الموضوع: انا عايز اشترى عربيه صغيره ومش عارف اشترى اسبارك ولا سوزوكى سيلاريو

المشاركة الأصلية كتبت بواسطة superiorboy

بص يا باشا انا هتكلم على البيكانتو و السبارك لأن دول اللي ركبتهم و سقتهم و هقدر افيدك فيهم

نبدأ بالبيكانتو:
عربية تقفيلها محترم جدا و موفرة جدا في البنزين و سحبها ممتاز بالنسبة لعربية 1000 سي سي
تكيفها تحفة بس بيأثر علىالسحب سنة صغيرة يعني بدل ماتنقل على 3 rpm هتنقل على 3.5
ثبات العربية مش هقدر افيدك في اعلى من 80 لأني مجبتش بيها اكثر من كدة و كانت ممتازة
وسع العربية بالنسبة لحجمها معقول
شنطتها ضيقة و ده سبب من ضمن الاسباب لما كنت بفكر اجيب عربية بعد ما فكرت فيها صرفت نظر عنها
الامان بتاعها كويس جدا و ممكن تشوف الكراش تيست بتاعها واخدة تقريبا 3 نجوم بس دي اللي بايرباج و مش موجودة في مصر
قطع غيارها لما سألت عليها اول ما نزلت كانت في المعقول اللي فاكرو كان الفانوس الوراني بحوالي 450 جنيه الاصلي و تقريبا الاكصدام الامامي كان ب600 بس مش متأكد من السعر ده
استهلاك بنزين في البيكانتو و السبارك مفيش تقريبا
قاعدة البيكانتو جميلة و تحس انك مالك العربية من كل ناحية
مرايات البيكانتو الجانبية كبيرة و كاشفالك كل حتة من الطريق بشكل مش طبيعي
الكابوت ضيق و ده ممكن يخلي الميكانيكيا يزودوا مصنعياتهم عليك لو حبيت تصلحها برة التوكيل
الوكيل بتاعها ممتاااااااااااااااااااااا اااااااااااااااز لأقصى درجة و اسعار صيانته مش غالية حتى بعد الضمان ما يخلص
الضمان 5 سنوات او 100000 كيلو و ده اكبر ضمان شفتوا لحد دلوقتي في عربية

نيجي بقى للسبارك و دي باركبها كل يوم تقريبا
العربية في المجمل رائعة بالرغم من اني مكنتش بحبها و حاسس انها عربية لعبة بس بعد ما ركبتها و سقتها فعلا اعجبت بالعربية دي جامد اوي

التقفيل بتاعها ميختلفش عن البيكانتو في الجودة لكن بحس مثلا لو ماشي على الرض مش ممهدة بصوت زنة في التابلوه بس ارجع و اقول دي عربية ب 55000 يعني الخامات مش هتبقى 100% ممتازة يعني
تكيفها بردو حلو بس مروحة دفع الهواء مش قوية اوي فلو عاوز تبرد العربية ترفع السرعة شوية بشوية لحد ما توصل ل 3 و بعدين ممكن تمشي على 2 بس
استهلاك العربية للبنزين مش قادر احددوا بالظبط لكن اللي اققدر اقلهولك بناء على كلام صاحبي اللي هوا صاحبها ان كوباية بنزين بتكفيها و ده شفتو بعنيا دخل البنزينة و باقي ربع التنك و قالو ب10 جنيه 92 يعني حوالي 5 او 7 ليتر و لقيت المؤشر اترفع للنص
نتكلم بقى على ثبات العربية اللي بجد مش فاهمو العربية دي جبت بيها انا و صاحبي 130 و 140 و مكناش حاسين سحبها ما شاء الله عليه تحفة و ثبات مش ممكن لكن يعيبها اثناء الجري ان صوت الهواء و هو بيخبط في العربية عالي قوي فتقفل شباكك و خلاص :)
وسعها مناسب بس البيكانتو اعتقد اوسع شوية ورا لكن قدام ال2 زي بعض
اسعار قطع الغيار اعتقد اغلى من البيكانتو لأني لما سألت في نفس الوقت اللي سألت فيه على اسعار البيكانتو كان الفانوس الوراني سعره في التوكيل 700 جنيه فلتر الزيت بتاعها لسة كنت في صيانة ال5000 مع صاحبي قريب من حوالي شهر كان ب30 جنيه
الامان في العربية دي اعتقد انها واخدة 4 نجوم بس مش متأكد من كدة ممكن حضرتك تشوفو على الeuroncap
سواقة العربية مريحة جدا لكن يعيبها للي اتعود على العدادات قدامو مكان العدادات لأني كنت طول مانا سايق ابص مالاقيش عداد و الوح رقبتي يمين علشان اشوفها
مرايات العربية الجانبية مش حلوة قوي لو قارناها بالبيكانتو لكن كاشفة بردو الطريق
وكيلها للأسف منصور و ده وكيل انا مسمعتش عنو اي خير بصراحة
شنطتها مشفتهاش بالرغم من اني بقالي حوالي 4 شهور بركبها بس ماخدش بالي منها :)

يا رب اكون افدتك و لو بالقليل و اي استفسار انا تحت امرك بس ممكن اتاخر شوية في الرد علشان عندي امتحانات و كدة

ادعولي يا جماعة

شكرا للرد وانا اكيد تعبتك معايا بس انا كمان عندى امتحانات
انت ايه رايك اجيب السبارك ولا اشوف عربيه مستعمله بس موديل جديد فى حدود 55 الف... ... وربنا معاك فى الامتحانات

المشاركة الأصلية كتبت بواسطة superiorboy

اه و نسيت اقلك ان السبارك احتمال ينزل منها شكل جديد السنة دي

انا نزلت وشفتها فى معرض فورميلا الاهرام شكلها عربيه لعبه ومكعبره فى بعضها

المشاركة الأصلية كتبت بواسطة taotao

بالمناسبة كنت في المعرض امبارح والسبيرانزا 113 كانت بخمسين ألف بس. وجديرة بالتفكير برضه.
السبارك أعلى كماليات موجودة في مقابل السعر (باستثناء الاسبيرانزا a113)، يعني ب55 ألف وكمالياتها كما ذكرت لحضرتك، بينما السيلاريو اللي بـ 55 ألف تكييف فقط، والبيكانتو تبدأ من 60 ألف (تكييف فقط)، والألتو بـ 53 ألف موديل 2009 وتكييف فقط.
دي أسعار المعرض امبارح لأني بادور على عربية في نفس السعر .. والله الموفق إن شاء الله

طيب انت هتشتلاى جديد ولا مستعمل علشان مفيش حاجه عجبانى غير البيكانو ومعيش تمنها

المشاركة الأصلية كتبت بواسطة justs

البيكانتو في الفئة دي من احسن الاختيارات

المشاركة الأصلية كتبت بواسطة eng.octooo

البيكانتو عملية والناس هنا بتشكر فيها جدااااا

شكرا ليكم يعنى البكانتو احسن اختيار

المشاركة الأصلية كتبت بواسطة karmouty918

دي من وجه نظري مقارنه سهله اوي لانها محسومه للبيكانتو في كل شيء
1-انضفهم في التقفيل.
2-اكثرهم انتشارا و بالتالي مفيش مشكله في قطع الغيار و الصيانة.
3-احسنهم في التوكيل.
4-السبارك انا شايف ان موتورها ضعيف,السيلاريو محدش لسه يعرفلها حاجة.
5-اوسعهم.

و ربنا يوفقك في الاختيار السليم..

انا كان نفسى حد يقول رايه كده فعلا البكانتو كله قالى العربيه حلوه ومفيش حد قال عنها حاجه وحشه.........شكرا للرد