حادث أليم ... قدر الله و ما شاء فعل ..
السلام عليكم ...
قدر الله و ما شاء فعل ... يوم الجمعة اللى فات صباحا ... ميكروباص الله يهدى السواق بتاعه بياخد غرزة عشان يلحقنى قبل ما اكمل اليوتيرن مالحقش يلم نفسه راح خبطنى من الخلف طلعنى على الرصيف و دخلنى فى عمود نور ...
طبعا كلنا عارفين سواقين الميكروباصات بقوا عاملين ازاى ... المهم انا اتلخمت فى مراتى و بنتى و هو فر هاربا ... بس حيروح فين من ربنا ...
ولاد الحلال اللى لسة موجودين و الحمد لله ... ساعدونى و زقولى العربية و ركنوهالى على جنب لحين تحديد الخسائر ... المهم الاطمئنان على الاسرة أولا ...
الحمد لله إنى بإلهام من ربنا كنت مقعد مراتى و بنتى (سنة و نص) فى الكنبة الخلفية ... و ده اللى قلل الصدمة عليهم ... مراتى حامل و ما كانتش تقدر تربط الحزام ... دعكم من إن الحزام الأمامى مش شغال اصلا ... الخسائر البشرية خدوش بسيطة و بعض الكدمات عند مراتى نتيجة اصطدامها بالكرسى الامامى من الخلف ... و الحمد لله على كل حال ...
بالتشاور مع سيادة العقيد خالد ... اللى مشكورا عرض عليا خدماته و فتح خط ساخن معايا للاطمئنان على سير الاحوال ... بدأت أحدد اتجاهاتى و قدرت اخرج من صدمة الموقف ...
و بدأ حصر الخسائر ...
العربية رينو كليو 2008...
اخدت العربية على كساحة و نقلتها على سمكرى معرفة واحد صاحبى فى شارع 3 متفرع من شارع 45 ... اسمه عصام ... فوجئت من كمية العربيات الجديدة اللى شغال فيها و شكل شغله كويس ... بس مش حاقدر احكم عليه الا لما اشوف حيعمل ايه فى الجثة اللى رايحاله ...
أولا: الجزء الحلفى:
الشنطة اتطبقت طبعا ... بس حجم الضرر مش على قدر قوة الصدمة لأنهانقلت كمية الحركة بمنتهى الأمانة لباقى العربية مما أدى لطيرانها فوق الرصيف و اصطدامها بالعمود ... الفوانيس سليمة تماما و الاكصدام اتحرك من مكانه و مش محتاج شغل كتير ...
ثانيا : المأساة الحقيقية فى الركن الأمامى يمين ...
1- الاكصدام الأمامى اتقطع هو و قاعدته البلاستيك ...
2- اعوجاج فى الوش الداخلى ...
3- كسر قاعدة الموتور ..
4- تدمير الدينامو ..
5- كسر وصلة التكييف و بالتالى هروب كل الفريون ..
6-كسر الفانوس الأمامى يمين ..
7-الكبوت الأمامى اتطبق بشكل خفيف ...
8-تدمير رولمان بلى شداد سير الدينامو
9-قطع سير الدينامو
10-اعوجاج غطاء الموتور السفلى ...
11-سقوط الجيربوكس ...
12-كسر شداد يمين ...
بالنسبة لأعمال السمكرة ... السمكرى وعدنى انى مش حاغير اى حاجة الا الفانوس ... و بدأ بمساعدة الميكانيكى يشد الوش المعجون بعد ما الميكانيكى فكله الاجزاء المتضررة عشان يعرف يشتغل ... و كل الشغل حيكون رد على البارد أو الساخن ... و شغل الفيبر كله تمت لحاماته و جاهز على التركيب ...
بيقول انه حيسلمهالى جاهزة على الدهان يوم السبت ... اما نشوف ...
المشكلة الحقيقية هى الجزء الميكانيكى ... و خصوصا قاعدة الموتور و الدينامو ... دول اللى انا دايخ عليهم من يومين مش لاقيهم ... حتى استعمال خارج ... الميكانيكى قالى ان قاعدة الموتور (الومنيوم بالمناسبة) ممكن تتلحم بالليزر ... عشان ما يكونش فيه سخونية تضعف البناء الداخلى بتاعها ... قالى بس خلى ده حل اخير لو ما عرفتش اجيب قاعدة تانية ...
مرفق لحضراتكم صور للحادثة و الأهم من ده صورة قاعدة الموتور لو فيه حد يعرف ممكن اجيبها منين هى و الدينامو ارجو ان يتكرم بالتوجيه ...
شكرا جزيلا لمتابعتكم ... و ربنا ما يوريش حد اى حاجة وحشة ...