ما هي عيوب ومميزات بيجو 305 و لكم الشكر؟
عرض للطباعة
ما هي عيوب ومميزات بيجو 305 و لكم الشكر؟
انا برضوا بسأل نفس السؤال ياريت اللي عنده العربيه يقول خبرته
تقيله جدا في البيع و قطع الغيار بتاعتها قليله جدا ودايما مش موجوده
السلام عليكم
العيوب : 1-فعلا العربية تقيلة فى البيع الى حد ما
2-العربية صغيرة الى حد ما بالمقارنة بباقى عربيات البيجو
3-استهلاك البنزين عالى الى حد ما (بالرغم من ان استاذ هشام من المنتدى هنا وصل بالاستهلاك الى 220م/الصفيحة إلا اننى لاحظت بالقراءة والسؤال ان ما فيش حد عرف يوصل للرقم ده تانى واستهلاك عربيتى للمعرفة 160ك / الصفيحة)
المميزات : 1-العربية واسعة بالمقارنة بباقى الانواع اللى من جيلها امثال ال 127 وال 128
2-سعرها المنخفض والذى يغرى كل مبتدئ
3-العربية عافية حمل فيها لغاية لما تملاها تبص عليها تلاقيها اسد واقف ولا يتهز ، العربية جراية على الطريق بكل ما تحمله الكلمة من معنى (عربيتى موديل 1979 وانا شاريها تعبانة شوية فى الميكانيكا ولما اشتريت ماتور استيراد وظبط الميكانيكا ظبطت الاداء ولما صلحت عداد السرعة اكتفت انى كنت باجيب بيها من 100 الى 130 م/الساعة وانا مش حاسس وانا اللى كنت باقول مش هاعدى ال100
4-بالنسبة لقطع الغيار قطع غيار الفيات فقط هى اللى منتشرة وعلى نطاق واسع والموديلات القديمة منتشرة جامد عن الجديدة اما البيجو شأنها شأن ال بى ام والفولكس والتويوتا قطع عيار غالية اعتمادية قليلة بس موجودة(احتمال مش منتشرة فى الاقاليم قوى بس موجودة فى العاصمة القاهرة متمثلة فى الوكالة واعتقد برضه هاتلاقى قطع غيار فى الزقازيق منتشرة)
بصراحه عمرو فوكس ده يستاهل الف تحيه بس يا استاذ عمرو بما ان حضرتك معاك العربيه دي
بغض النظر عن موضوع البيع و عيوبه
بالنسبه للتصليح و قطع الغيار متوفره؟ و لا نادره اوي
يعني ممكن اتعرف علي حد من اللي بيتاجروا في قطع غيار البيجو تبقي المشكله اتحلت و لا الموضوع اكبر من كده؟
تاني شيء هل قطع الغيار تتحمل يعني زي الياباني اركب الحاجه و انساها سنين؟
اصلي في اول حياتي و نفسي اجيب عربيه و بفكر في 305 او 205
و مصدقت لاقيت حد زيك و زي الناس المتعاونين اللي في المنتدي ده قلت تساعدوني
شكرا لكم
اخى الحبيب التحية لك وللناس القائمين على المنتدى الجميل
قطع الغيار متوفرة ومش نادرة ومعمرة جدا زى اليابانى ولا حاجة وموجودة عند الناس بتوعها مش عند اى حد ياعنى لو انت ساكن فى القاهرة الكبرى(القاهرة - الجيزة - القليوبية)هاتلاقى الحاجة بتعتها موجود فى الوكالة انا عن نفسى باتعامل مع واحد فقط فى الوكالة وهذ لا ياعنى ان مافيش غيره بس انا بارتاح ليه وهو غالى شوية بس الحاجة نضيفة جدا وخلال تظبيط العربية اللى فات يعتبر اشتريت ماتور استيراد بس اشتريته على 3مرات (مرة وش السلندر والتانية الفارغة اللى فى الوسط والثالثة الفتيس)وديه حاجات اساسة ولاقيتها بمنتهى السهولة
بما انك ناوى على 305 او على 205 توكل على الله وسواء ديه او ديه هاتلاقى قطع غيار فى الوكالة ليها
انا تحت امرك فى اى سؤال طالما املك الرد عليه
ربنا يبارك فيك بجد انت انسان مساعد
بالنسبه لقطع الغيار في واحد اسمه سوسو في فيصل قريب من البيت ده ينفعني؟؟؟
و كمان من وجهه نظرك انهي افضل 305 ولا 205 في حاله تساوي الحاله و السعر؟
و في العموم هل في اي شيء مش مريحك في ال 305
زي محرضرتك عارف انا في اول حياتي و عاوز عربيه تساعدني مش تاكل عيش علي افايا
جزاكم الله خيرا
اين انتم ايها المنتدي
معلش متأخر بسبب انقطاع النت
ايهما افضل ال 305 ولا ال205 فى حالة تساوى السعر؟
ده يرجع ليك انت بس انت كده كده بيجوهاتى جديد وهو ده المهم ان احنا نكسب بيجوهاتى جديد
انا بصراحة لو لسه هاجيب وقدامى اتنين بنفس السعر هاختار برضه ال 305 انا عايز واحدة عائلية واسعة من جوه وليها شنطة واسعة فهافضل ال 305 علشان كده وهى مريحانى قوى قوى على فكره انا شغلى كل ايام الاسبوع بالموتوسيكل علشان الزحمة ووسط البلد بس باخرج بيها اخر الاسبوع والمشاوير العائلية وهى مكفية وزيادة
اخويا بيقكر فى واحدة شبابية قابلة للترويش بصورة كبيرة شكل ومنظر جامد وبتاع ففى دماغه ال205 بشدة فكله يعتمد عليك وعلى استخدامك للعربية
ارجو ان اكون اوضحت واسف مرة اخرى للتاخير
طيب ممكن حضرتك تقولى اشتريت الموتور بكام اصلى بفكر اشترى موتور وكمان لو حضرتك تعرف اسعار العفشة بتاعتها ايه يبقى كتر خيرك انا معابا موديل 79 كويسة بس فعلا استهلاك البنزين عالى لان قبلها كان معايا 127 كانت رائعة فى البنزين وسعر قطع الغيار بس اما الباقى لا البيجو طبعا بس تلاقى ميكانيكى كويس تتعامل معاه لان اغلب الميكانيكية مبيحبوش الشغل فى 305