الموضوع: مطلوب المساعده فى أفضل سياره مستعملة بمبلغ من 28 ل 30 الف

المشاركة الأصلية كتبت بواسطة ehab_mansour

يا أفندم مين قال لحضرتك ان الابيزا واطيه ومين قالك انها سيئة حالة حضرتك دي فردية فياريت ما تعممش كلامك علي كل الابيزا
انا معايا ابيزا 98 اشتريتها بقالي سنة ونصف تقريبا محركها 1000 سيسي وبتعمل معايا بفضل الله من 300 الي 350 كيلو في ال 20 لتر بستخدمها في االشغل دايما والسفر يعني عملت بيها حتي الأن 62 الف كيلو عالية جدا عن الأرض حتي ولو محملة بكامل العدد سحب وقوة وسرعة لا اعتقد انك تلاقيها في عربية في فئتها عاملة حتي الأن 253500 كيلو متر ولم يفتح محركها ولا توجد بها اي مشاكل حتي الأن منذ شرائها ما عملتش اي حاجه في العفشة

اي خدمه عايز تاني لو عايز تاني قلي
اخي الفاضل صاحب الموضوع وغيرك من الحائرين اهم شيء هو حالة السيارة العامة عند الشراء
وربنا يوفقك والله علي ما اقول شهيد
ملحوظة الألماني عامة قطع غياره غالية ولكن معمرة جدا ولكنها ركوبة تانية خالص
والله الموفق

انا معاك الالمانى ده لا يعلى عليه
سواء كانت السيارة
جولف 2
سيات ابيزا
بولو

الثلاثة احلى من بعض

اعتقد ان سعر جولف 2 اقل شوية من الابيزا والبولو

فى الحقيقة انا ركبت الجولف 2 ...
موش هاقول غير انها فى منتهى الروعة والجمال
المشكلة فى اسعار قطع الغيار
البعض يقول انها معمرة جدا

ماشى ... كويس

لكن فى حالة شراء سيارة جولف 2 مستعملة فى حدود 30 او 32 الف والمعروف ان اغلب اللى بيركبها شباب ... والجرى والحركات على كيفك

السؤال
-----
متوسط مصاريف العربية جولف 2 سنويا اد ايه ؟

بناء على اجابة السؤال ده من واحد امين

تقدر تحدد السيارة دى مناسبة لك ولا لأ

معلهش ... أنا آسف انى اقول ان اغلب الشباب اللى كان راكب العربية دى ايام ما كنت فى الكلية كان شباب من عائلات ميسورة الحال "يرزق من يشاء بغير حساب"
يعنى موضوع انه يصرف على العربية مافيش فيه اى مشاكل

المشكلة تظهر عندما يشتريها شخص متوسط الدخل
بمجرد انه يغير تيل فرامل .. مع ماسترفرامل ... مع فانوس يبدأ يزعل ويضايق ويحس انه موش قادر على مصاريفها

كثير من الناس بيقول ان كل العربيات بتصرف

وده كلام حقيقى

لكن لازم تعرف معدل مصاريف العربية اد ايه

يعنى مثلا
عربية 504 لو انت بتمشى حوالى 80 او 100 كيلوا يوميا
هاتحتاج كل شهر حوالى 150 جنيه تقريبا عشان تحافظ على مستوى العربية ونظافتها وكفائتها
اما لو كان معدل مشيك عادى 20 او 30 كيلو يوميا
يبقى موش هاتحتاج شهريا غير 100 جنيه تشيلها للاحتياط لو العربية احتاجت حاجة ده غير البنزين والزيت ... كل الكلام ده اتعلمناه من اصدقائنا فى قسم البيجو هيرو و اسلام وياقفوت "شباب زى الفل"

نرجع للجولف
تجد ان اسعار قطع غيارها جامد
يعنى مثلا سيلك دبرياج 75 جنيه وبعد التركيب قول 100

انا قلت فقط سيلك دبرياش


فى الحقيقة احنا بيتلعب بنا
لو فكرت فى سيارات حديثة شوية فى التسعينات على اد فلوسنا
تجد انها بعد مرور 10 سنوات او 14 سنة
اصبح حالتها زى العربيات القديمة اللى فى الثمانينات

ويظهر سؤال عند بعض الناس يقول

يا عم اشترى لك عربية مستعملة ثمانينات وريح دماغك
ووفر فلوسك
ولو كنت مستلف رجع الفلوس بدل ما تدين نفسك
روح اشترى مثلا
مازدا 323 كثيرها 22 الف جنيه وزى الفل
ولو ظهر فيها ايه هايفضل معاك فلوس وهاتقدر تعمله
لو محتاجة مثلا "2 كوبلن" هاتغيرهم" وخلاص
مثلا على سبيل المثال

او حتى 128 تؤدى الغرض هو انت يعنى بتمشى اد ايه


نرجع تانى تعيد نفس الكلام
وترجع تانى تعيد فى "المتعاد"
ههههههههههههههههههههههههه هه

وترجع تانى تحسب

وتدور ايه الافضل

القديم ... ولا ... الجديد
القديم ونوفر فلوسنا على اساس احنا مشينا بالعربية موش كثيير
ولا الجديد حتى ولو كان تعبان ومقرف بس نفضل فى الموديلات الحديثة بعيدا عن شبح الاحلال والوش اللى معمول "مع ان موضوع الاحلال ده صعب انه يحصل فى الملاكى"

واضح جدا ان مافيش عربية كويسة فعلا إلا فى فئة الـ 35 او 38 الف جنيه
وعلى راسهم الاكسنت او اللانوس او تيوتا كورولا على سبيل المثلا

اما باقى العربيات الحديثة فى التسعينات فى حدود 30 او 32 الف
كلها عربيات ضعيفة
سواء فى البودى او فى حالتها بعد مرور اكثر من 10 سنوات عليها
تشعر ان مافيش فرق بينها وبين القديم غير فى السعر

واذا وجدت عربية نظيفة منهم مثل الاكسيل على اساس انها مطلوبة
يجلس التاجر وبكل بجاحة يقولك "36 و نص" يا بيه

بالزمة ده كلام

يعنى الناس دى بتنزل السوق
وبتبيع فعلا
ولا تنظر واحد غلبان ونفسه فى عربية عشان ينصبوا عليه فى سعرها

وفى الغالب السعر دائما ازيد من المطلوب بحوالى 2 او 3 الاف جنيه
على طول الخط


ده غير ان كل واحد بيحب عربيته
ويعتقد انها احسن عربية فى الدنيا كلها

يعنى ما تسألش واحد على عربية
إلا ويقولك دى مية مية

قليل قوى إلا يقولك
مزايا وعيوب العربية

النصيحة الصعبة

هى لازم تنزل السوق ومعاك "ميكانيكى" امين
وهو اللى هايتفرج
وهو اللى هايتفاوض فى السعر
وهو اللى هايشجعك فى الخروج من دوامة الخوف من الشراء
وفى الاول والآخر خليها على الله
يبقى انت كده عملت اللى عليك
هاتعمل ايه تانى

فى انتظار تواصلكم

مع اطيب التمنيات
اخوكم حسين غزالة