تقيمي لاسبيرانزا 516 بمنتهي الامانه و الحياديه ( ادخل مش هتندم )
العربيه كانت موديل 2009 و عامله 15000 كيلو و الصيانه الدوريه في التوكيل
و دلوقتي هقول علي تقيمي للعربيه بمنتهي الامانه و الحياديه
طبعا انا مش هتكلم عن اي حاجه زوقيه زي الشكل او او او
انا هتكلم عن الاداء من جميع الجوانب و يالا نبتدي
بسم الله الرحمن الرحيم
1- الباور : الباور ناعم جدا لدرجه اني كنت هخيش يعني ناعم زياده عن اللزوم و الباور كهربه علي كلام صاحبها و في اي حوادات يمين او شمال بيبقي في صوت تزيقه بسيط هتتعود عليه
2- الفتيس : الفتيس ناعم بس في صوت حكه بلاستيك اثناء نقل الغيارات و لازم تدي الغيار حقه تالت و متلت يعني تنقل علي 3500 ار بي ام علي الاقل عشان السحب يبقي كويس
3- الدبرياج : الدواسه تقيله عشان هي كهربه علي كلام صاحبها و اخده مشوار طويل لتحت يعني مينفعش حد قصير يسوق العربيه دي و دي وجهه نظري
4- التكييف : التكييف اداءه كويس جدا بس مش زي تكييف اللانوس او الفيرنا و طبعا ممكن تظبط درجه الحراره اللي انت عايزها يعني دلع من الاخر
5- السنتر : السنتر بيقفل لوحده اول ما العربيه تعدي ال 40 و بكده العربيه متأمنه كويس
6- الفرامل : بصراحه الفرامل كويسه جدا بس برضه اخده مشوار لتحت اوي و حبيت اعملها اختبار صغير اني جريت و جبت ال 60 و فرملت مره واحده و العربيه وقفت و مزحفتش بس حسيت بحديد بيحك في بعضه و طبعا ده ال ايه بس اس يعني العربيه متأمنه كويس
7- حزام الامان : تقريبا الحزام ثلاثي نقط التثبيت انا مخدتش بالي بس بصراحه ساعه الفرمله كان لزقني في الكرسي يعني الحزام ادائه كويس جدا
8- العفشه : لما جيت اطلع علي مطب سمعت صوت تزيقه كده و في النزله من علي المطب برضه بس العفشه بصراحه كويسه جدا لا هي ناشفه اوي و لا طريه اوي زي عفشه الفيرنا و اللانوس و تعمدت اني اخد حفره صغيره برضه العفشه كانت كويسه جدا
9- الثبات : اخدت ملف بسرعه العربيه كانت ثابته بشكل كويس و طبعا افضل من الفيرنا و اللانوس في موضوع الثبات ده
10- السي دي بلاير : نوعه كلاريون و السماعات صوتها مش نقي اوي بس شغال مش وحش يعني
و ده تقيمي للعربيه بمنتهي الامانه و الحياديه
و دي نصايح صاحب العربيه لاي حد عايز يشتريها
1- اشتري العربيه من التوكيل بلاش من المعارض
2- تفحص العربيه حته حته كأنك بتشتري مستعمل بالظبط
3- تجيب حد معاك و انت بتستلم و يكون بيفهم في العربيات
و في خلال ال 1000 كيلو الاولانين هتعمل التالي :
1- مش لازم تجيب ال 1000 كيلو في وقت قياسي خليك براحتك و محدش مستعجلك
2- متعديش ال 80 باي حال من الاحوال
3- مفيش حاجه اسمها سفر خالص بالعربيه دي و خصوصا في ال 1000 كيلو الاولانين
4-تاخد المطبات براحه جدا و بلاش تاخد عزر او حفر او او او
و لما تعمل ال 1000 كيلو هتروح التوكيل و تغير الزيت بزيت موبيل ال 3000 كيلو و طبعا الفلتر هيتغير و العفشه لازم تربطها و اظبط زوايا و رصص ان امكن و بعد كده عيش و ادعيلي
و في النهايه احب اقول حط بنزين 92 من بنزينه محترمه و يا ريت كل كام يوم تبص بصه علي زيوت و سوائل العربيه و لو انت فاضي انزل علي الحرفيين و ربط العفشه كل فتره كده
و يا رب يكون موضوعي ده افاد الناس و اي سؤال انا موجود
