المشاركة الأصلية كتبت بواسطة hh
اولا مش معقول نفترض ان الوكيل بيجيب الدفعة بتاعت العربيات و يستنى يبيعها و يلم فلوسها و بعدين بنفس الفلوس دي يروح يجيب دفعة جديدة, لأنه في الحالة دي لسة حيعمل الاوردر و يحول الفلوس و بعدين الشركة برة تحضرله الشحنة و تبعتهاله - بالطريق البحري طبعا - و بعد الشحنة ما توصل يعمل اجراءات التخليص الجمركي و بعدين تبقى جاهزة للبيع. الدورة دي مش ممكن تاخد أقل من3 - 4 شهور بالميت, و أكيد هو مش حيبيع العربيات دي بين يوم و ليلة, بيتهيألي مش أقل من شهرين تلاتة كمان ده لو عربياته عليها اقبال. بالطريقة دي مستحيل يقدر يجيب أكتر من دفعتين في السنة, ده لو متفائلين قوي. أعتقد الأقرب للمنطق انه فعلا بيحتاج يضخ سيولة مالية أو يستعين بتسهيلات ائتمانية أكتر من مرة في خلال السنة.
ثانيا, حتى لو افترضنا ان كلام حضرتك صح, برضه حضرتك كدة بتخلط ما بين نسبة الربح و اجمالي المكسب. ليه بقى, لأن عملية البيع خطواتها ببساطة انه يشتري السلعة الي هي العربية و يحسب تكلفتها بما فيها نسبة تحمل من تكاليف التشغيل اللي شرحناها قبل كدة و يضيف هامش الربح و ضريبة المبيعات و يبيعها. كونه بقى يشتري سلعة جديدة (عربية جديدة) و يبيعها دي عملية جديدة, و بالتالي نسبة الربح ثابتة لكن الرقم اللي كسبه أكيد زاد.
عشان مالخبطش الناس بلاش ندخل في موضوع حسبة الارباح السنوية عشان هي دي اللي ممكن تلخبط. تعالى نبص على مثال بسيط. لو واحد عنده محل بيبيع أي سلعة - كيس شيبسي مثلا - تكلفته بالنسبة له 75 قرش و سعر بيعه 100 قرش. هامش الربح بتاعه 25%, صح؟ لو عنده خمسين كيس و باع منهم في خلال شهر تلاتين كيس, هامش الربح 25% و الرقم اللي كسبه 750 قرش. طيب لو باع 100 كيس, بمعنى انه باع الخمسين كيس و جاب خمسين تانيين (مهو أكيد مش حيسيب المحل فاضي) و باعهم برضه مكسبه كرقم حيبقى 2500 قرش, لكن حيفضل هامش الربح 25% لأن تكلفة الكيس و سعر بيعه ثابتين. طبعا أي شركة كبيرة حساباتها يتكون أعقد من كدة عشان تكاليفها بيدخل فيها عوامل كتير و عشان كدة بتتحسب سنويا اجمالي التكاليف و اجمالي المبيعات, و منها يتحسب المكسب الصافي.
مثال تاني لو انت تاجر معاك 10000 جنيه و اشتريت بيهم عربية, و بعدين بعتها ب 11000 يعني كسبت ألف جنيه. بعد كدة اشتريت عربية تانية بال11000 و بعتها ب12000 يعني كسبت ألف جنيه تانية. بعدين أشتريت بيهم عربية تالتة وبعتها ب13000 يعني كسبت فيها ألف جنيه تاني. و مرة رابعة اشتريت عربية و بعتها و كسبت فيها ألف جنيه, يعني بقى معاك 14000 جنيه. ينفع حد يقولك انت كدة حرامي و مكسبك مبالغ فيه عشان انت كان معاك 10000 جنيه و كسبت 4000 جنيه يعني 40% من رأس المال؟ لأ طبعا, لأن دي تجارة و انت حطيت هامش ربح بسيط , بس مش معقول عشان كسبت لما بعت أول عربية تبيع التانية و التالتة و الرابعة من غير مكسب.
يا جماعة انا بأكد تاني ان انا لا غرضي ادافع عن توكيلات العربيات و لا أنا بقول انهم ما بيكسبوش, لأ بيكسبوا و بيكسبوا كويس قوي كمان, لأنها تجارة بملايين. انا بس بقول ان هما هامش الربح بتاع بعضهم - لأني متأكدة ان في منهم بيغالي جدا زي ما قولت في مشاركتي السابقة - طبيعى و ميعتبرش فيه استغلال للمستهلك. احنا فعلا بنتعرض للسرقة في أسعار العربيات بسبب الجمارك و الضرائب المجحفة المفروضة على السلعة دي من الحكومة. بدليل ان أسعار العربيات في دول الخليج أقل من مصر بكتير, تفتكروا ده لأن التوكيلات هناك مكسبهم أقل؟ اتحدى ان هامش الربح للتوكيلات عندهم أكبر بكتير من عندنا في مصر. احنا مثلا الشركة بتاعتنا تنتمي لمجموعة ليها فروع في كل دول الخليج, و رغم اننا بنبيع نفس السلعة من نفس الشركات العالمية - أجهزة طبية عشان محدش يفتكر اني بشتغل في توكيل سيارات :ma: -
انما في الخليج بيحطوا هامش ربح أعلى بكتير مننا في مصر.
الخلاصة ان انا زي أي حد فيكوا اتمنى اسعار العربيات تقل, بس شايفة ان المشكلة في الحكومة مش في التجار.