ربنا يعينك على الصناعية وعلى المصاريف ويوقفلك ولاد الحلال .
وانا شايف ان السعر ده معقول علشان كنت عامل تقريبا زيه من خمس سنين
انا كنت عامل اللي حضرتك قلت عليه تقريبا من خمس سنين بس محرقتش العربيه علشان سمعت انه بيضعف الصاج ومكنتش مستاهله حرق
المهم
كان فيها برومة في العتب والاربع ابواب والشنطه والكرتيرتين اللي خلف والرفر اليمين
الراجل السمكري اخد 600 جنيه اجرة ايده بالصاج الخرده طبعا اللي ركبه وللأسف البرومة بدأت تظهر تاني في نفس الاماكن مع المحافظة الشديدة .
ثانيا الدوكو والفرن مش فاكر اخدو كام بس تقريبا 1200 جنيه
وشكلي كان مضحوك علي ايامها وربنا ينتقم من الظالم
خلي بالك قوي قوي قوي بكره وانت بتستلم العربيه من السمكري في الحاجات الي هقولك عليها :
انا للاسف مستلمتش منه علشان بتاع الدوكو كان جنبه وقلتله ابقى سلمهالو اصل انا مكنتش فاضي
1- الابواب شوف هتقفل بشويش ولا رزع ده حصل معاي ان الابواب بعد مارشيت فرن بيقيت ارزع الابواب في الدخله والطلعة.
2- شوف الخلوص بين الابواب والعتب من تحت ((( مهم جداًً))) لو كان عندك ببومة في الابواب وقص وعمل صاج تاني هتلاقي في فرق قيمة صباع بين الباب والعتب وانت قاعد جوه (( مش حابك )) وده هيدخل عفار وهيعمل طين وهتسمع صوت هوا وانت ماشي للاسف ده حصل معاي ومخدتش بالي الا بعد ما ارتشت وللاسف مش هينفع التعديل بعد الرش وحسبي الله ونعم الوكيل لكن انا لزقة جلد في الفرغات دي وكاني معملتش حاجة بس اهو سدادان نمر
واخيرا ربنا يوفقك
المفضلات