الموضوع: موضوع مهم للمناقشة .. أرجو من كل الأعضاء قراءته والرد عليه

استاذ ايهاب كلام حضرك جميل و رائع جدا و انا متفق مع حضرتك في الفكرة
بس في حاجة بقي انت الظاهر مش واخد بالك منها او يمكن حضرتك مش عايش في مصر يعني بتعمل بالخارج
ايه بقي الحاجة دي يا استاذ/ ايهاب
ان الحكومة حاليا مش موفرة رغيف العيش الحاف للشعب المصري المطحون و اكيد حضرتك بتشوف في الأفلام المصرية من ايام السادات حتي الآن إزاي ممكن تروح لمخبز عشان تشتري بجنية عيش و ايه اللي ممكن يحصلك في الطابور اللي بيقف بالساعات عشان يشتري عيش اللي الله اعلم هو مخبوز بدقيق ايه نوعة قمح ولا زرة ولا طوب لا مؤاخذة في اللفظ

احنا الواقع بتاعنا حاليا لا يجعلنا نفكر في اي كماليات علي اعتبار ان العربية من كماليات الحياة و العيشة
احنا تنقصنا اساسيات كتيرة جدا زي الصحة و التعليم و الإسكان و غيرها كتير

اما موضوع عربية لكل اسرة فما اظنش ان الحكومة ممكن تفكر فية حاليا

الهند دولة محترمة و عندها ناس بتفكر لمصلحة البلد و بيستغلوا عددهم الكبير استغلال ايجابي مش شماعة عشان يعلقوا فشلهم عليها زي اللي بيحصل عندنا في مصر
يا ريت نكون نص الهند مش زيها

يا استاذ mostafabakry أحب أوضح لسعادتك حاجة ..
انا عايش فى مصر مش بالخارج زى ما انت بتقول ... وباكل العيش اللى بالطوب والزلط بدون دقيق لا قمح ولا ذرة ....
يعنى بالبلدى بعانى من كل المشاكل اللى بيعانى منها الشعب المصرى من مواصلات لإسكان لأزمات تموينية ........ إلخ
وعشان كده باقتراح هذا الاقتراح ....
وبعدين اقتراحى ده عبارة عن عربية صغيرة ابتداء من 660 سى سى ... بيعنى بالعربى موتسيكل متقفل ... يبقى فين بقى الكماليات دى ... واحنا لو ماطالبناش بأبسط حقوقنا ... وقعدنا نقول الفساد الفساد ...الخ ... يبقى خلاص بقى نشوفلنا بلد تانية نعيش فيها .....
ولا اية ؟

!!!

يا حماعة مفيش حد مبيحبش بلده

هوا في حد يعرف يغير امه و ابوه ؟؟؟

كذلك محدهش يعرف يغير بلده و وطنه .....

و اقسي الناس نقدا لمصر هما في الواقع اكثرهم حبا ليها ......

عشان منتهمش حد في وطنيته

استاذ ايهاب انا حاسس ان انت زعلان من كلامي و حسيت من ردك ان انت مضايق من كلامي
بس انا ما اقصدش اتريق علي الفكرة لما بقولك ان انت ممكن تكون مش عايش في مصر
انا و الله بتكلم بحسن نية و انا قلت لحضرتك ان انا متفق معاك بالفكرة و مؤيدها تماما و يا ريت تتنفذ
ولكن انا بقول ان هناك اولويات في الحياة
استاذ ايهاب جايز وانا و حضرتك و اغلب اخواننا في المنتدي عايشين كويس و عندهم دخل مادي يعيشهم في مستوي محترم و بيفكروا في شراء سيارة عشان تحركاتهم و سفرهم
لكن في ناس كتير مش لاقية لقمة العيش عشان تشبع و للأسف كتير في بلدنا و اكيد حضرتك بتشوف الناس عاملة ازاي في الشارع و بالذات في القاهرة
زمان كان الموظف الحكومي بيقبض مرتب و بيعيش منه كويس و ممكن يدخر جزء منه للزمن او لمشروع اما دلوقتي موظف الحكومة بيقبض 400 -500 جنية مش عارف يعمل بيهم ايه ياكل و لا يشرب و لا تعليم ودروس خصوصية لولاده و لا مواصلات ولا علاج و كشف
انت اكيد سامع علي زيادة الأسعار في كل السلع النهاردة كل شئ زاد الضعف و الضعفين في السعر
و الناس حاليا كل كلامها عن الدعم وهل الحكومة هتلغي الدعم ولا هتسيبة و شوف الجرايد من حوالي 15 يوم حتلاقي المانشيت الرئيسي في كل جريدة بيتكلم عن الدعم و انه لا مساس بالدعم و محدودي الدخل
انا معاك في كلامك اللي بتقولة لكن بعد كام خطوة لازم نعملها الاول
عشان نبقي زي الهند و الدول المحترمة دي لازم نبني اقتصاد قوي اولا و بعدين نشوف موضوع العربيات دا
انا عارف ان العربية صغيرة و اقتصادية بس احنا مش بنتكلم عن عربية ولا اتنين احنا بنتكلم عن ملايين يعني مبالغ كبيرة مش صغيرة

انا معاك ان احنا لازم نطالب بحقوقنا بس لما نيجي نطالب بيها ما نطلبش عربيات و احنا اصلا مش لاقيين ناكل ومش لاقين مستشفيات كويسة و مش لاقيين مواصلات عامة كويسة

اتمني ان حضرتك تتفهم وجهة نظري
شكرا

انا قصدت من كلامي علي موظف الحكومة لان الناس بالرغم من انها موظفة الا انها بتعاني الحياة فما بالك في الشباب العاطل اللي معندوش دخل ثابت يعمل ايه بقي