الموضوع: نصائح سريعة فى حال الإصابة بألم فى الصدر والاشتباه فى ذبحة صدرية -لا قدّر الله

جزاك الله خيرا يا دكتور علي المعلومات القيمة
لو سمحتلي اضيف بعض النقاط ويا ريت لو حضرتك شايف اي خطأ تصححه

1-ليس كل الم في الصدر يبقي مصدره القلب
الم الصدر له اسباب اخري وان كان اشهرها الذبحة القلبية ففيه بعض الاسباب الاخري مثل
-ارتجاع المريء او ما يعرف ب gastero-esophageal reflux
وده نتيجة ارتجاع حامض الhcl الموجود في المعدة الي المريء والالم ممكن يختفي بتناول ادوية بتقلل الحموضة زي الزانتاك او الفوار البيكاربونات اللي بيعادل الحمض

-مشاكل بالرئة كوجود هواء في الغشاء المبطن للرئة او جلطة في الشريان الرئوي
-امراض القلب واشهرها الذبحة والجلطة
والذبحة تعني عدم وصول الدم لجزء من عضلة القلب لفترة قصيرة نسبيا
اما الجلطة فتعني موت جزء من عضلة القلب نتيجة عدم وصول التغذية الدموية من الشرايين المغذية للقلب(التاجية) وده لمدة طويلة نسبيا
-التهاب غشاء التامور اللي حول القلب او بعض امراض الشريان الاورطي

زي ما الدكتور احمد تفضل ان النترات تحت اللسان(داينيترا) العلاج الاولي الامثل لحالات الاشتباه في الذبحات الصدرية كما انه ممكن مضغ اسبرين اطفال لحين التدخل الطبي
بالنسبة للنيتروجلسرين فده ببساطة بيوسع الشرايين التاجية وده بيوضع تحت اللسان لحين الذوبان ومن الممكن تكراره ان لم يؤتي بنتيجة مع ملاحظة انه ممكن يؤدي لدوخة وصداع كما ان اخده عمال علي بطال بدون وصفة طبية ممكن يؤدي لنوع من تقليل الفاعلية او التعود
بالنسبة للاسبرين فبيستحسن اخد قرص واحد 75 جرام بعد الغدا للي تجاوزوا الاربعين او الناس العرضة للجلطات مع الحرص من اثاره علي المعدة او للي عندهم قرحة بالمعدة او الاثني عشر ممكن يتناولوا ادوية بديلة ولها نفس الفاعلية
مع متابعة شوية حاجات زي
-عدد الصفائح الدموية
-الكولسترول والدهون الثلاثيةوالكولسترول منخفض الكثافة
-ممكن عمل رسم قلب للاشخاص الاكثر عرضة لامراض القلب وده شيء بسيط
-في حالات الاشتباه بالجلطات بعد عمل الاسعافات الاولية بيتم قياس نسبة بعض الانزيمات اللي بتخرجها عضلة القلب لو حصلها تليف ومعرفة وجود جلطة من عدمه
-الجلطة في حد ذاتها ممكن ما يكونش ليها اثار كبيرة لكن بيبقي ليها بعض المضاعفات زي عدم انتظام في ضربات القلب فلابد من المتابعة الجيدة(عدم الاستعجال للخروج من العناية القلبية)
-الايكو او السونار علي القلب من الطرق الجيدة لمعرفة كفاءة القلب والشرايين والصمامات والاطمئنان علي حجرات القلب
-لو فيه دهون في الدم لازم تتخفض كويس سواء بالادوية او بالدايت الصحي مع تقليل كميات الاكل الغير صحي اللي احنا عارفينه(صعب انا عارف)
-الضغط المرتفع لازم يتظبط بالادوية وتقليل الاملاح في الاكل
-السجائر وما ادراكم ما السجائر بتعمل ترسبات علي جدران الاوعية الدموية وتضيق بالتالي الشرايين الرئوية ومن ثم الذبحة تحصل ده غير تأثيرها علي الرئة

2-فيه بعض الحالات القليلة اللي ممكن يحصل فيها ذبحة او جلطة بدون الم في الصدر زي
-اللي عندهم سكر
-كبار السن
-اللي عملوا نقل قلب

3-اخيرا الوقاية خير من العلاج وده مش كلام انشا كفانا الله واياكم الامراض

جزاك الله خيرا

أولا ألف شكر لشكركم ودعائكم ووالله أتمنى ألا يحتاج أحد لهذه الإرشادات أبدا لكن لابد من معرفتها وحفظها بالذاكرة إحتياطا...
بخصوص استفساراتكم فرغم إنى دوما لا أحب أخذ المعلومة إلا من متخصص ولا أحب الحديث فى غير تخصصى إلا إنى مضطرا للحديث وللإجابة على قدر ما أعلم...

المشاركة الأصلية كتبت بواسطة mhoss

ممكن نعرف السبب العلمى للذبحة...يعنى هى عبارة عن تدفق الدم بسرعة و بكميات كبيرة للقلب و لا العكس؟

الذبحة بسبب عدم حصول عضلة القلب على ما يلزمها من دماء تحمل الأكسجين والتغذية لخلاياها
القلب يتغذى بواسطة الشرايين التاجية التى تظهر من الشريان الرئيسى الخارج من القلب (الأورطى) وتدخل القلب مباشرة قبل أى عضو آخر ، هذه الشرايين قد تصاب بضيق أو انقباض (تقلص) أو جلطة لا قدّر الله فتمنع وصول الدم للقلب فيبدأ فى الشكوى بألمه الفظيع بما يمكن تشبيهه بتمزق العضلات فى الإصابات الرياضية ..
وفى هذه الحالة إما أن يزول الانقباض وتعود الدماء لمجاريها أو لا قدّر الله يفقد جزء من عضلة القلب حيويته (جلطة) أو لا قدّر الله يتوفى المصاب.
أسبابها كثيرة وقد أشرت لبعضها فى المشاركة الأولى (الضغط العصبى - السمنة - السكر - الضغط وتصلب الشرايين -..) وأضاف أخى العزيز tabeb التدخين وزيادة الكوليسترول وهما يزيدان من نسبة تصلب الشرايين عموما وانقباضها

المشاركة الأصلية كتبت بواسطة Terrible_DaRsH

شكرا جزيلا دكتور احمد , بس ممكن اعرف تخصص حضرتك , علشان عايز اسال حضرتك كام سؤال معلش ..

تخصصى جراحات الأذن والأنف والحنجرة والرأس والرقبة
وأعمل استشارى ومدرس بجامعة بنها

المشاركة الأصلية كتبت بواسطة karim_monir

الف شكر دكتور احمد واحب اشكرك مرة اخرى امام جميع الاعضاء على كونك سبب في انقاذ حياتي من ازمة قلبية مررت بها
وشكرا جزيلا على المعلومات القيمة
انا عرفتها عملي مش نظري :-)

يافندم أنا أقل من ذلك بكثير وحديثك يعجزنى عن الرد والمستحق الأول للشكر بعد الله هى السيدة حرمك التى تصرفت بسرعة ودقة وحكمة لا مثيل لها

المشاركة الأصلية كتبت بواسطة sh_masry

عندى طب مع افتراض انه مش ذبحه صدريه و المريض افتكرها ذبحه فهل الأقراص ( داينترا 5 مجم ) دى لو اتاخدت ممكن تسبب مشكله لا قدر الله ؟؟
و هل ليها تأثير على القلب فى حاله عدم وجود ذبحه ؟؟
ارجو الرد
و بالذات ان انا ساعات بحس بنفضه قويه فى منتصف الصدر كأنها دقه قلب غير منتظمه و بتجيلى كتير النفضه دى بالذات لما بكون واكل كتير و متقل فى الأكل و بحس ان روحى بتطلع معاها و ايضا انا مدخن شرهه .
و ايه هى الأدويه اللى بتعتبر اسعاف فورى و مؤقت اللى الواحد لازم تبقى عنده فى البيت اتقاء للذبحه او لخبطه ضربات القلب او الجلطه ..............

ألف سلامة عليك أستاذ شريف
فى الطب بناخد بالسبب الأخطر حتى يثبت العكس
فلا يضير لو اعتبر الطبيب أن الحالة ذبحة وهى ليست ذبحة ، فى حين يضير جدا لو اعتبر الحالة شئ آخر وهى فى الحقيقة ذبحة ، لابد من إفتراض الأسوأ حتى يثبت العكس وهذه قاعدة مهمة
ولا ضير من أخذ الداينترا عند الشعور بهذا الألم الذى يوقفك عما تفعل ويستمر ، فالذبحة ليست مجرد ألم لمدة ثانية وتمر ولا ثوانى بل هى أطول من ذلك

الألم الذى تشكو منه ربما يكون له علاقة بإختلال ضربات القلب والتى تسببها أيضا أم الأمراض وهى السجائر ، ويزيد الشعور بالضيق خاصة فى الصدر ما يمكن أن يكون متواجد من إرتجاع فى الحمض المعدى للمرئ

أنصح حضرتك بالكشف عند طبيب متخصص فى اقلب ثم فى الجهاز الهضمى لتحديد هذه الأسباب
وبالنسبة للوقاية فلا تعتمد على الأدوية فى حال عدم إمتناعك عن التدخين مبدئيا وإلا سنكون كمن يحاول ملء كيس مثقوب.

أخيرا أفكر فى البدء فى كتابة مواضيع متعلقة بالطوارئ الطبية على الأقل فى تخصصى كالاختناق وبلع أجسام غريبة فى مجرى التنفس وغيرها تعميما للفائدة وللثواب اكبير فى حال تسبب هذه المعلومات فى إنقاذ حياة.

السلام عليكم ورحمة الله وبركاته
أنا ساعات كتير بيجيلي ألم حاد في منطقة القلب و ساعات بيوصل الألم لمنطقة الكتف فهل دي ممكن تكون ذبحة أو بداياتها و الأقراص دي ممكن تنفع ولا لأ
معلش أسألتي كتير بس اليومين دوول انا قلقان شوية
يا ريت تنصحني أعمل ايه

و شكرا

جزاك الله خيرا

المشاركة الأصلية كتبت بواسطة dr ahmed abdelghany

أخيرا أفكر فى البدء فى كتابة مواضيع متعلقة بالطوارئ الطبية على الأقل فى تخصصى كالاختناق وبلع أجسام غريبة فى مجرى التنفس وغيرها تعميما للفائدة وللثواب اكبير فى حال تسبب هذه المعلومات فى إنقاذ حياة.

شكرا لردك يا دكتور و طبعا بالنسبه للمواضيع المتعلقه بالطوارئ الطبيه دى بتبقى هامه جدا جدا جدا و ياريت يبقى فيه مشاركه من جميع اطباء المنتدى كل واحد فى تخصصه لأنه المواضيع دى ممكن تكون جزء فى انقاذ حياه انسان ............و اتمنى ان يكون هناك قسم للطوارئ الطبيه بالمنتدى حيث ان المنتدى به الالاف الأعضاء و لم يعد بأستطاعه ناس كثيرين الأستغناء عنه و بذلك سوف تصل المعلومات الطبيه للطوارئ لناس كثيرين عن طريق المنتدى................

و لكل اطباء المنتدى الشكر مقدما