أول 1300 كم بـ جين 2010 وصيانة الالف كم .
ياجماعة ده مش تقرير .. ده مجرد رأى وانطباعات وتجارب أول 1300 كم .
لان انا خبرتى على قدى .
دوافع الشراء : طبعا الشكل الخارجى للعربية يخطف اى حد فى الدنيا وانا كنت معجب بيها من سنة 2006 ولكن تفكير الشراء من حوالى سنة وطبعا رجالة نايل موتورز قاموا بالواجب فى الرد على الاستفسارات الكتير (مش عاوز اكر اسامى عشان مانساش حد) وفى النهاية طبعا الخصم والتظبيط والجدعنة كلها من عند عم ايمن عادل اللى يخليك تشترى العربية لمجرد بس انه شخص محترم وجميل.
الانطباعات الاولية : الشكل الخارجى والتصميم : لاغبار عليه مافيهوش كلام يتقال .
من الداخل : التصميم جميل ومريح ولكن فى حاجات صغيرة بيبان فيها رخص الخامات زى القماش
اللى فى الباب من الداخل .. والدريكسيون تحس ان فى اجزاء مش متماسكة مع بعضها من الخلف .
وطبعا الفرش بتاع الكراسى مش قد كده ..
ملحوظة مهمة : اى ملاحظة على التقفيل أو الكلام اللى داخل العربية لو قارنتو بأى عربية تانية زى النيو أكسنت أو الفيرنا .. الجين فى رأى افضل . .
اداء العربية : الاداء فى اول 1000 كم صعب الواحد يحكم عليه من ناحية السحب والجرى .. بس طبعا الحمد لله ان ماكنش فى اى مشاكل تقفيل غير ان لمبة النور الواطى كانت مش بتنور .
وطبعا الثبات بتاع العربية والكلام ده مافيهوش كلام يتقال لان الناس كلها عارفاه .
بس الفرامل كانت غريب شوية (كنت بحس انها بعيدة)
صيانة الالف كم : عملتها فى فرع العجوزة .. الدنيا هناك كانت رايقة والناس هناك اخر حلاوة..مهندس الاستقبال اسمه أحمد جمال .. محترم جداااا..
ملاحظات الصيانة : قلتلهم ع الفرامل .. و لمبة النور الواطى .. كان فى لوك بتاع الباب الخلفى بيعلق ..
ملاحظات بعد الصيانة : ظبطو الفيشة بتاعة النور وقالولى اللمبة سليمة ...
الفرامل بقة روعة وماشاء الله ممتازة . ..
اللوك بتاع الباب الخلفى زبطو القربة بتاعتو وبقى تمام .
التكاليف 177 جم .
الاداء بقى ماشاء الله والحمد لله رووووووووووووووووعة .
وطبعا روحت غيرت الفرش وركبت فرش الــcps زى ايمن بيه
وكله تمام ..
سؤال على جنب : انا ليه لما ببقى واقف ع الـ d ورجلى ع الفرامل .. لما باجى اتحرك واشيل رجلى من ع الفرامل بسمع صوت خفيف من تحت زى مايكون تزييق من الفرامل ؟؟
اسف ع الاطالة ..
