من حلمية الزيتون للهرم

**abo_lamar** · 15-01-2010 10:10 PM

السلام عليكم يا شباب
كنت عايز اعرف اقصر طريق من حلمية الزيتون لغاية أهرامات الجيزة وبرضه ملش كنت عايز أعرف ازاي اروح المريوطية من حلمية الزيتون ؟

**amrfox2002eg** · 15-01-2010 11:16 PM

السلام عليكم
حبيب قلبى كيفك
هافترض برضه انك فى شارع سليم الاول هاتخد الشارع لأخره عند قصر الطاهرة يمين وتلف من تحت الكوبرى وترجع تانى على اتجاه شارع جسر السويس عند اشارة جسر السويس هاتخش يمين وتمشى فى شارع جسر السويس فى اتجاه حدائق القبة عند مسجد جمال عبدالناصر شمال فيمين كده انت رايح فى اتجاه العباسية هاتعدى من تحت النفق عند جامعة عين شمس وتاخد يمينك كده انت فى شارع امتداد رمسيس هاتخد الشارع على طول وعند غمرة هاتطلع طلعة اكتوبر وهاتخد كوبر اكتوبر لأخره على طولللللللل اخره على شكل نصف قوس وهاتمشى على طول يقابلك متحف الزراعة وبعدين كوبرى الدقى هاتطلعه وتنزل وتكمل على طول اخر الشارع يمين فشمال انت كده ماشى فى اتجاه ميدان الجيزة يمينك جامعة القاهرة وشمالك كلية الهندسة وجنينة الحيوانات على طول وتعدى ميدان الجيزة وتخش يمين هاتلاقى الشارع مقسوم 3 تفريعات يمين شارع فيصل الوسط شارع الهرم شمال شارع ربيع الجيزى طبعا هاتخش اللى فى الوسط انت كده فى اول شارع الهرم هاتعدى من تحت النفق وتكمل على طوللللللللللللللللللللللل لللللل هاتلاقى اهرامات الجيزة فى اخر الشارع
ملاحظة: وانت ماشى فى شارع الهرم هاتلاقى مسرح الزعيم عادل امام على يمينك بعد نص الشارع كده وبعديها هاتلاقى كوبرى قاطع الشارع فى وشك وهو الكوبرى الوحيد اللى هايقابلك فى شارع الهرم هو ده محور المريوطية وهى ديه كده ترعة المريوطية اللى قاطعة الشارع تحت المحور

**A.Saad** · 15-01-2010 11:38 PM

اسمحى لى اضيف حاجة يس
ان فى اخر الهرم لو عايز تطلع الاهرامات
هتلاقى الطريق لف يمين اجبارى
هتدخل الشارع ده
وهتلاقى شمال وطوالى
هتاخد شمال هتبقى فى ميدان الرماية وفندق الميريديان شمالك
هنا وانت فى الميدان هتاخد الاتجاه الشمال تانى كانك راجع شارع الهرم - بس حاول تاخد الحارة اليمين
هتلاقى المطلع يمينك