البنزين في مصر و مسلسل المواقف المــــــــــش ظريفة
السلام عليكم ..
إستكمالاً لمسلسل المواقف الغير ظريفة اللي كان حصل احدهم مع م/سمير الشهاوي بسبب البنزين و اللي اتفضل حضرته بنقل تجربته هنا
النهاردة الصبح كنت نازل مشوار مهم مع والدي و كالعادة بنزل الجراج اطلع العربية ادور.. لقيت العربية دارت و صوت محرك 5 آلاف سي سي داير!
خير في اية؟
مش عارف.. العربية صوتها كان عالي جدااااً .. اتخضيت طبعاً اية يا ترى اللي حصل؟
طفيت و دورت تاني .. دارت و برضه نفس الصوت العالي و ببص لقيت مؤشر الحرارة بيعلى طيران !
طلعتها برة الجراج و ببص لقيت مؤشر الحرارة وصل لدرجة الحرارة الطبيعية (كل دا في حوالي دقيقة واحدة تشغيل... الطبيعي انها بتفضل حوالي 5 دقايق على ما المؤشر بيبدأ يتحرك اصلاًو ساعتها ببدأ اتحرك انا بالعربية..)
طفيتها تاني.. فتحت الكبوت.. المية تمام .. الزيت تمام .
والدي نزل من البيت بقوله العربية مش مظبوطة.. صوتها عالي جداً و سخنت بسرعة جداً
قاللي شوف الدوساة جايز تكون معلقة .. دوست و سيبت بحس ان اصلاً العربية بتهدي بصعوبة ...
مشيت بيها شوية و طفيتها و رجعتلها بعد نص ساعة كدا.. الصوت العالي راح و كله تمام .. دواسة البنزين بقت طبيعية جداً مفيش اي مشاكل
نتكل على الله بقى على مشوارنا؟
...
في الطريق السحب عادي..
مفيش كركرة ولا تسقيف
نيجي للمفيد...
لو داخل على مطب مثلاً وعايز اهدي تروح فاصلة...ايوا فاصلة... بتطفي!
بتفصل لما بمورها..
ادور و اطلع عالأول و اشبع .. تطلع اول ما اسيبها عالمور .. تبطل!
والدي قرر انه يسوق هو و نرجع بقى... لغينا مشوارنا...
و احنا راجعين العربية مبطلتش خالص
كله تمام.. السحب تمام .. مفيش تبطيل ولا اي حاجة...
روحت لميكانيكي قاللي دي تلاقيها كانت حاجة (عفرة) في البنزين هي اللي عملت كدا و هو جربها و مفيش حاجة الحمد لله
احنا في الأول شكينا ان البنزين يكون مغشوش لكن مع السحب الطبيعي بتاع العربية (السحب كان فعلاً عادي مفيش مشاكل) اتضح لنا ان كلام الميكانيكي احتمال كبير هو الصح..
"عفرة" في البنزين... طب و فلتر البنزين بيعمل اية ؟؟ نفس السؤال اللي سألته في موضوع م/سمير..
ملاحظة: اليوم اللي قبله كنت مفول العربية من محطة مصر للبترول (92) بالسنبلاوين ... و ساعتها كان التانك فيه حوالي التلت ... التلت دا كان من محطة وطنية - المنصورة
انا آسف لو كنت طولت عليكم .. بس بجد ربنا ما يوريكم موقف زي دا...
اخيراً... الحمد لله العربية حالياً كويسة..
موضوع مفيد بخصوص محطات المنصورة:
http://www.nilemotors.net/Nile/116237-a.html
