مشكلة خاصة تخص احد اصدقائي رجاء الرد

**noureymo** · 10-12-2007 12:59 PM

السلام عليكم
دي مشكلة لاحد اصدقائي الاعزاء جدا انا اعرفه من اكتر من 25 سنة من اولى اعدادي امبارح جالي وحكالي وقلتله ان انا عضو في منتدى فيه ناس زي الفل ممكن يساعدونا قلتله ادخل على الموقع وسجل نفسك المهم سجل نفسه باسم نصر وجه يكتب المشكلة كانت الخاصية دي محجوبة عنه .
بعد اذن حضراتكم انا هسيبه يكتب المشكلة .

عندي مشكلة كبيرة جدا جدا جدا يا ريت حد يحاول ينصحني اعمل ايه علشان انا اول مرة في حياتي احس بالشلل التام
والدتي توفت وانا عندي 5 سنين كنا تلات اخوات ولدين وبنت الوالد الله يرحمه تزوج مرة اخرى واصبحنا ولدين وتلات بنات مرت الايام حتى عام 2005 توفى والدي ففوجئت بزوجته وهي تتغير 180درجة واصرت على ان نقوم انا وأخي ببيع المنزل لها مقابل مبلغ لايصل حتى الى 60% من قيمته السوقية واقنعت انا اخي بالموافقة اكراما لها على تربيتنا
وفي اليوم الذي ذهبت لها في منزل شقيقتي لاسلمها التوكيلات فوجئت بها واخوتي البنات وزوج اختي كانهم ضدي بصراحة انا اتجننت وتصرفت تصرف احمق جدا واتخانقت مع زوج اختي (عملية البيع تمت ) المهم من يوميها ما شفتش حد فيهم بالمرة على الرغم من الاعتذارات والمكالمات اليومية لزوجة ابي واخوتي البنات منذ اكتوبر 2005 .
المشكلة الكبيرة انني فوجئت منذ ايام بان اختي سيتم زفافها قي شهر ديسمبر طبعا مش هقدر اقولكم اني منهار نفسيا جدا بسبب الموضوع ده ومش عارف اعمل ايه كلمت اختي وباركتلها وقلتلها يا ريت تعزميني !!!!!!!!!!!!!!!!!!!
كلمت جوز اخت زوجة ابي وكان رده انت الي هتعزم الناس قلت يا ريت
في رمضان كلمت زوجة ابي من تحت المنزل وقلتلها عاوز افطر معاكي كان ردها لأ
يا ريت يا جماعة حد يرد عليا انا عارف اني غلطت لكن انا عاوز اصل رحمي

المهم انا دلوقتي مش عارف اعمل ايه في المشكلة دي والي بتتلخص ان اختي من الاب بنت زوجة ابي تمت خطبتها بدون علمي وتم تحديد موعد الزفاف يوم 28/12/2007 ولم يخطرني احد علما بانني على اتصال تليفوني يومي بهم وقد اتبعت كافة الاساليب التي تخطر ببال لاصلاح ذات البين واعادة صلة الرحم
دلوقتي انا عرفت ميعاد الفرح اروح ولا ما اروحش (مش هما الي قالولي)
وكمان جبت نمرة العريس وعاوز اكلمه بس مش عارف ده هيبقى صح ولا غلط
يا ريت حد يرد عليا واي ايضاح تاني انا تحت امركم بس للامانة انا عرضت المشكلة صح علشان الردود تبقى صح
شكرا مقدما يا جماعة

**mido777** · 10-12-2007 01:15 PM

حاول تخلى حد من اهل الدين يكلمها وينصحها

**sherif Anton** · 10-12-2007 01:25 PM

ياتري ايه موقف اختك شقيقتك من الموضوع ده ... وهل هي على علاقة طيبة بزوجة ابيك واخواتها البنات من زوجة ابيك ... حاول تخليها طرف فعال في الصلح

**noureymo** · 10-12-2007 01:29 PM

يكلم مين وينصح انا رحت كلمت اخواته ومامته (مراة ابوه) اكتر من مرة وما فيش فايدة ابدا طبعا انا مش هبقى زي رجل دين فاضل لكن رجل الدين يوصلهم ازاي
ياريت يا جماعة نفكر سوى في حل عملي ينفذه بنفسه
انا كان رايي انه لازم يقف جنب اخته قالوله على الفرح او ما قالولوش .
وبعدين هو راح البلد قابل خال العروسة وجدتها (تخيلوا قالولوا الفرح احتمال يكون اتأجل ليناير

انا كان عندي رد على الوموقف ده وقلتله انت خليك مفهمهم انك مش عارف الميعاد باضبط وكلمهم كل يوم وقول لاختك انك عاوزها تعزمك وكلم خالها وجوز خالتها في العيد عيد عليهم واسألهم عن الفرح في الغالب مش هيردوا مباشرة على الميعاد

ويوم الفرح يلاقوك قدامهم بكده هتتحسسهم كلهم بالخجل بس لازم تقف جنب اختك وما تسيبهاش واياك من محاولة عمل اي دور من عينة وكيل العروس علشان ما يحصلش مشاكل وتبقى بوظت عليهم فرحتهم .
ده كان رأيي ومش عارف صح ولا غلط المهم هو قعد يتناقش كتير في الموضوع ده وما وصلناش لحل نهائي علشان كده جينا المنتدى ده.

**noureymo** · 10-12-2007 01:34 PM

أ- شريف
اخته علاقتها بيهم طيبة جدا ومعاهم على طول وجوزها هو الي بيعملهم كل حاجة (جوزها الي محمد اتخانق معاه وكانت دي الشماعة الي علقوا عليها كل القطيعة دي.)

موضوع الصلح ده ممكن ياخد وقت والفرح قرب ومافيش حد فاضي لقعدات من هذا القبيل حاولت اروحلهم امبارح بعد ما محمد قعد يعيط قدامي وكان منهار جدا جدا كان ردهم انهم مش فاضيين اليومين دول وما رضيوش حتى يقولولي عاى ميعاد الفرح علشان ما اقولوش

يا ريت نقدر نفيده في موضوع الفرح الي ممكن يستغله في اتمام الصلح

عموما محمد مشي دلوقتي وبليل هيجيلي البيت هو هيكون اقدر مني على المناقشة المجدية مع حضراتكم.

**meza** · 10-12-2007 03:10 PM

مشكلتك صعبة شوية
لكن أنا هفكر فى حل كويس و إن شاء الله هقولهولك
بس بالليل عشان أنا مشغول جداً دلوقتى

بس فى كام توضيح أنا طالبه من حضرتك
حضرتك أصغر من أخوك فى السن و لا أكبر و برضه أصغر ولا أكبر من أختك (اللى حضرتك إتخانقت مع جوزها)
و يا ترى هوا أخوك موقفه إيه فى المشكلة و نفس الحكاية أختك اللى هتتجوز و برضه أختك اللى حضرتك إتخانقت مع جوزها ... عاوز أعرف موقف كل واحد

حاجة تانية ........ أنا ملاحظ إن القطيعة من ناحيتهم هما خصوصاً زوجة والدك ...... هل هى سبب المشكلة و هى قاصده القطيعة ولا فى أسباب تانية؟

و أخر حاجة هل هما حاسيين إن إنت متمسك بيهم عشان كده هما بيتقلوا عليك ........ يعنى مثلاً لما واحد يبقى متمسك بواحد تلاقيه يقعد يتقل عليه ....... ولا الحكاية غير كده؟

و بلاش تعمل أى حاجة بتسرع ...... متمشيش ورا عواطفك و فكر كويس عشان فى حاجات و لو حتى بسيطة بتتفهم غلط ...... و حضرتك باين عليك قلبك أبيض و طيب خالص و دى ممكن تكون جزء من المشكلة.

يلا أنا مستنى ردك و هرد عليك أول ما أرجع من بره

**ahmed** · 10-12-2007 03:36 PM

انا شايف والله انك الاول لازم تصالح جوز اختك وما تزهقش من ده حتى لو هو تقل عليك او عاملك بجفاء
تانى حاجه لو صالحت جوز اختك الموضوع هايهدى مع اختك اللى هى مراته( تقريبا على حد توقعى)
ثالثا اختك اللى هاتتجوز لازم تحضر فرحها حتى لو هما ما قالولكش وانت عرفت لان دى اختك وانتوا ليكوا حق على بعض وجايز لما تلاقيك واقف جنبها موقفها يلين شويه
اما بقى مرات بباك فحاول معاها باستمرار لان زى ما انا شايف من كلامك ان هى اللى ربيتكم فاستمر
فى المحاولة وربنا يهدى النفوس

**noureymo** · 10-12-2007 03:42 PM

المشاركة الأصلية كتبت بواسطة meza

مشكلتك صعبة شوية
لكن أنا هفكر فى حل كويس و إن شاء الله هقولهولك
بس بالليل عشان أنا مشغول جداً دلوقتى

بس فى كام توضيح أنا طالبه من حضرتك
حضرتك أصغر من أخوك فى السن و لا أكبر و برضه أصغر ولا أكبر من أختك (اللى حضرتك إتخانقت مع جوزها)
و يا ترى هوا أخوك موقفه إيه فى المشكلة و نفس الحكاية أختك اللى هتتجوز و برضه أختك اللى حضرتك إتخانقت مع جوزها ... عاوز أعرف موقف كل واحد

حاجة تانية ........ أنا ملاحظ إن القطيعة من ناحيتهم هما خصوصاً زوجة والدك ...... هل هى سبب المشكلة و هى قاصده القطيعة ولا فى أسباب تانية؟

و أخر حاجة هل هما حاسيين إن إنت متمسك بيهم عشان كده هما بيتقلوا عليك ........ يعنى مثلاً لما واحد يبقى متمسك بواحد تلاقيه يقعد يتقل عليه ....... ولا الحكاية غير كده؟

و بلاش تعمل أى حاجة بتسرع ...... متمشيش ورا عواطفك و فكر كويس عشان فى حاجات و لو حتى بسيطة بتتفهم غلط ...... و حضرتك باين عليك قلبك أبيض و طيب خالص و دى ممكن تكون جزء من المشكلة.

يلا أنا مستنى ردك و هرد عليك أول ما أرجع من بره

محمد اكبر اخواته وكل البنات اخواته (عددهم 3) واخدين نفس الموقف لكن الي فهمته منهم انه بيتكلم مع بنتين منهم كل يوم تقريبا وكلموه في عيد ميلاده يقولولو كل سنة وانت طيب وما فيش مناسبة ما كلمهمش فيها ويخلي مراته وابنه يكلموهم كمان
اخته المتجوزة ما كلمهاش بعد خناقة جوزها غير مرتين وهي ردت عليه عادي
هي سبب المشكلة طبعا وانا شفت يوم وفاة والده شوية تصرفات منها تبين انها مش عاوزاه ولا هي ولا اخوه وما رضيتش اقوله ساعتها
وبعدين حكاية التقل دي مش المفروض انها تكون بين الاخوات لكن والله ممكن
اخوه مكبر دماغه وعايش مع مراته وولاده وما بيفكرش في الموضوع ده ابدا

زي ما قلت لحضراتكم محمد راح بلد مراة ابوه واستسمح اخوها ومامتها وضحكوا عليه وقالولوا الفرح اتأجل وما يعرفوش انه راح الفندق وعرف ميعاد الفلرح وجاب نمرة العريس كمان وكان رأيي زي ما قلتلكم في ردي انا
عموما شكرا على اهتمام حضرتك ومحمد هيكون معايا بليل وياريت تتقابلوا على الموقع علشان لو حضرتك عندك استفسارات ممكن تكون صعبة عليا شوية وما اعرفهاش انا برد في حدود الي انا شايفه وعايشه معاه من ساعة وفاة ابوه

**noureymo** · 10-12-2007 06:09 PM

انا محمد صاحب المشكلة

عاوز اضيف حاجة على كلام احمد انا رحت اشتريت هدية قيمة جدا وحاولت ابعتها بيت بابا الله يرحمه لكن للاسف ما كانش في حد في البيت ألت ممكن تكون محاولة مني للصلح يما يلاقوني جبت هدية للعروسة
والله انا محتار وحاسس اني غرقان وخلاص عاوز انتحر يا جماعة حاسس بالدونية حاسس بالغدر مش عارف اقول ايه تاني لكن انا في انتظاعر ردود حضراتكم لو امكن.
شكرا يا شباب على الاهتمام

**hazem_khidr** · 10-12-2007 06:17 PM

من رايي مناسبه زي الفرح مش لازم يعديها.
يروح الفرح و يسلم عليهم عادي جدا و كان مفيش حاجه حصلت بس بعد لفرح ما يكلمهمش و يسيب الايام هيا اللي حتصلح اي شئ تلقائي.
انما فرح اخته لازم يروح و ما يتاخرش