اغرب موقف شوفته في حياتي

كنت مسافر من فتره و حصل معايا موقف عجيب و غريب المهم كنا اتنين انا و واحد صاحبي و راكبين العربيه بتاعته و طبعا صاحبي هو اللي سايق و كنا دخله المغربيه كده و احنا مروحين علي بورسعيد المهم دخلنا علي كمين اول مره اشوفه في الحته دي موجود قبل مدخل بورسعيد المهم الظابط سأل علي الرخص و البطايق و خلي صاحبي يفتح الشنطه و كانت مليانه بضاعه متخافوش دي شويه فلاشات
الظابط قاعد يتفحص و يتمحص في قلب البضاعه و انا قاعد ببص في المرايه بعد ما قفل الشنطه اتلاقي عربيه نقل بمقطوره داخل علي الكمين بسرعه و انا اقول هيهدي هيهدي اهه ده لو زود سنه هيخش فينا و هيخش في الكمين كله العربيه جايه بسرعه فجأه اسمع صوت الفرمله عشان البيه السواق مش عارف ان في كمين هنا و شكله اول مره يسوق في حياته علي طريق سفر العربيه وقفت مفيش سنتيمتر بينا و بينه طبعا انا قولت خلاص احنا اتهرسنا بسبب الغبي ده و لما وقف نزلتله و انا ناوي ادفنه في الطل الصراحه قالي بالحرف قبل ما انطق بكلمه " معلش يا ابو الكباتن اصل فرامل الاتوميبل بعافيه شويه " ايه ؟ ازاي ؟ و كان لسه هيحكي اتلاقيت الظابط بيمشيه و خلاه يجيب الرخص بتاعته طبعا طلعت من الكمين دمي ناشف طبعا ركنا علي جنب لغايه من ال ........ ده عدي و احنا فضلنا ماشين وراه احسن ما يكون ورانا و لا ايه ؟
انا كنت ناوي اشد رشاش من العسكري ال........* اللي كان واقف جنب الظابط زي فيلم واحد من الناس و اقوم ضارب السواق ال ........ ده بالنار و الله
فبالله عليكوا هتعملوا ايه لو كنتوا مكاني ؟

دي غلطة الظابط مش سواق النقل مش من حقه يعمل كمين يعرض حياة المواطنين للخطر علشان خاطر حضرته بيدور على 10 ولا 20 جنيه اتاوه

الكمين لية قواعد واسس لازم يتبعها فى وضع الاكمنة وهل هو كمين شرعى ةمستوفى الشروط ام بخصوص النقل طبعا هما بيسوقو فترات طويلة بتخلى ردة الفعل بطيئة نسبيا ربنا يكون فى عونك

اقتباس:

---

المشاركة الأصلية كتبت بواسطة memo_p910

دي غلطة الظابط مش سواق النقل مش من حقه يعمل كمين يعرض حياة المواطنين للخطر علشان خاطر حضرته بيدور على 10 ولا 20 جنيه اتاوه

---

احلى كلام ميمو

بس اقولكم انا موقف بقى جامد اوى

كنت راجع من بلطيم ايام التكليف راكب بيجو اجرة 7 راكب وماشيين ف امان الله وبعد كوبرى رشيد الرابط بين البحيرة وكفر الشيخ يعنى ف اول البحيرة كدة فجاة ظهر اتنين عساكر مرور وجروا وقفوا ف وسط الطريق والله مرة واحدة وبيشاوروا للعربيات تقف .. طبعا عربينا وقفت اول واحدة ووقفت كمان على يمننا عربية وعلى شمالنا عربية ملاكى يعنى التلاتة تقريبا قفلوا الشارع اللى هو تقريبا 3 حارات وفجأة سمعت صوت ارتطام قظيع والله كانة ف العربية اللى راكبنها .. اتضح ان فيه حد سايق بسرعة ونازل م الكوبرى بسرعت ولبس ف العربية اللى جنبنا .... العربيتين بقوا سلاطة طبعا ... بس الحمد لله محدش اتعور ....

شوف الكارثة بقى ... جوز البهايم دول راحوا للرجل صاحب العربية اللى خبطت واخدوا رخصة ... والراجل كانت معاه مراتة وكانت مفزوعة ... معرفش هم اصلا وقفوا الشارع لية م الاساس ... السواق بتاعنا قال يمكن لانه اتصور رادار ...؟؟

ما علينا

هى دى مصر يا عبلة

اقتباس:

---

المشاركة الأصلية كتبت بواسطة kimo911

احلى كلام ميمو

بس اقولكم انا موقف بقى جامد اوى

كنت راجع من بلطيم ايام التكليف راكب بيجو اجرة 7 راكب وماشيين ف امان الله وبعد كوبرى رشيد الرابط بين البحيرة وكفر الشيخ يعنى ف اول البحيرة كدة فجاة ظهر اتنين عساكر مرور وجروا وقفوا ف وسط الطريق والله مرة واحدة وبيشاوروا للعربيات تقف .. طبعا عربينا وقفت اول واحدة ووقفت كمان على يمننا عربية وعلى شمالنا عربية ملاكى يعنى التلاتة تقريبا قفلوا الشارع اللى هو تقريبا 3 حارات وفجأة سمعت صوت ارتطام قظيع والله كانة ف العربية اللى راكبنها .. اتضح ان فيه حد سايق بسرعة ونازل م الكوبرى بسرعت ولبس ف العربية اللى جنبنا .... العربيتين بقوا سلاطة طبعا ... بس الحمد لله محدش اتعور ....

شوف الكارثة بقى ... جوز البهايم دول راحوا للرجل صاحب العربية اللى خبطت واخدوا رخصة ... والراجل كانت معاه مراتة وكانت مفزوعة ... معرفش هم اصلا وقفوا الشارع لية م الاساس ... السواق بتاعنا قال يمكن لانه اتصور رادار ...؟؟

ما علينا

هى دى مصر يا عبلة

---

نفس الموقف الغبي دا حصل معايا كنت علي الطريق الحر اللي هو في مصر اكندرية الزراعي عند كفر الزيات بس ربنا سترها معايا الحمد لله
كنت ماشي ادامي عربيتين واحدة نقل بمقطورة علي اليمين والتانية اللي هي الجامبو علي الشمال وانا ورا الجامبو مستني علي ما الطريق يفتح بينهم واعدي وفجأة وانا عند نص المقطورة كدا والتاني ادامي وراح مفرمل جااامد وانا ورا اخر الفرامل ويادوب العربيتين وقفوا وبيني وبينه مفيش ربع متر بالظبط واتاري امين شرطة طلع معرفش منين بيوقفوا عشان يوقفني رادار ولا اراطيس ولا حواجز ولا اي حاجة تبين ان في كمين ولولا ستر ربنا كان زماني لبست فيه
فعلا شوية اغبية ميتقالش عليهم غير كدا
يعني عشان ياخدوا مخالفة 150 جنيه ممكن يعملوا كارثة علي الطريق

ربنا يكرمني و اهرب بره البلد بالجولييت هههههههه

انا مستغرب إنك فضلت قاعد فى العربية وانت شايفة جاي عليكم بسرعتة

منزلتش لية وقفت بعيد ؟

امبارح وانا راجع من الشغل حوالى الساعة 2 بالليل كان فى مطب على الزراعي وانا واقف عندة وكل التريلات اصلا بتبقى طايرة ، مش عارف لية كنت عمال اتخيل إن الموقف بتاعك دة بيحصل معايا وبفكر هعمل إية لو حصل فعلا

وحصلت مرة مع والدي كان فى طريق الغردقة ماشى فى وسط عربيات كتير طابور وخرج من الطابور علشان يعديهم شوية بشوية وشاف فى المراية وراة اتوبيس كبير جاى طايرر راح راجع للطابور تاني بسرعة والأتوبيس عدى من جنبة وراح راكب فوق عربية بيجو 7 راكب مساويها بالأرض وعدي من فوقها :s

ربنا يسترها معانا ومعاكم ومع المسلمين

ربنا يستر ..........
الواحد مش عارف يعمل ايه في البلد دي ............

هو مش الفرامل اللي بعافية لا كل سواقين النقل دماغهم بعافية شوية

المفروض يركبو جهاز لتحديد سرعة عربيات النقل زي الي بيركب في عربيات السياحة ويكثفو الحملات علي الي بيشربو وهما سايقين لانهم ممكن يموتو حد وساعات بيزنقو علي اي واحدة راكبا عربية يخوفوها وممكن يخلوها تعمل حادثة

قدر ولطف بيك صحيح

الحمد لله
حمد الله علي السلامه

ربنا يسترها معانا ومعاكم ومع المسلمين

مرة من المرات وأنا بمون العربية وواقف بالعربية والراجل بيمون واحد ورايا كان بيزمر معرفش لية , المهم طبعا اديتة الطرشة لان الكابل بتاع البنزين كان واصل بالعربية وهو مصر على انى ادى عجلة قدام , كل دة وأنا جالس فى العربية ولا فى بالى اى حاجة وعمال أضحك علية , المهم الراجل اللى بيمونلى العربية قالة فية اية ياستاذ خش على الماكنة اللى بعدها , المهم هو ادى مارشدير وطلع من على يمينى علشان يمون من الماكنة اللى قدامى , وهو بيعدى جمبى وجدت علامات الغضب على وشة معرفش لية , وراح كاسر عليا ودخل على الماكنة اللى قدام ومكنش ينفع أطلع منة وكان مصر على انة يمون فى الوضع دة , فى اللحظة دية نزلت من العربية وحلفت براس ابويا انوا مش حيمون غير لما يعدينى الاول والرجالة بتوع البنزينة طبعا وقفوا فى صفى

الحمد لله ربنا سترها

ربنا يسترها معانا ومعاكم

تقريبا كل سواقين النقل معاهم جوة الكابينه عدة الشغل وهي جوزة وحشيش وأفيون وسلاح من غير كده مينفعش يطلعوا علي الطريق .. عمرك شفت عربيه مقطوره واقفه تدفع مخالفه رادار ؟؟ بيخافوا منهم جدا .

اقتباس:

---

المشاركة الأصلية كتبت بواسطة tamertamer

الكمين لية قواعد واسس لازم يتبعها فى وضع الاكمنة وهل هو كمين شرعى ةمستوفى الشروط ام بخصوص النقل طبعا هما بيسوقو فترات طويلة بتخلى ردة الفعل بطيئة نسبيا ربنا يكون فى عونك

---

مع حضرتك بصراحه
فعلا في عناصر كتير لازم تتوافر في الكمين
وربنا يسترها

الحمد لله على سلامتك

استرها يارب
ايه المواقف البشعة دي

انا برده حصلي موقف غريب وعجيب جدا ... انا كنت في القاهرة انا و واحد صحبي ومروحين دمياط شئ طبيعي كان عندي وقتها 19 سنة وكان شكلي صغير الي حد ما فكنت بقف كتير في الكماين عشان الرخص المهم وانا مروح دمياط وعلي كمين اللي في مدخل دمياط ظابط وقفني وانا نمري دمياط يعني داخل بلدي قالي مساء الخير رديت مساء النور بكل احترام الظابط يقولي حمد الله علي السلامة قولتلوا الله يسلمك مفيش احترام بعد كده يقولي الرخص اتفضل طب ممكن البطاقة برده بصيت بتعجب اتفضل وصحبك بعد اذنك قولتلوا اتفضل قالي طب ممكن تركن علي جنب قولتلوا حضرتك في حاجة غلط قالي لا ابدا وقفت ونزلت انا وصحبي وقلنالوا في ايه قال دواعي امنية ممكن تفتح الشنطة انا قولتلوا حضرتك ملكش حق تطلب مني كده قالي احنا نيابة ودي دواعي سفر انا قولت هو في ايه امال لو كنا اغرب انا قولتلوا العربية قدام حضرتك ذي ما انت عايز كل ده وانا هادي جدا ومش عاوز اتكلم خالص قالي افتح الشنطة قولتلوا هي مفتوحة اتفضل مسك العربية يمين شمال والشنطة وتحت الدوسات والاستبن كانا تجار واليعوز بالله يعني كل ده وانا واقف جمب العربية بهدوء وبرود وقاعد اقول في سري استغفر الله العظيم بعد مخلص وطبعا ملقاش في العربية حتي عود كبريت مطفي لقيتوا جاي يديني رخصتي والبطاقة و يقولي احنا اسفين وانتوا شكلكوا ناس محترمة انا قلت انا لازم اعمل حاجة مش الراجل ده يحرقلي دمي وسيبوا وامشي قمت انا رديت علي الفور وقلتلوا ممكن اعرف اسم حضرتك ايه ... الظابط اتعجب .... ليه؟؟؟ قولتلوا لا مفيش ابدا انا بس من حقي اني ارفع علي حظرتك شكوة بسبب الاهانة اللي حصلتلنا دلوقتي ..... الظابط وشه بدأ يجيب اللوان ... اهانة ايه ؟!! قولتلوا حضرتك وقفتنا و نزلتنا ومان ناقص تقول لنا بص في الحيط وارفع اديك لفوق والعربيات اللي راحة وجاي تبص علينا كاننا ممسوكين بمخدرات ةتقولي فين الاهانة وحبيت اخوفوا اكتر ف قلتلوا احانا الحمد لله معروفين في دمياط وسمعتنا جيدة والحمد لله وانت تيجي تعمل كده المهم الظابط ولا رضا يقول اسمه وقلب قطة واتفضل ومعلش واللي ميعرفك يجهلك والكلام ده انا ناري اطفت شوية بس قولت برده لازم اطفيها اكتر اخت طبعا الرخص والبطاقة وفوقهم بوسة وقمت داخل العربية وعملت اني بتكلم في الموبيل كل ده وانا لسه واقف جوه الكمين الظابط كان هيروح فيها قام مشاور لعسكري جه يقولي في حاجة يا باشا انا طبعا مبصطلوش وفضلت اتكلم في التلفون و اقول خلاص خلاص حصل خير نعديها المرة دي

المهم انا الحمد لله عرفت ارد كرامتي وبكل ادب واحترام بس اللي انا متعجبله ليه بلدنا ماشية كده ليه مش كل حاجة تمشي بطبعتها الظابط ده مثلا تلقيه كان عايز 20 ولا 50 جنيه ويسبنا نمشي من غر حتي ما يشوف الرخص لكن في الاول والاخر رخصنا رجعتلنا بالاحترام من غير اي وسطة ولا كوسة بس ليه يبق ده حلنا

فعلا احنا المرور عندنا مش مرور مفروض يسموه قرصنة طرق

الحمد والشكر لله علي كل شئ

الحمد لله انك بخير