MATRIX 2007 ANY BODY CAN HELP ME

السلام عليكم و رحمه الله و بركاته

بعد السلام أحب أقول لكل أعضاء المنتدى 1000 مبروك على هذا المنتدى العظيم و على المجهود الجبار القائم من جميع أعضاء المنتدى -مش عايز أقول أسماء علشان ماأنساش حد - و على فكرة انا من الاعضاء القدامى لموقع كونتاكت - مش فاكر اذا كان في حد فاكرني - و غبت عن المنتدى لظروف قهرية
- امتحانات و كورسات و مذاكره و وجع دماغ من ده -
عموما انا اسمي أحمد سعد و كنت بشارك في منتدى كونتاكت في المواضيع اللي بتتعلق بعربيات كيا فقط !!!!!!!!!! و السبب بسيط هو أني مؤمن بنظريه في جميع مجالات حياتي وهي إني مبتكلمش غير في الحاجه اللي مبفهمش فيها و ده سبب مشاركاتي القليله - ولا أنا غلطان -

المهم انا طالب في أولى حاسبات و معلومات بالجامعه البريطانيه بمدينه الشروق و عموما انا معايا كيا سيراتو - عربيه البيت - و لكن و أخيرا و بعد طول عذاب قدرت اقتعهم يجيبولي عربيه لوحدي عشان انا كبرت (19 سنه اخيرا ) :lol:
وعجباني موت الماتريكس و ناوي اجيبها
فلو حد عنده اعتراض يقولي عشان ما اخدش مقلب -بس يكون لاسباب معقوله مش يقولي مثلا مفيش مكان للنظاره الشمس -
و لو حد عنده رأي اخر في عربيه تانبه تكون احسن من الماتريكس - مع ابداء الاسباب -و في نفس حدود الفئه السعريه 80000 جنيه متزيدش ملطوش واحد ده انا مصدقت و خليتهم اقتنعوا
وعايز اعرف لو انا دفعت مقمدم 30000 جنيه و قسطت على 3 سنين هيبقى كام القسط لو العربيه ب 80000 ج م
اخر سؤال هو مفيش اخبار عن تغيير شكل الماتريكس
معلش انا صدعتكوا بس انا عايز استريح و ارسى على عربيه
و شكرا مقدما على الردود

الماتريكس عربية ممتازة مفيش منها مشاكل على الاطلاق وكل الناس بتشكر فيها وهى من احسن العربيات فى حدود المبلغ بتاعك بس انا لما جربتها حسيت ان التكييف بتاعها مش قوى اوى بس مش معنى كده انه ضعيف وممكن يكون من العربية الى انا كنت سايقها بس طبعا المعلومة دى ممكن نتأكد منها من بايوو باشا
ولو بتفكر فى عربية تانية فى نفس الحدود يبقى قدامك الياريس و الانسر بس 1300 الاثنين
وفى الاخر الموضوع يرجعلك من حيث ارتياحك للعربية

الماتريكس عربيه ممتازه و هى 1600 cc نفس موتور الألانترا 2006 و الفيرنا ال 1600 و الجتز برده ال 1600 يعنى هو هو الموتور و لكن مغيريين فى شكل العربيه الخارجى .........................
بالنسبه للتكييف فأنا اعتقد ان كل الهيونداى عموما تكييفه قوى و بارد و ممكن الشكوى بتبقى انه عايز يتظبط صح عند صيانه الخمس تلاف و مش كل العربيات كمان و غير كده ماشوفتش اى شكوى منه.
و زى ما قال midzy قدامك الياريس (و دى فى رأيى ناس كتير بتهاجمها فبلاش منها ) و اللانسر 1300 عربيه حلوه برده و بالطبع يابانى بس الواحد زهق من 1300 و طبعا ال 1600 اقوى .
و ربنا يوفقك و اهلا بيك معانا فى بيتك و ياريت ماتقطعش عننا تانى .

a7'ook
Sherif

الماتريكس عربية فى الجون اشترى وانت مغمض

موتور ممتاز وسحبها حلو جدا وثباتها على الطريق رائع حتى فى سرعات مثل ال160 كم/س وصالونها مش هتلاقى اوسع منه ممكن تعمل فيه تقسيمة كورة قدم بدون مشاكل، وبودى من اجمل مميزاته اللى محدش واخد بله منها ان محدش يعرف يقعد عليه

عيبها الوحيد اللى شفته ان نسب تخفيض الجيربوكس قليلة شوية (100 كم/س على 3000 RPM على الخامس)
الى جانب ان جهاز انذارها اللى بيتركب فى مصر عند عشم نوارة ساعات بيعمل مشاكل ، لذلك من الأفضل انك تجيب ام من غير كاسيت ولا انذار وتركبهم انت على مزاجك

مشكلة التكييف عند صاحبك غالبا تنظيف فلتر
اما كلام الاستاذ الكبير سبعاوي فهو صحيح جدا (وده العادي طبعا)

معدش في مشكلة انذار لانها بتنزل من غيره
و موضوع الجير بوكس ده صحيح بس ده مش عيب كبير اوي ده هي كده

العربية فيها اختراعات كتير
عيبها اللي ممكن اقوله عنها بس انها عفشتها بتخبط
يعني ليها صوت

بس و الله اشتري و ربنا يباركلك

اقتباس:

---

المشاركة الأصلية كتبت بواسطة OsKaR

[size=6]
عموما انا اسمي أحمد سعد و كنت بشارك في منتدى كونتاكت في المواضيع اللي بتتعلق بعربيات كيا فقط !!!!!!!!!! و السبب بسيط هو أني مؤمن بنظريه في جميع مجالات حياتي وهي إني مبتكلمش غير في الحاجه اللي مبفهمش فيها و ده سبب مشاركاتي القليله - ولا أنا غلطان -

---

غلطان طبعا يا أبوحميد ههههههههه عشان لو قرأت الجمله دي تاني هاتعرف انك قلت عكس إللي أنت كنت عاوز تقولو لنا
أنا طبعا بهزر معاك

ندخل بقى على المهم

شوف يا سيدي أنا راكب ماتريكس ومش هاوصفلك جمال وروعة العربيه والافتكاسات إللي فيها من أماكن تخزينيه ومساحتها الواسعه وخلافه

لكن العلابيه الماتريكس من وجهة نظري عربيه عائليه ... عائليه.... عائليه جدا كمان ... ومش معنى كده أنها قاصره على الأستخدام العائلي فقط .. لا... بس أنا رايي بما أنك شاب يبقى تركب جين2 (Gen2)

عربيه شبابيه طحن وامكانيتها رائعه وهاتناسبك جدا جدا بروشنتها وشكلها الرياضي الجميل وموتورها الرائع

ودي وجهة نظري لو حبيت تاخد بيها أنا ممكن أبقى معاك عند التنفيذ

وأهلا بيك في أي وقت

ازيك يا احمد
اخبارك ايه
بقالك كتير ما بتشاركش
من بعد الحادثة بتاعت السيراتو
انا مش هاشارك
انا بس قولت اسلم عايك وارحب بيك

كريم

شكرا لجميع الاعضاء و الله انتوا احرجتوني بجمال الرد و سرعته. و ربنا يقدركوا و تخلوا كده المنتدى كله حب و احترام

و شكرا على السؤال يا استاذ كريم منير و ربنا يخليك و عموما انا مقطعتش من المنتدى بسبب الحادثه لكن عشان المذاكره و الامتحانات و اهي هانت و فاضل شهر على الاجازه

عموما انا تحت امر اي عضو في المنتدى في الاستفسارات عن العربيات الكيا بصورة عامه و بخاصه السيراتو

و شكرا ليك يا استاذ بايو ده كان خطأ مني عشان ماراجعتش الموضوع

اقتباس:

---

لكن العلابيه الماتريكس من وجهة نظري عربيه عائليه ... عائليه.... عائليه جدا كمان ... ومش معنى كده أنها قاصره على الأستخدام العائلي فقط .. لا... بس أنا رايي بما أنك شاب يبقى تركب جين2 (Gen2)

---

واحده بواحده و محدش احسن من حد
:wink:
و اي خدمه
و شكرا للاخ سبعاوي و الريس و بايوو و midzy , sh masry

شكرا يا استاذ بايوو على اقتراحك بروتون جين 2 بس انا بالنسبه لظروفي اجد ان المتريكس احسن لأن انا بسافر كتير ده غير اني حجمي ضخم (140 كجم و 185 سم) و بحتاج مخارج كهرباء في السياره
مع ان البروتون 100%

انا لسة شاري متركس من أيام... من الوكيل مباشرة... لاكن لو حد كان كلمني عن الوكيل قبل ما اشتري كنت عمري ما فكرت في الهونداي في مصر ابدا,