الموضوع: الاخوه فى وجه قبلى

بص يا باشا
لو انت رايح شغل و ملتزم بمواعيد يبقي خليك بعيد عن القطر تماما او انك تسافر قبل ميعادك بيوم عشان لو اتأخرت و دا الطبيعي مايحصلش مشكلة في مواعيد شغلك
دا غير ان القطر بياخد من القاهرة - نجع حمادي حوالي 8 ساعات لو كان ماشي كويس و دا ما بيحصلش ابدا في الوقت الحالي عالأقل تأخير ساعة علي ادني تقدير و احسن الظروف
و بالنسبة لتذاكر النوم تمنها 240 جنيها لأننه بيقطعلك من القاهرة لأسوان
الطيران افضل و اسرع ساعة من القاهرة - الأفقصر و السعر حسب الرحلات و مواعيدها يعني معاك من 200 جنيه لغاية 600 في نفس الرحلة

انت ممكن تديها علي توماس كوك و هما عندهم افضل اسعار للتذاكر

بعد ما بتنزل الأقصر فيه عند اكتر من حل
اولا المسافة 120 كم من الأقصر لنجع حمادي يتاخد حوالي ساعتين و نص عشان الطريق فيه كماين و قرف كتير
الحل الأول : تاخد عربية من التاكسي اللي واقف في باركنج المطار و دول بيبقوا حرامية و بيضربوا في لسما يعني ممكن يقولك 200 -250 جنيه عشان يوصلك نجع حمادي مخصوص نت ممكن تنزل معاه لغاية 120-130 بالكتير

الحل التاني انك تركب عربية ميكروباص من موقف الأجرة بجوار المطار مش بعيد يعني انت تطلع برا المطار و تسأل اي حد علي مكان الموقف هيقولك تركب سرفيس بيعدي من جنب المطار بيروح الموقف و في الموقف هتركب العربيات اللي بتروح نجع حمادي و الأجرة علي ما اظن 5 جنيه يمكن زادت بقت 6 ولا 7 بالكتير

بس ليا سؤال تطفلي شوية لو ميضايقش حضرتك
هو حضرتك رايح شغل في نجع حمادي نفسها ولا رايح مجمع الألومنيوم و لا محطة كهرباء نجع حمادي 500 ك ف ؟؟؟؟