فعلا موتور ال ٣٠٥
و على فكره حاجة ال ٣٠٥ مش رخيصه ابدا مقارنة بسعر العربيه
عرض للطباعة
انا عندى بيجو 304
العربيه كويسه
بروح بيها الغردقه ومرسى مطروح وترعه السلام طريق بور سعيد (اصل اخوك غوى صيد سمك)
فمبهدلها معايا فى المشاوير وعمرها معملتها معايا والله العظيم
العربيه من ناحيه التحمل قويه والسرعه معقوله اخرها 120 وممكن لو الموتور لسه معمر ومظبوط تجيب 140 وده عن تجربه حقيقيه
سعرها رخيص عشان مفيش ميكانيكى يحب يشتغل فيها
عشان الحوض بتاعها ضيق ومتكربس كله فوق بعضه
الموتور والفتيس بيتسعملوا نفس الزيت شيرنج بين الاتنين
الفتيس لو باظ بتضطر اتك تحل الوتور عشان هو تحت الموتور
بس ده نادر الحدوث يعنى اناعمرى محليت الموتور عشان الفتيس باظ
المنفول بتاع العربيه مربوط بالماتورعن طريق كاوتش وهو ده المقرف فى الموضوع
انه لما بيملص لازم تغير الكوتش عاشان هيملص تانى وتالت
بس هى ده عيوبها
لكن العفشه تمام جدا
والمساعدين كويسه وممكن المساعدين اللى ورا تغيرهم ببتاعه ال504 اللى بتتملى زيت
واهم حاجه مقاس العجل الاصلى 14/155
عشان العربيه تتوزن معاك صح
الموتور قوته 1288 سى سى
التسارع كويس مش بطال وبتتروش عادى جدا جدا
والعربيه على كوبلن وميزتها ان الكوبلن اليمين زى الشمال
وكمان ماكينه الزجاج عاديه بجناحين اللى يفرق قدام و ورا بس لاكن يمين زى الشمال
الفتيس فى الدركسيون ودى عندى انا ميزه مش عيب اغلب العربيات الامريكانى الحديثه فتيسها فى الدركسيون
الشنطه واسعه جدا والكوتش الاستبن ليه مكان تحت الشنطه
والكبوت فيه مكان لسير الدينامو وطرنبه المياه على فكره طرنبه المياه فيها اتنين سير
و الينامو بتعاها فى منو نوعين الاول بكتاوت خارجى وده منيل بنيله لمابيبوظ ارميه ومصرفش عليه وده فرنساوى والنوع التانى المانى بكتاوت داخلى يعما استيراد فى حدود 150 جنيه وده رائع وممتاز وكفايه انه بيظبت البطاريه
طنبه المياه بتعمل فى حدود 130 جنيه استيراد فرنساوى
الكوبلن لو استيراد ممتاز يعمل 200 اى 250 جنيه ولو متوضب توضيب نظيف من 180 الى 150 جنيه مادون ذلك لاانصحك بشرائه واحسن حاجه وضب الكوبلن لحد ميبوظ تماما
الموتور على كامه واحده 4 سلندر بيتعمله عمره عادى جدا وفى ميكانيكيه بتتدلع بتقولك نغير الموتور لاياكل البنزين والكربراتير باب واحد ولو ليك فى السرعه هات واحد 2 باب بس اهم حاجه اللى بشتغل فى الكرباتير ميحملش عليه بيديه
عشان المنافول لا يملص منك وده لان الكرباتير فوق المنافول ولازم يكون تحتيه خوصه
حديد عشان يحمل عليها
المارش تحت المنافول عاوز كهربائى مويس عشان يفكه من غير ميفك المنافول
سير الكاتينه بتاع العربيه دى داخلى (جنزير) وليه بلف عشان يزيته وده تمنه اوربى جديد 65 السير بالبلف تقريبا
الردياتير نحاس وفيه ناس بتغيره بالالومنيوم والاثنين ممتازين
العربيه مبتسخنش نهائى طول مهيا مظبوطه
الدركسيون تقيل شويه لان مفيهاش باور وعلبه الدركسيون مدوره مش مشط زى 128 او 131
التابلوه جميل فيه عداد سرعه وساعه وطبعا عداد البنزين ولمبه زيت زلمبه البطاريه وعداد سخونه وعداد كيلو متر وعداد تانى كده مش عارف بتاع ايه تقريبا ار بى ام
و ولاعه سجاير وطفايه سجاير ودرج تابلوه ومكان للكاسيت
العربيه من جوه واسعه وجميله جميله بتاعت اسره على حق اجمل من ال128 مراحل
ناعمه على الطريق
ثابته نسبيا
سريعه نسيبا
عائليه جدا
حماله اسيه بدليل انها شغاله من 35 سنه تقريبا
قطع غيارها محتاجه خبره شويه
لازم تحب العربيه دى عشان تعرف تركبها
مصاريفها الناس بتقول انها عاليه بسا انا بقول ان الغالى رخيص قطع الغيار بتعيش بجد
اللى هتصرفه عليه ده لاستعمالك انت يعنى متستناش انك تسترده لماتيجى تبيع العربيه
بتترش عادى جدا وبتتروش حلو جدا والعربيه لىو اترشت حلو والنواكل اتجددت بالكامل وحطيت طاسات نيكل للعجل وتغير الفرش وتركب سماعات حلوه وكاسيت كويس صدقنى هتبقى تمام التمام ومش محتاجه اكتر من كده
يارب اكون افدتك ولو بالقليل
وتقبل مرورى
بصراحه يا استاذ جسوبر انت جبت المفيد ربنا يبارك فيك
يوجد جديد ومستعمل
بس الجديد كله مضروب ونادر
الاحسن هات استيراد بس من حد مضمون فى الوكاله
انا بتعامل مع واحد اسمه سمير العسكرى وواحد تانى اسمه على ليفه
على ليفه ممكن يديك حاجه بايظه لو فاصلته فى السعر لكن لو تعاملت معاه بنزاهه وطبعا دى فيها غرامه جامده هيديلك الحاجه بجد على ابوها مفيش فيها لعب ولا توضيب بس الطاق اتنين او واحد ونص
بالنسبه لى اخدها غاليه بس تكون تمام افضل من اى حاجه تانيه وطز فى الجديد
ومره تانيه متشكر جدا على تعليقاتكم الظريفه كلامن استاذ MEDO84EG و استاذ mman2005 ربنا يبارك ليكوا
رد متميز جدا و نادرا لما بلاقى ردود بالقوة دى و أفادك الله كل خير لأن ناس كتير أستفادت منك و ربنا يجعلة فى ميزان حسناتك
لكن بالمناسبة السريعة بس و لخبرتك عندى سؤالين بس:
هل الأستيشن منها نفس قوة العاديه ؟
و هل ينفع الأوكرة بتاعة الباب تتغير بأوكرة زى بتاعة 305 ؟
الاستيشن ليها نفس القوه
حكايه الاوكره دى بصراحه معرفهاش عشان مبحبش افتى
بس بيتهيالى انه من الممكن عمل اى تعديل انتا عوزوا انا اعرف ناس مركبه ازاز كهربا ومروشاها تروييش بشع لدرجه انك تقرف تركب العربيه ههههههههههههههههه
مباردة جميله منك يا أستاذ كريم على المتابعة و القرارات الجميله دى بس كان يتهئ لى فصل المشاركة بموضوع منفرد بالعضو gsober كان هيبقى أحسن عشان يبقى الموضوع بأسمه و بمجهودة و عشان القارئ كمان يدخل يشوف المعلومات على طول لأن المعلومات كلها فى الصفحه التالتة
طيب والله دى حاجة جميله جدا لأن جاتلى فترة حطيت فى دماغى بيجو 304 الأستيشن عشان أنت عارف حجمها دا أنت لو معاك رحله هتطلع بيها ههههههههههه
و دلوقتى حطيت فى دماغى فيات 132 و مش عارف والله أختار أية دلوقتى لأن الموضوع محير بس يتهئ لى ميكانيه الـ132 أفضل صح ؟
و كمان أنا واحد من الناس لازم الفتيس يكون جمبى مش هعرف أتعامل و الفتيس فى الدريكسيون
موضوع يستاهل التثبيت حقا