الموضوع: البلطجة فى السواقة

و الله الأسبوع اللى فات كنت على طريق السويس يدوب بعد الكيلو 4.5 و اشى على الشمال على 60 عشان الطريق كان كله واقف لقيت واحد جاي من ورايا نص عربيته فى الرمل و الزلط اللى بين الاتجاهين و كان على الأقل ماشى على 140 طبعاً عدى من جنبى زى الصاروخ و الزلط اللى طاير بسبب عربيته بهدلى جنب العربية و شرخ وش الفانوس اللى قدام. مكنش فى إيدى حاجة أقولها غير حسبى الله و نعم الوكيل و ربنا بسامحه.

أما معاك فى ان البلطجة فى السواقة بقت حاجة اساسية فى مصر يعنى 99.999% من الميكروباصات و الأوتوبيسات حتى النقل العام ماشيين بإسلوب البلطجة، مبدأ انو معندوش حاجة يخسرها.

طبعاً النقل الثقيل و المقوطرة و حتى ال1/2 و ال1/4 نقل عمرى ما شفت واحد ماشى كويس.

الملاكى و الآجره 95% منهم ماشيين بالإسلوب ده بغض النظر عن الماركة او عمر اللى سايق. يعنى ساعات تلاقى شاب ب بى ام و ماشى كويس و راجل كبير بلادا و ماشى يبهدل فى خلق الله و العكس موجود.

بس موضوع الغرامة ميين حيكون مسئول عنه، المرور، تبقى مصيبة، أنا عندى الوضع اللى موجود دلوقتى أحسن من انى ادى المرور سلطة تحصيل غرامات أكبر من اللى عندهم دلوقتى.

أنا بصراحة شايف الموضوع تربية، يعنى لو كل واحد ربى ولاده على اخلاق السواقة بالوقت الوضع حيتحسن، يعنى مثلاً انا فاكر انو لما والدى كان بيعلمنى السواقة كان بيقعد جنبى و ايده ورا المسند بتاعى و أول ما اغلط على قفاى على طوول, عايز أقولك انو لحد دلوقتى و انا لو جييت أعدى من يمين العربية اللى قدامى بحس ان الضربة جايه و برجع فى كلامى، نفس الموضوع مع استخدام الأشارات و احترام المشاه و السرعة القصوى و لوان موضوع السرعة القصوى ساعات مش محترمه عشان مثلاُ فى نفق الازهر لو مشيت على 40 ولا 50 زى ما المرور بيقول حوقف النفق كله ورايا.

بس مثلاً إيه الحاجات اللى تاخد غرامة عليها:
مثلاً الغرزة ، طب انا كل يوم الصبح بروح التجمع من طريق السويس و الرحاب، المفروض طريق السويس من بعد كوبرى الدائرى 100، ألاقى عربيتين ماشيين على 60 جنب بعض و سدين الشارع معنديش حل غير انى اعمل غرزة بينهم عشان أعدى و لو الكلام ده بره حياخدوا مخالفة على الموضوع ده و انا حاخد مخالفة على الغرزة طب مانا عملت كده بسببهم و هم عملوا كدا عشان........... و حتلاقى كلام كتير و محدش حيقول انو غلطان و المرور حيروح مدفع الكل غرامة.

والله يا جماعه هوا المصري كدا
ميتعلمش غير لما تقرصو في الفلوس

هو احنا هنعالج سولكيات ناس كبيرة وكمان ركبه سيارات
السلوكيات بتتربي فينا من الصغر
وحنا مجتمع الغالبيه العظمي مبيربيش اولادة علي سلوكيات ولا علي اساس ديني
ممكن توعيه للناس في شيء معين اما السلوك فعليه رحمه الله
بلطجة -قله ادب - تحرش - شتيمه في كل حته -استهتار - لا مبالاه .....الخ
والله انا عايز اخرج من البلد ديه باي طريقة
حتي بتوع القانون لا يحترموا القانون
وسلمي علي السلوكيات