طلب من كل البروتونيه اصحاب الواجا..

يا شباب.. انا بقالى يومين فى قسم المقارنات بشحت حد يقارلنى بين كام عربيه داخلين دماغى كده.. ممكن اجيب حاجه منهم مستعمل.. المهم.. من ضمن العربيات بروتون واجا مستعمل ودى اكتر واحده داخله دماغى.. قلت هيبقا قطع غيارها معقوله وصيانتها ممتازه.. واسمع من ناس كتير انها جامده فى الثبات والسرعه
بس انا سمعت ان فيه مشاكل كتير فى الواجا.. والتوكيل مش اد كده.. قطع الغيار الاصلى غاليه و التوكيل ما بيظبطش العربيات كويس كمان..

فانتو ايه رايكو بحكم التجربه والخبره فى الحوار ده... ده اولا
ثانيا ايه سعر البروتون واجا مستعمل وحالتها ممتازه جدا
ثالثا.. طب البروتون واجا ولا العربيات اللى ف الليسته.. اوبل فيكترا موديل 99-2002.. واوبل كورسا موديلات 2002-2005و سكودا اوكتافيا موديل 99
بيجو307 بس قديمه.. و رينو ميجان .. هما الاتنين موديلات 2002-2004

انا اخرى فى الفلوس ان شاء الله 60 الف.. بزياده او نقصان الفين.. حسب الظروف.. بس هو ده الرينج عموما يعنى

وياريت محدش يقولى جيب رينو لوجان او بروتون ساجا الجديده

مستنى ارائكو.. وياريت محدش يبخل بمعلومه.. كفايه التطنيش بتاع قسم المقارنات:stink[1]:

مع احترامى للجميع طبعا.:vctry:

أوكتافيا 99 ثم فيكترا 2002 ثم واجا أى موديل
بس خلى بالك
لو هتجيب واجا حديثه من 2007 وأنته طالع
يبقى الواجا رقم واحد فيهم (رأى شخصى ميزعلش حد منى ) .

تشكر يا احمد باشا..طب التسعيره بتاعتهم؟؟
وهل الكلام اللى انا قلته عن الواجا صحيح؟؟؟ ولا ايه.. ؟؟
ومعلش طلب سخيف شويه.. لو حد عنده صور للاوكتافيا 99 من جوا عشان عايز اشوف شكل التابلوه بتاعها ومش عارف الاقيه ع النت

اقتباس:

---

المشاركة الأصلية كتبت بواسطة amraction

وهل الكلام اللى انا قلته عن الواجا صحيح؟؟؟ ولا ايه.. ؟؟

---

بص حضرتك أنا عندي واحد صاحبي عيلته عندها 2 واجا 2005, المهم كان من فترة كده عمل بيها حادثة مثلا على 30 كيلو كده ملحقش يقف ورشق في تاكسي. المهم العربية جابت فانوسين اودامنيين وشبكة والكابوت طبعا اطبق شوية.

المهم هو طبعا مش من النوع اللي بيروح التوكيل ويصرف فـنزل جاب قطاع الغيار وسمكر عند ورشة والده كان يعرفها والموضوع كله كلفه بتاع 2000 جنيه...خد بالك إن ده بالفوانيس اللي اشتراها والشبكة.

الخلاصة إن قطاع الغيار موجودة بره التوكيل ورخيصة وممكن ماتعتمدش عالتوكيل فيها.

يا ريت البروتناوية لو أنا بأقول كلام غير صحيح يصححوه.

تحياتي.

انا افضلك الفيكترا ثم الواجا
وبرده الحالة الكويسة والسعر هو الفاصل بينهم
و1000 مبروك مقدما

الاماني حكايه خصوصا الفيكترا
بس الواجا بردو ممتازه الاتنين احلا من بعض

بالنسبه لموضوع قطع غيار الواجا ... الشكل القديم قطع غيارها موجوده فى كل محلات بروتون فوانيس و اكصدامات .... و الموتور موتور لانسر .... يعنى السير و البليه و طقم الدبرياج تجيبه من تحت بيتك لو عاوز !!


انا حقولك رأيى الشخصى ... الافضل انك تجيب العربيه الاحدث , الاحسن كحاله عامه , و الاقل فى الكيلو متر . من العربيات الى ذكرتها

الفيكترا و الاوكتافيا موديلات قديمه ...و سعرها مش قليل ... و الكيلو متر حتلاقيه فى حدود 150 الف .. 220 الف فيما فوق .

بصراحه مايعتبروش صفقه جيده خصوصا و ان تمنهم مش رخيص زى ماقولتك بالمقارنه بالكيلو متر و الموديل ... و توقع ان حيكون فيها مصاريف .

الميجان و ال307 عربيات جميله جدا ...و شيك جدا جدا ... بس خلى بالك انك لو فكرت فى واحده منهم تختار الحاله الممتازه فقط لاغير .... العربيات الفرنساوى " لا تقبل الاهانه و المعامله السيئه "... حتجيب عربيه رخيصه توقع ان ممكن يكون فيها مشكله و لازم تكون حذر فى اختيارك.

بالنسبالى من الاختيارات المتاحه .... بفضل الميجان و الواجا فقط .." شرط الحاله الممتازه " ... بس الميجان الى بحاله ممتازه مش حتقل عن 65 الف فيما فوق .

الواجا ممكن ب 58 , 60 تجيب واحده بحاله ممتازه و كيلو متر قليل .

و برده شوف انتا ايه الى عاجبك اكتر ... اهم حاجه انتا مقتنع بايه ..

كلام استاذ مهاب من الاخر وعلي فكرة اغلب اختياراتك متقربة في اسعار قطع الغيار الخاصة بيهم مع عامل الانتشار ايضا محلات قطع الغيار بس الافضل ليك يكون عربية حديثة واقل في الكيلو متر وفي الاخر هي عملية راحة نفسية اتجاة السيارة النت عايز تشترية وربنا يوفقك في الاختيار المناسب ليك.

لو على الراحه النفسيه.. انا مرتاح ليهم كلهم.. وده اللى هيجننى

الفكترا أسوئهم بالنسبه الى الصيانه وقطع الغيار الواجا صفقه ممتازه وعرببيه بنت حلال

كلام مهاب هو الصح مهاب مش بيتكلم من فراغ اكيد فى تجارب او شاف بعنية الحاجة دى
لائنة طول عمرو كدة بيجيب الحاجة من الاخر ربنا يجعلة فى ميزان حسناتة يارب واحشتنى يا سيدى
وبكدة الرئى الاول والاخير لحضرتك

1- بروتون واجا : الانسب فى رأيى ارخص قطع غيار وصيانه واحسن عفشه و اساسيات ولكن فيها مشاكل تقفيل مقارنة بالاختيارات
2- اوبل فيكترا : عربيه جميله جدا والمانى بس قطع غيار اغلى من الواجا بكتير
3-سكودا اوكتافيا 99 : قديمه قوى وبردو قطع غيار عاليه
4-بيجو 307 : واحد قريبى عمل لها صيانة ال 60000 كلفتو 8000 جنيه وتوكيل وحش جدا
5- ميجان : ماعرفش عنها حاجه الصراحه
وربنا يوفق للى فيه الخير
انا رأيى انسب حاجتين الواجا والفيكترا

اقتباس:

---

المشاركة الأصلية كتبت بواسطة viper911s

كلام مهاب هو الصح مهاب مش بيتكلم من فراغ اكيد فى تجارب او شاف بعنية الحاجة دى
لائنة طول عمرو كدة بيجيب الحاجة من الاخر ربنا يجعلة فى ميزان حسناتة يارب واحشتنى يا سيدى
وبكدة الرئى الاول والاخير لحضرتك

---

ربنا يخليك يا ابو حميد , و انتا اكتر والله يا باشا اتمنى اننا نشوفك فى المقابله الجايه ان شاء الله ... مع انى عارف ان مشوارك مشواااااااااااااااار بس حاول تظبطها .