لأصحاب هيونداي i10

**mero2008** · 07-01-2010 06:33 PM

يا جماعة انا ان شاء الله ناوي اجيب الـ i10 بس عايز اصحاب الخبره واللي جايبين ومجربين العربية دي يقولوا بصراحة ايه رأيهم فيها ولو في مشاكل يقولوا عليها علشان بقارن بينها وبين حاجات تانية وكمان عايز مقارنه بينها وبين البيكانتو .... وشكرا...

**drmagouda** · 07-01-2010 07:32 PM

على فكرة انا كمان مستني ردود على الموضوع لأني في نفس الحيرة بس انا من فترة باشوف المقارنات لقيت البكانتو افضل من ناحية الوسع الداخلي والعفشة والتوكيل لكن الi10 طبعا الناس بتفضلها علشان هيونداي والأنتشار على الرغم اني سمعت كلام عن التوكيل مش موفر قطع غيارها يا ترى الكلام دة حقيقي

**mero2008** · 09-01-2010 08:49 PM

أدينا مستنيين اي رد من اصحاب التجارب السابقة واصحاب الخبرة

**مصطفى مغربي** · 09-01-2010 09:12 PM

طب ايه رأيكم في الأتوس

انا معايا اتوس 2010 .....ممتازة و بــــ 53 الف

**monmonmon** · 10-01-2010 10:17 PM

المشاركة الأصلية كتبت بواسطة mero2008

يا جماعة انا ان شاء الله ناوي اجيب الـ i10 بس عايز اصحاب الخبره واللي جايبين ومجربين العربية دي يقولوا بصراحة ايه رأيهم فيها ولو في مشاكل يقولوا عليها علشان بقارن بينها وبين حاجات تانية وكمان عايز مقارنه بينها وبين البيكانتو .... وشكرا...

العربية ممتازه.. معايا من يناير 2009 و عامله اكتر من 10,700 و ماشاء الله كالجديدة

مربطش عفشة خالص

فقط غيرت زيت لأول مره عند 6,421 كم فى غبور ابو رواش

مفيش اى مشاكل ميكانيكية فى العربية نهائيا الحمد لله

فقط الكرسى اليمين فيه تزييق بسمعه ساعات اعتقد من مجرى الكرسى و نسيت اقول فى التوكيل عليه

الكاسيت الاصلى نوعه رودستار و كان بيقطع بس نادرا لو الجو حار جدا فى الصيف و بعته لواحد صاحبى و ركبت واحد بايونيير فيه usb , aux و زى الفل الحمد لله

التكييف فى الاول كان ضعيف شويه من حيث درجة البرودة لكن سرعة المروحة عاليه جدا جدا و بتوزع الهواء كويس بس بعد كده مع الوقت حسيت انه اتحسن جامد و نسيت اقول للتوكيل فى الصيانة.. (كلامى على الجو الحار جدا فى عز الصيف و العربية مركونة فى الشمس و مخزنه حرارة)

الكاوتش الاصلى رفيع جدا عرضه 155 مم و فى فردة اتخرمت عندى.. فغيرت كل الكاوتش لعرض 175 مم و دفعت فرق 800 جنيه فى ال 5 فرد و العربية بقت اريح من الاول لكن استهلاك البنزين اعلى شويه و عزم العربية اقل شويه و الفرامل اخف

الشنطة ضيقة شويه و دى ترجع لاحتياجاتك

دى النقاط السلبية و لا تعتبر عيوب

انا كاتب كتيييير جدا عن العربية ممكن تشوف مشاركاتى فى المنتدى.. بالتوفيق

**monmonmon** · 10-01-2010 10:19 PM

المشاركة الأصلية كتبت بواسطة drmagouda

على فكرة انا كمان مستني ردود على الموضوع لأني في نفس الحيرة بس انا من فترة باشوف المقارنات لقيت البكانتو افضل من ناحية الوسع الداخلي والعفشة والتوكيل لكن الi10 طبعا الناس بتفضلها علشان هيونداي والأنتشار على الرغم اني سمعت كلام عن التوكيل مش موفر قطع غيارها يا ترى الكلام دة حقيقي

بالعكس ال i10 اوسع من البيكانتو فى الوسع الداخلى.. ممكن تجربها فى اى معرض

عفشة ال i10 اسمع انها افضل من البيكانتو.. مش بتتنطط جامد زى البيكانتو و مش بتميل اوى فى الملفات ده اللى قريته فى تقييمات اوروبا و بيقولوا انها افضل.. + ان فيها مكونات المانى فى العفشة و ده كلام واحد من المنتدى
بس طبعا الفرق اكيد تافه مش كبيير لان العربيتين يعتبروا واحد