اسمحولى انضم الى كتيبة الكارينز فى المنتدى فقد استلمت سيارتى من اسبوع ولم اكمل 1000 كيلو ونظرا لقلة التقارير فى المنتدى عن الكارينز باستثناء التقرير المفصل من الاستاذ الفاضل احمد اسماعيل الذى استفدت منه شخصيا قبل شرائى السيارة فاسمحولى اقدم لكم تجربتى حتى الان-ولا اقول تقرير- مع الكارينز و يشرفنى ان ارد على اى تساؤلات من السادة الاعضاء
لون السيارة بنى جافا او موكا كما يسمونه فى المعارض
الفرش الداخلى بيج والابواب بيج التابلوة اسود
اول شىء فعلته بعد الاستلام تركيب فرش جلد فى قطيفة و بالمناسبة يوجد فرش خاص بالكارينز الكنبة الخلفية مقسومة قطعتين فابريقة وده سعره فى وسط البلد 600 جنيه لكن طبعا سعر مبالغ فيه فسألست فى شارع دمشق فوجدته بالفصال ب 280 هوه هوه
الكاسيت مكتوب عليه كيا لكن طبعا لا يمت بصلة لكيا اداءه جيد لكن جودة التقفيل رديئة انوى ان اغيره قريبا بمشغل dvd بشاشة lcd جارى البحث حاليا
اكثر مايميز السيارة الوسع الداخلى الكراسى الامامية مريحة خصوصا شخص مثلى طوله 190 سم فلاى شخص اخر تكون واسعة جدا كرسى السائق يرتفع وينخفض عن طريق مضخة هواء يدوية فى جانب الكرسى
تجربتى حتى الان ركبت انا و4 اشخاص بالغين و 4 اطفال تقريبا 6 سنين وكلهم مرتاحين (طبعا الاطفال جلسوا على رجل الكبار)
مساحة الشنطة حدث ولا حرج واشتريت دواسة كاوتش للشنطة مخصوصة بسعر 75 ج انصح بها لحماية موكيت الشنطة
نيجى للمهم واللى الكل بيسأل عليه وانا شخصيا بحثت فيه كتير قبل ما اشتريها الا و هو الموتور
السحب بالسيارة ممتاز بالنسبة لحجمها احيانا فى المطالع يتخستع شوية لكن زيها زى اى سيارة اوتوماتيك وهنا تاتى فائدة الستيبترونيك فى هذه اللحظة احول الى المانيوال وانزل بالغيار نقلة فيبدأالسحب بشدة وهناك طريقة اخرى للشد اكتشفتها وهى ان اكبس بنزين بشدة فتنقل السيارة نقلة اقل تلقائيا وتبدأ الشد بسرعة ارجو من مالكى السيارة تجربتها واخبارى بالنتيجة
من الآخر اللى قلقان من حجم الموتور على حجم السيارة لا يقلق بالنسبة لى كنت املك نوبيرا اوتوماتيك 1600سى سى ولكن اداء الكارينز افضل بكثير يعنى حجم السيارة مش مشكلة الاوتوماتيك هو المشكلة واللى عايز يشد يقلب على المانيوال انا عن نفسى راضى عن اداءها جدا وباسبق عربيات تانيه
بالنسبة للعفشة فى الاول كانت ناشفة وبتهبد فى المطبات لكن الحمد لله اكتشفت المشكلة وهى ضغط هواء الاطارات الضغط المفترض للاطارات 32 امامى و خلفى فقمت بظبطه فاكتشفت ان كل العجل منفوخ على 45لدرجة ان العامل قاللى" انا كدة هادفعلك فلوس مش هاخد منك" وضحك وبعدها اصبحت ناعمة و مريحة جدا
الحاجة الوحيدة السخيفة موضوع الريموت فلو كان بها ريموت للابواب لكانت كاملة ولكن ما باليد حيلة
الخلاصة ان
* السيارة فى مجملها ممتازة كسيارة عائلية ولا مثيل لها فى فئتها السعرية
ارجو ان اكون قد افدت بهذه المشاركة وارجو من الاخوة الذين يمتلكون السيارة ان يشاركوا معنا بتجربتهم حتى نستفيد حميعا وساتابع ان شاء الله ما يستجد من تجارب مع الكارينز ومستعد للرد على اى استفسار