حد مكن قرأ اخبار السيارات امبارح و شاف أ/ خالد أباظة كاتب ايه في المقال بتاعه
انا قرات اخبار السيارات بتاع يوم السبت 8/12/20007 و كان الأستاذ خالد أباظة كاتب فية عن مشكلة الزحمة الرهيبة في القاهرة الكبري و مشكلة المرور اللي ماحدش عارف يحلها و إقترح علي الحكومة بعض الحلول من ضمنها الغاء ترخيص السيارات القديمة و التاكسي القديم القبيح كما ذكر بمقالة و كان الإقتراح اللي عصبني و خلاني طقيت من جنابي ان الباشا خالد بيقترح علي الحكومة انها ترفع اسعار البنزين و توجه الزيادة دي لتجديد الطرق و الكباري و المحاور و عمل محاور جديدة عشان تحل مشكلة الزحمة في البلد
للا حول ولا قوة إلا بالله العلي العظيم انا فعلا دلوقتي عرفت قيمة المثل اللي بيقول اللي ما يشوفش من الغربال يبقي اييييييييييه يبقي اعمي
الأستاذ خالد عايش في كوكب تاني و مش معانا في مصر و مش شايف احوال الناس اللي مطينة بطين و مش لاقية تاكل ولا تشرب و لا تسكن و لا حتي تتكلم و تشكي همومها من كتر الفقر اللي احنا عايشين فيه
طيب بدل ما حضرتك تقترح بزيادة البنزين واللي بالطبع هيزود كل الأسعار حتي بتاع الفجل و الجرجير هيقولك الربطة بجنية يا بيه اصلة البنزين غلي و سعرة رفع و العملية ما جيباش همها و يعيطلك حبتين و هو بصراحة معاه الحق لانة الدنيا غليت و مش زمان
بدل مانقترح الإقتراح الموقت دا واللي لو عملناه زي ما حضرته بيقول هيحل المشكلة بشكل مؤقت لمدة كام سنة يعني بالبلدي مسكن وكام سنة تاني هتزيد اعداد الناس و العربيات هتزيد تاني في القاهرة و يبقي العجل في طينه و ترجع ريمة لعادتها القديمة و كانك يابوزيد ما غزيت :)
انا بقترح ان احنا نفكر في حلول فعلية مش مسكنات انا شايف ان القاهرة اصلا ما فيهاش اماكن ممكن نعمل فيها طرق جديدة دا الكباري فوق الأرض مليانة و الشوارع علي الأرض مليانة و الأنفاق تحت الأرض مليانة و مولد و صاحبة مش غايب دا مات و مش راجع تاني خاااااااااااااااالص
مصر مساحتها مليون كيلو متر مربع احنا قاعدين و متبتين في القاهرة والدلتا و الوادي اللي هو الصعيد اللي انا منه و تركنا باقي المساحة لعوامل التعرية ليه دي بصراحة انا محتاج حد فاهم يقهماني ؟؟؟؟؟؟؟؟؟
حتي لما جينا نعمل كام مدينة تاني عملنا 6 اكتوبر و العاشر و السادات و مش عارف مين تاني و المهم كلهم في القاهرة او حولها بردك ليييييييييييه انا مش عارف ؟؟؟؟؟؟؟؟؟؟
طيب ما البلد واسعة و ربنا موسعها علينا و احنا بنخنق روحنا ليييييييييييييييييييييييي ه مش عارف ؟؟؟؟؟؟
انا عارف ان انا طولت عليكم و كلامي كتير و دوشتكم بس يا جماعة احنا في مشكلة رهيبة ولا زم تتحل وإلا الناس هتموت بعضها
مش معقولة اكون معايا عربية و ابقي مش حاسس بالميزة دي ، يعني انا و اللي راكب اتوبيس نقل عام واحد لأننا بنقف في الطريق مع بعض كتير و بنوصل مع بعض بسبب الزحمة يعني زيك زيه و مافيش اي فرق يبقي الواحد يركب اتوبيس اوفر و ارخص طالما مافيش ميزة و لا توفير في الوقت
انا مع الأستاذ خالد في الغاء ترخيص السيارات القديمة و تكهينها بس لازم نعرف ان العربيات دي فاتحة بيوت و الناس بتاكل من وراها عيش مش جايبنها يلعبوا بيها و علي فكرة اصحاب العربيات دي قرفانين منها و كرهينها من مصاريفها و مشاكلها و لكن ايه اللي رماك علي المر اكيد اللي امر منه و هو طبعا رغيف العيش اللي بييجي بالدم و العرق
لازم الموضوع يتقنن بعدل عشان الناس دي ما تتسابش كدا بدون عمل واكيد هناك حلول كتير و نبقي حلينا مشكلة الزحمة بعمل مشاكل اكتر و هي البطالة اللي طبعا احنا بنعاني منها اصلا
اما بالنسبة لموضع زيادة اسعار البنزين دا فانا مش معاه خالص في رايه دا لان الناس خلاص زهقت و مش لاقية تاكل اروح اززود البنزين دي تبقي مذبحة جماعية بطريقة شرعية وبالموت البطئ لازم يزود المرتبات ويظبط السوق و الأسعار و يعمل كنترول علي الناس الكبيرة في السوق و ما يعطيهمش الفرصة اللي بها ممكن يتحكموا و يحتكروا السوق زي ما حاصل دلوقتي في كل حاجة في البلد و انتو اكيد عارفين قصدي كويس
انا عارف ان البنزين سعره عالميا ارتفع و احنا انتاجنا مش بيكفينا و الدولة بتدفع مبالغ كبيرة لتدعيم البنزين ولكن مش الحل ان انا ازود و الناس مش لاقية تاكل
البلد واسعة و كبيرة و مواردها كتير بس احنا اللي مش عارفين نستغلها صح حتي سيناء اللي احنا خسرنا شباب كتير عشان نحررها لم نستغلها صح و بقت مرتع لتجار المخدرات و اصبح مزارع للبانجو الخشخاش و المخدرات بانواعها والبدو اللي فيها بقوا يلعنوا اليوم اللي سينار اتحررت و رجعت لمصر بعد ما كانوا عايشين في نعيم اسرائيل
توشكي حد سمع عنها حاجة من 5 سنين فكرين من كام سنة كان كل يوم الصبح ييجي برنامج يتكلم عن توشكي و مشروع المستقبل فينه دلوقتي راااااااااااااااااااااااا ح في الهوي والأراضي اتوزعت علي المستثمرين العرب و الأجانب و الممثلين و الممثلات و الراقصين و الراقصات و كل سنة و انتوا طيبين يا جماعة
كان المفروض ان توشكي دي تتعمر و تبقي تجمع عمراني كبير زراعي و صناعي و تجاري علي حق مش تتباع برخص التراب للأجانب اللي زرعوها بما يسمي بالمحاصيل الأورجانيك و بتتصدر لأوروبا مباشرة و احنا اصحاب البلد بناكل في القمح المسرطن و الخضار المرشوش المبيدات الحشري الممية لما الفشل الكلوي و الكبد الوبائي اللهم احفظنا انتشر بين الناس و بقي شئ وكل بيت فية واحد علي الأقل مصاب بواحد من المرضين دول فشل كلوي او كبد
والله العظيم يا جماعة البلد فيها خير كتير و مستني بس اللي يطلعة و يستغله الصحراء و اسعة و ممكن تتزرع و مش مستحيل و لا حاجة السعودية كلها صحاري و ما عندهاش نهر النيل و لا الأيادي العاملة و مع ذلك بيزرعوا كل شئ عندهم
احنا محتاجين ناس تفكر صح و بإخلاص عشان نحل المشاكل دي و الحلول تكون منطقية و علي المدي البعيد مش مسكنات مؤقتة كفانا تخلف و فقر العلم كلة بيتقدم إلا احنا بنرجع لورا
محتاجين اننا ننظر لمشاكلنا نظة منطقية و فعلية بلاش النفاق و الكذب لأننا خلاص مللنا يعني المفروض الإعلام بتاعنا يكون صادق و محايد و ينقل الصورة الحقيقية لأوضاع البلد حتي يتمكن المسؤلين من اتخاذ اللازم لأن المسؤل احيانا بتوصله معلومات خاطئة و صورة غير صحيحة لأوضاع الناس الفعلية و يطلع علي الشاشات والإذاعات يقول ارقام و احصائيات غير موجودة تماما و كانه بيتكلم عن بلد غير مصر
عشان ما طولش اكتر من كدا و لان المشكلة اكبر و اضخم مما ذكرتة و حضراتكم اكيد عارفين حجمها اكتر مني بحكم انكم من سكان القاهرة انا ساكتفي بما قلته الذي يعتبر و جهة نظري الخاصة و المتواضعة في رؤية المشكلة و اختلافي مع الأستاذ خالد اباظة فيما كتبة بالمقال و الحلول المقترحة
اتمني الا اكون قد ازعجتكم ومنتظر ردودكم الفعالة
