زيارة الى كيا ابورواش لصيانة ال 1000 كم سيراتو .....sx
امبارح حجزت علشان صيانة ال 1000 و كان معادى الساعة 9:30 و الطريق ماشاء الله كان زى الزفت بسبب الامطار و مش عارف ليه تانى , المهم وصلت الساعة 10:35 و كان دور عربيتى رقم 14 .
قلت استغل الفرصة لغاية اما حد من مهندسين الاستقبال يستلم منى السيارة و سألت على المهندس خالد فاروق و قابلته و قولتلوا انا عضو فى نايل موتورز و حبيت اشكرك على المجهود اللى بتعملوا معانا , رد عليا قالى احنا بنهتم بتوجيهاتكوا و قولى بقى فين الاستيكر – انا مكنتش اعرف موضوع ال 10% التخفيض ده- المهم بلغتوا تحيات الاعضاء و شكواهم من الصيانة فى فرع روكسى قام اعطانى نمرة واحد اسمه المهندس وائل و قالى قولوا على كل اللى انتا عايزه بخصوص الشكوى من فرع روكسى .
بخصوص العربية بقى انا العربية عندى كان ال acceleration على الترس الرابع بطئ للغاية فبلغتهم و قالولى قدامك حوالى ساعتين . غادرت مركز الصيانة و فى اقل من ساعتين لقيتهم بيكلمونى ان العربية خلصت.
وصلت مركز الصيانة على 2:20 لقيت العروسة – قصدى العربية بتاعتى –ما شاء الله منورة بعد الغسيل و خرجت بيها بعد دفع 268 جنيه مقابل زيت و فلتر و قولت اجرب السحب لقيتوا احسن من الاول كتير و لقيتهم شدوا فرامل اليد بقت اقوى من الاول .
الحمد لله كان اختيار موفق بشراء الكيا سيراتو و موفق اكتر بسبب كفاءة خدمات ما بعد البيع.
الف شكر فريق صيانة ابورواش و خصوصا المهندس\ خالد فاروق و بالتوفيق دائما ..............
