حد سمع عن حساس فى الميجان اسمه حساس اكسجين؟

وحوش الميجان
حد سمع عن حساس فى الميجان اسمه حساس اكسجين؟
ولو فيه.....بيعمل ايه وبكام واعراض عطله ايه؟

بصراحة ماسمعتش عنه قبل كده
فى انتظار أراء باقى الوحوش

قصدك حساس الهوا

على حد معلوماتى هو حساس الشكمان وده تمنه عندى فى اوبل أسترا 1100 جنيه من التوكيل و من عند الشيخ هيثم اللى فى الحرفيين مستعمل تمنه 250 جنيه

بس على فكره هو لسه بايظ عندى و ماغيرتوش لانه مش مزعلنى فى حاجه مجرد أن لمبه الشك انجن بتنور لما ادوس بنزين دفعه واحده بس غير كده العربيه ماشيه زى الفل و الحمد لله

حساس الاكسيجين هو فعلاً حساس الشكمان ، و أكيد موجود في الحرفيين ، بس عمره لو مستعمل مش بيكون طويل ، لكن للأسف مفيش عندي فكرة سعره جديد كام ، أكيد واحد من الوحوش عارف و دلوقتي هيفيدك

طيب هو لما بيبوظ بيأثر على العربية ازاى؟
هل ليه تأثير على تجميع العربية؟ فى السحب يعنى

أنا كان عندى عربيه جيب وكان فيها حساس اكسجين وكان خاص بالمرتفعات لآن المناطق المرتفعة الإكسجين فيها بيبقى اقل فهو يظبط نسبة الهواء والبنزين للعربيه علشان متحرقش بنزين كتير وعموماً ماكانش ليه لازمه لأن مصر مافيهاش مناطق مرتفعة أوى.

اقتباس:

---

المشاركة الأصلية كتبت بواسطة amadios

أنا كان عندى عربيه جيب وكان فيها حساس اكسجين وكان خاص بالمرتفعات لآن المناطق المرتفعة الإكسجين فيها بيبقى اقل فهو يظبط نسبة الهواء والبنزين للعربيه علشان متحرقش بنزين كتير وعموماً ماكانش ليه لازمه لأن مصر مافيهاش مناطق مرتفعة أوى.

---

معلومة حضرتك فيها جزء كبير سليم ، و لكن فيه إضافة بسيطة .. حساس الاكسيجين فعلاً وظيفته إنه يحدد نسبة البنزين في خليط الهوا و البنزين إلي داخل المحرك ، و دة عن طريق إنه بيقيس كمية الأكسجين إلي خارجة مع العادم ( عشان كدة إسمه حساس شكمان ) ، لو فيه أكسيجين خارج مع العضم يبقى الحريق زايد هوا يبقى يزود البنزين و يستفيد أكتر من أداء المحرك ، و يفضل يضبط في نسبة الخليط لحد ما يبقى مناسب عشان كمان تقليل عملية التلوث .
الكلام دة بيحصل دايماً مالوش دعوة بالمرتفعات و لكن فايدته في تقليل التلوث و تحسين أداء العربية و الإستفادة القصوى من البنزين و تقليل الإستهلاك

شكرا يا رجالة على المعلومات المية مية
وانا هكشف على الحساس ده واقولكم الاخبار

طيب حد يعرف ده موجود فين الحساس ده اصل انا بقالى مدة بشم ريحة زى ما تكون بنزين نئ الصبح ممكن يكون من الحساس ده يا استاذ فرحات
نى لما اشتريت قاعدة الشكمان الراجل قالى فيها حساس

الف شكر لحضرتك farahat على معلوماتك الغزيرة

اقتباس:

---

المشاركة الأصلية كتبت بواسطة د.محمود صلاح

الف شكر لحضرتك farahat على معلوماتك الغزيرة

---

العفو يا دكتور ، لا شكر على واجب ، أخجلتم تواضعنا

اقتباس:

---

المشاركة الأصلية كتبت بواسطة abasse

طيب حد يعرف ده موجود فين الحساس ده اصل انا بقالى مدة بشم ريحة زى ما تكون بنزين نئ الصبح ممكن يكون من الحساس ده يا استاذ فرحات
نى لما اشتريت قاعدة الشكمان الراجل قالى فيها حساس

---

باشا ، عادةً بيكون فيه حساسين في الدايرة دي واحد قبل علبة الكاتاليزر و واحد بعد العلبة ، و في النظام القديم كان في واحد فقط بعد العلبه ، و أظن هو دة المقصود في كلام حضرتك

اقتباس:

---

المشاركة الأصلية كتبت بواسطة farahat

ا
باشا ، عادةً بيكون فيه حساسين في الدايرة دي واحد قبل علبة الكاتاليزر و واحد بعد العلبة ، و في النظام القديم كان في واحد فقط بعد العلبه ، و أظن هو دة المقصود في كلام حضرتك

---

أشكرك جدا يا أستاذ فرحات على ردك
بس أنا لما رحت أركب قاعدة الشكمان الميكانيكى قالى مفيهاش حساس ولا حاجه تفتكر هو ده سبب الرئحة ولا
ممكن الموضوع يكون ليه علاقة بالبوجيهات أو الكويلات

اقتباس:

---

المشاركة الأصلية كتبت بواسطة abasse

أشكرك جدا يا أستاذ فرحات على ردك
بس أنا لما رحت أركب قاعدة الشكمان الميكانيكى قالى مفيهاش حساس ولا حاجه تفتكر هو ده سبب الرئحة ولا
ممكن الموضوع يكون ليه علاقة بالبوجيهات أو الكويلات

---

الحساس دة مش بيشتغل غير لما العربية تسخن و حضرتك بتقول إن الريحة دي بتطلع في الاول خالص ، يبقى أكيد سبب أخر ، و غالباً السبب إن الرشاشات دي عايزة تتعاير ، الحل الامثل انك توديها التوكيل و تخليه يحطها على الكمبيوتر و يعمل معايرة للرشاشات ، أو يكشف ليك على الدايرة لأن في أسباب كتير تانية ممكن تسبب الحريق الغير جيد ذي حساس الحرارة أو غيره

الف شكر لحضرتك يا أستاذ فرحات على ردك