كنت جالس مع زوجتي واذ بها تنطلق في الكلام كعادتها وانا استمع واوميء براسي كما ولو كنت متابع برغم اني مستغرق في قرائه احد المواضيع التي امامي علي شاشه الكمبيوتر
حتي استوقفتني كلمه علقت باذني (فلانه بتقول انا نفسي اسيب خطيبي)
وعندها اصبت بالذهول فلانه دكتوره صيدلانيه ليست ملتزمه بالقدر الكافي علي قدر غير كبير من الجمال و ظروفها الماديه متعثره خطبت منذ فتره الي صديقي مهندس رجل محترم ملتزم جدا كريم بشوش رجل بمعني الكلمه صاحب وظيفه محترمه تدر عليه دخلا يسمح له بعيشه كريمه
وعندها تذكرت عندما سالني صديقي منذ مده عن (فلانه) فعندها سعيت بحثا وراء ادق تفاصيل استطيع ان آتي بها فهي تعمل لدي صديق لي ( صاحب صيدليه) وبعد تمحيص وتفحيص وصلت الي نتيجه اذهلتني انها هي صديقتها اجل انها صديقه اخت زوجتي (دكتوره ايضا) وهنا تحدثت الي زوجتي وبحت لها بما في صدري وانطلقت هي الاخري الي اختها لتسالها عما يخفي عني وتعددت المزايا امامي
(مؤدبه مخطوبه سابقا بنت ناس كويسين دكتوره محترمه) وكما اتاني الكلام ذهبت الي صديقي فرحا واخبرته بما وصلني من حديث (الاختين بالمنزل)
وبعد سؤال بعض اقاربهم وبعض الاصدقاء والجيران
اتخذ صديقي الخطوه الاولي ذهب اليهم وتمت الخطبه علي خير وانتهي الكلام ............
وبعد ماذا بعدها علمت من صديقي صاحب الصيدليه انه شبه طردها من الصيدليه لعدم التزامها بمواعيده وبعض الاشياء والمواقف لا اذكرها
تحدثت الي صديق لي يذهب مرارا الي نفس الصيدليه واتاني بكلمه واحده (الدكتوره فلانه دي تحسها هتموت وهتجوز ديما ضحك هزار الحمد لله انها اتخطبت)
سمعت هذا الكلام وقلت لنفسي وماذا في هذا حتي انا لما اردت الزواج كان تعليق الناس علي بنفس الطريقه (النوبي هيموت ويتجوز)
المهم تخطينا كل هذا الكلام وعدت شهور وبالضبط 8 شهور وبعد ذلك وعلي حين غره استمع الي نشره الاخبار النسائيه واذا بزوجتي تقول
زوجتي-فلانه عايزه تسيب خطيبها
-ليه هو حصل حاجه
زوجتي-ابدا
امال يعني هيا بتدلع
زوجتي-لا اصل حصل موقف وهي بتفكر تسيبه
حصل ايه
زوجتي-مره اتصلت بيه وقالتله اشحن لي وراح شاحن لها بعشره جنيه فهي بتفكر احسن يكون بخيل
(بنرفزه واضحه) بخيل مين اللي بخيل ده بخيل حرام والله دي مخطوبه من كام شهر وعارفه ده مين ودلوقتي بتقول خايفه يكون بخيل ازاي
ده اشتري عربيه 68 الف واداها لاخوه (اوبل)
ده لما البيت بينقص قشايه ممكن يشتريلهم عماره
ده كان بيقول انه بعد الجواز هيشتري عربيه زيرو علشان مش عايز يطلب العربيه كل شويه من اخوه ومش عايزلها بهدله في المواصلات
ده كان بيسالني من شهرين علي مكان كويس يفتحلها فيه صيدليه
وبعد ده كله عايزه تسيبه والله خساره في جتتها
زوجتي-لا ما هي بتقول هو مش بخيل في البيت بس حاسه انه ممكن يطلع كده مستقبلا ثم يعني دي اول مره تطلب انه يشحن لها كان المفروض كارت بخمسين اقل واجب
ياسلام يعني ابو عشره ده كفر وابو خمسين ده اللي عليه العين
زوجتي-والله مش عارف دي هي بترد علي نفسها وبتقول انه من اول الخطوبه عمره ما فتح عليها ابدا و تخيل انه لما زارها في البيت علقت علي الحكايه دي وهو نزل شحن لها بميه جنيه
انا-ولسه عايزه تسيبه
زوجتي-ماهي بتفكر
بتفكر في ايه ياريت تسيبه دي ماتستحقهوش
زوجتي-اصلها بتفكر انها كانت مخطوبه ودي تاني خطوبه ويعني هيبقي شكلها مش ظريف
لاكن قليلي انتي انطباعك عنها ايه
الصراحه تافهه اللي تبص للحجات دي
طبعا بعد المحادثه الظريفه دي انا احترت اقول او لا اقول تلك هي المشكله
صديقي وله علي حقوق هي كانت بتفضفض مع صاحبتها ومستحيل تكون عارفه اني هعرف الكلام ده
المهم حسمت امري واتصلت باخوه وجلسنا في البيت وتجاذبنا اطراف الحديث
خلاصه الكلام انه كان فيه مشاكل كتير وصديقي لا يشكوا احدا ولا ينبس ببنت شفه
وان الاخت الفاضله ارهقته بشويه طلبات في الشقه (وهو علي قلبه زي العسل)
بس فيه حاجه ماكنتش اعرفها
(دي بتحبه)
انا-نعم!!............ مش فاهم
دول لما يتخانقوا ممكن تتصل بيه خمسين مره وهو مايردش عليها
انا-بتتكلم بجد
ايوه دي حتي اتصلت بيا في مره وقالتلي هو معاك علشان تليفونه مقفول وكانت هتموت علشان تكلمه
انا-طيب انت ايه رايك
مش عارف الصراحه هي عملت كام موقف لدرجه انه اشتكي لاهلها لانه كان هيسيبها واهلها بهدلوها
انا-يعني اهلها ناس كويسين
ماهي المشكله في اهلها لو اهلها مش كويسين او حتي بينفضوا كان سابها من زمان اهلها ناس محترمين ومايرضوش بالحال المايل
انا-طيب انت دلوقتي هتعمل ايه
انا هعرض عليه الموضوع بالراحه وهشوفه هيقول ايه
انا-والله انا مش عارف انا محتار بعد كلامك
ده انا اللي في حيره اكتر مااقدرش اقوله يقولها انك انت اللي جبت الكلام ده وفي نفس الوقت ما اقدرش اقعد ساكت
انا-طيب والعمل
مش عارف هحاول اجس نبضه ونشوف
المهم الكلام ده بالليل امبارح ومش عارف حاسس بالذنب اني قلت لاخوه وياريتني سكت