتها ترخص
و عشان الضمان بتاعها كمان