عرض للطباعة
دلوقتي الرخص هتنتهي يوم 28 من شهر 5 سنه 2010
فياريت حد يقولي مصاريف تجديد الرخصه بكام
و هل لازم اروح المرور بالعربيه و لا مش لازم
علما باني مرخص سنه واحده و الفحص الجاي يوم 28 من شهر 5 سنه 2012
يا هنا مين يعيش و سؤال تاني معلش
المخالفات اعمل فيها ايه ؟
ايه حوارات التظلم و الافلام دي؟
حد يفهمني بس حوار المخالفات ماشي ازاي
و ازاي اقدر اقللها علي قد ما اقدر
معلش اخوكوا قلقان حبتين لاني مش عايز دوشه علي دخله كاس العالم
العربيه لانوس موديل 99
مش لازم تاخد العربية معاك طالما مافيش فحص
شهادة المخالفات مدتها شهر ممكن تعملها من نيابة المرور قبل ما تروح تجدد , ولو فيه تظلم بيبقى فى نيابة المرور نفسها وبتدخل للقاضى يحكم لك ( بس لو مبلغ المخالفات بسيط ادفعهم وامرك لله بدل وجع الدماغ )
لدكتور محمود قال المفيد
انك هتجيب شهاده مخالفات الاول من النيابه ولو المبلغ كبير هتدخل لوكيل النيابه يخفضه
وبعدها تروح المرور تجدد الرخص بعد دفع الضريبه ( انا معرفش الضريبه كام )
لو لوحك قديمة و مرورك بقى بيوزع لوح جديدة يبقى لازم تاخد العربية عشان هتسلم اللوح و يركبوا لك الجديدة
و ممكن تروح بدري مش لازم تستنى اما تخلص
زى ما الاعضاء الافاضل قالوا لك بالظبط
انت مش هتفحص ....مجرد هتدفع الضريبة و التأمين و تجدد الرخصة سنة او سنتين حسب ما انت عايز
و بالتالى مش محتاج تاخد العربية
الا فى حالة واحدة لو النمر اللى عندك قديمة و المرور بتاعك فيه نمر جديدة ( اعتقد ع شهر خمسة الطبيعى يبقى اى وحدة مرور فيها نمر جديدة)
هتفكها و تسلمها.....و هتضطر تروح بالعربية عشان لازم هما يركبوها
لو عندك نمر جديدة يبقى خير و بركة مش لازم العربية تروح
طبعا اول حاجة هاتجيب شهادة المخالفات....طبعاً قصة الدخول لوكيل النيابة و محاولة تخفيض المخالفات على حد علمى
ما بقيتش زى الاول صعب اوى تعملها....الا لو ليك سكة....ولو ليك سكة و المبلغ مش كبير هتلاقى نفسك بتروح تدفع من سكات
منعاً لتحميل نفسك جميل بدون داعى
اعتقد اللى عايز ينزل المخالفات ...بيعمل تظلم من المخالفات .....و اللى ممكن تكون نتيجته انه ياخد الحد الادنى من المخالفة
انما تتشال لأ...(ده حتى يبقى عيب).....ده اللى اتقاللى من بتوع المرور نفسيهم
معرفش مدى صحته بس اعتقد انه صح
بعض ما تخلص حوار المخالفات ....هتدفع الضريبة و التأمين و تشترى الاوراق بتاعة تجديد الرخصة و بعد كده تروح بيهم
للموظف الطاهر فى الشباك المخصص للتجديد و تكمل اجراءاتك عادى
ملحوظة صغيرة....مافيش اى حاجة من التلاتة مرتبطة بعض...يعنى ممكن تعمل كل حاجة فى يوم و ممكن تعمل اى حاجة قبل التانية
ملحوظة تانية.....انت ممكن تدفع الضريبة فى البوسطة عادى جداً بعيد عن زحمة المرور
و اعتقد التأمين كذلك بس مش متأكد.......تديهم صورة الرخصة و تخلص القصة فى دقيقتين...و بتاخد وصلين واحد اصل تسلمه فى المرور
و التانى صورة.....كأثبات لدفع المبلغ
الضريبة....اعتقد بالنسبة لك هيبقى فى حدود 200 او اكتر شوية للسنة الواحدة
التأمين هيبقى حوالى 70 حنيه للسنة الواحدة
لو هتركب نمر جديدة هتدفعلها رسوم فى حدود 120 يزيدوا او يقلوا....هما المفروض 100 بس ممكن تلاقى حبة رسوم ما تعرفش جتلك منين
طبعاً حسب طريقة تعاملك و معالجتك للامور ..ممكن تضيفلك شوية فكة تحد بند نثريات
فى حاجة مهمة الكلام ده لو الرخصة باسمك .....او باسم حد تانى و انت معاك توكيل منه مباشرة بالتعامل مع المرور
غير كده هيبقى فيه كلام تانى
اى حاجة ذكرتها ....مش قانون و لا كلام مسلم بيه..... ديه مجرد خلاصة اللى سمعته و اللى جربته
ممكن انت ساعة ما تيجى تنفذ تلاقى الدنيا مختلفة شوية انت و حظك
بالتوفيق :vctry:
اخيرا حد جابلي الخلاصه
تسلم ايدك يا ss باشا
و يا ريت لو تقولي
علي الفحص ان عشنا
ان شاء الله
كأني برخص من اول و جديد
و لا ايه النظام ؟
و انا اسف للاطاله علي حضرتك
و ميرسي لكل شخص رد عليا
بجد احنا كلنا اخوات هنا
و انا تحت امركوا في اي حاجه
بص يا فندم ....هو اللى هيفرق ساعة الفحص ان انت الورق اللى ها تشتريه عشان التجديد هيبقى فيهاقتباس:
المشاركة الأصلية كتبت بواسطة romeo_6887
كام ورقة زيادة عشان اجراءات الفحص ده بالنسبة للورق
بالنسبة بقى لعملية الفحص نفسها فاللى بيتم كالاتى :
حضرتك بتاخد العربية و معاك ورق الفحص و تدخل ع الفاضل المأسوف ع شبابه مهندس الفحص
اول خطوة بتتم انه يرفع البصمة للعربية....بمعنى انه بيطبع رقم الماتور و الشاسيه بتوع على
اورنيك الفحص اللى معاك...
بعد كده مفروض انه يتم عمل فحص لحالة العربية بشكل عام
يعنى حالة الجسم من من بره ....الانوار و الماسحات ..العادم ....الخ
بس غالبا اللى معتاد انه بيفحص العربية من بره بس يعنى ما يبقاش فيه خبطات جامدة محتاجة تتسمكر
او فاميه او ....او....
عشان كده هتلاقى الناس بتهتم تظبط العربية من بره قبل ما تفحص
بقية الحاجات ديه حسب ظروفك و حسب المرور و حسب اللى بيفحص !!!
يعنى موضوع فحص العادم ده كان موجود فى مرور الجيزة فى الفترة الصباحية بس
يعنى تروح تفحص الصبح يخلوك ...تفحص عادم ...تروح بعد الظهر ما تفحصش عادم!!!
حالياً لا فى الصبح و لا بعد الظهر....رغم ان فى ورق الفحص فيه ورقة خاصة ببيانات فحص العادم
ما علينا ....خلاصة القصة ان الفحص ده حسب المرور اللى انت فيه
بس القاعدة العامة المعروفة انك لو عايز حاجة فى بلدنا بتعملها طالما عندك الامكانيات!
يعنى ما تستغربش لما تلاقى عربية مدغدغة و بتدخن و معدية ع الفحص
عادى كله بيطلع فى الغسيل!
بس انت طالما عربيتك حالتها كويسة و مافيش فيها خبطات جامدة ...فالموضوع سهل
ممكن بس يسخف معاك شوية عشان تشوفه بحاجة....( بند النثريات اللى قلت لك عليه)..
و ده طبعاً حاجة ترجعلك زى ما قولت لك بناء على تقبلك للموضوع و قدرتك على حل للامور
طبعا فيه حاجة و هى فحص الطفاية...هيبص ع الطفاية اللى معاك مفروض تبقى سليمة و صلاحيتها غير منتهية و بعد كده يختم لك ع الورقة بتاعة الطفاية
طبعا ممكن يستعبط و يقولك ديه قديمة ..و هى جديدة عشان تديله فلوس ...و ممكن واحد يعديها لك و هى قديمة و ما يدقش ....و ممكن تديله فلوس و يعديها و هو مفيش طفاية اصلاً!!
و ممكن تتمسك بحقك و تعمل مشكلة و تاخده
و ممكن يكون المروراساساً مش مشترط وجود الطفاية فى الفحص...بس طبعاً الناس ما بتبقاش عارفة النقطة ديه!!!
طبعاً القصة ديه تنطبق برده ع اى مرحلة تانية ....انت و ظروفك
فيه خمسين طريقة تمشى بيهم مصالحك...بس انا باكلمك ع الطبيعى و اللى مفروض يحصل
و هو انك تبقى داخل مستوفى كل الشروط و محدش يقدر يطلع لك حاجة :S_thum1[1]:
يعنى حقى و حقك
بس طبعاً لما تيجى تفحص كمان سنتين و نص يحينا و يحيك ربنا ...ما تستبعدش تكون الدنيا اتغيرت
يعنى ممكن المرور ساعتها تلاقيهم جايبين منط و يشترطوا انك تقفز قفزة الثقة.....ما تستبعدش
زى ما قال الزملاء لو مش هتفحص ولا هتستلم النمر الجديدة والرخصة بأسمك يبقى مش لازم تروح بالعربية + لو عربيتك 1600cc ترخصها في السنة الواحدة تقريباً 300-310 جنية شاملة التأمين الاجباري والفحص نفس الموضوع بس بيزيد عليها بيرفع بصمة الشاسية والماتور ويشوف في تخبيط جامد في الصاج زجاج فاميه والطفاية والكلام ده نيجى بقى لموضوع المخالفات الجميلة .. اه قبل ما انسى ملحوظة مهمة جداااً لو حضرتك في التجديدة اللى فاتت من سنة كنت استلامت النمر الجديدة (هيه 100 جنية وخمسين قرش بالضبط ثمن النمر الجديدة) وسلمت النمر القديمة لازم تجيب شهادة براءة زمة على النمر القديمة ثاني طبعاً هتقولهم ما أنا كنت جبتها قبل كدة وأنا بسلمها أجبها ثانى ليه!!! هيقولولك عشان ممكن تكون أخدت مخالفة في الفترة مابين اللى طلعت فيها شهادة المخالفات والفترة اللى سلمت فيها النمر وطبعاً هيا بتنزل بعد شهر ولا اثنين فلازم تجيبها معك قبل ماتطلع براءة الزمة بتاعت النمر الجديدة نرجع بقى لموضوعنا بتاع المخالفات لقدر الله المخالفات جات رقم ثقيل فيه ثلاثة اصفار مثلاً نعمل اية؟!!! وخالى بالك هيقولولك المخالفات دى الحد الادنى يعنى هما جيبين من الأخر معك عشان متقرفهمش وتقعد تفاصل طبعاً من حقك تعرف المخالفات دى كانت فين وامتا ونوع المخالفة المهم تعرف المجموع كام ولو انت تابع لمرور القاهرة تاخد بعضك وتروح على مرور الدراسة بس قبل الساعة 12 الظهر عشان تلحق تخلص و هتطلع عند النيابة الكلية للمرور الدور الثاني وتاخد نموذج تظلم للسيد رئيس نيابة المرور وتكتب البيانات ومجموع قيمة المخالفات وتروح الخزنة تدفع 2 جنية وتصور البطاقة الشخصية ورخصة العربية صورة وش وظهر ويستحسن تصورهم قبل ماتطلع عشان متضطرش تنزل تصور وتطلع ثاني، وترجع تسلم النموذج والايصال اللى دفعت بيه وبعد 3 أو 4 أيام تروح النيابة اللى انت تابع ليها تسئل ثاني على المخالفات لو لقيتها اتخفضت يبقى التظلم اتقبل لو زى ما هيه يبقى اترفض لو اترفض قدامك حل من اثنين اما تتدفع وأمرك لله أو بتعمل معارضة ولما بتعمل معارضة بيتحدد جلسة بينظرها القاضى وبيجيب ملف العربية من ساعة ما مشيت في مصر وسجل السوابق بتعها :) وبيقارن قيمة المخالفات بتاعت السنين كلها بالسنة دى لو لقاها مضبوطة وكل سنة بيجى عليك نفس القيمة تقريباً هيشيلك الليلة انما لو في اختلاف كبير هيقول في حاجة غلط وها يحكم بالتخفيض هيه دى القصة ياباشا
طبعا شكر كبيييييييييييييير للاستاذ العظيم ss و الاستاذ نبيل
و ربنا يحينا و يدينا الصحه و يصبرنا علي المرور
و علي فكره انا من بورسعيد مش من القاهره
و ان شاء الحق احوش المبالغ دي قبل ما اجدد الرخصه
ادعولي بالصبر و السلوان
طيب يا جماعة أنا شاري عربية جديد هي نمر جديدة وتتبع مرور شبرا وأنا أتبع مرور فيصل
العربية رخصتها تخلص في شهر 4/2010 ، وفيها فحص لحد 2011
قالو لي إني هروح أنقل ملكية السيارة بس وأجدد الرخصة (من غير فحص) هل الكلام ده سليم واﻻ هعمل فحص تاني زي ما كان في النمر القديمة
شكراً
نقل الملكيه لازم معاه فحص للاسف
متابع ...........
شكراً أخي على الرداقتباس:
المشاركة الأصلية كتبت بواسطة romeo_6887
ومش عارف بقى إيه الفرق بين النمر القديمة والنمر الجديدة ، مع إن اللي فهمته لما عملو النمر الجديدة دي إن تراخيص العربيات هتبقى أسهل
حاجة تجنن :dzey: :B4_592:
يعنى لو عندى مخالفات و عاوز اخفضها لازم اروح الدراسة و للا ممكن نيابة المرور اللى انا تبعة ( مرور مدينة نصر ) ... افيدونى ارجوكم
لو فى حد من الاخوة يعرف حاجة عن مرور العجوزة المتنيل بنيلة ده رحت و لاول مرة الاقي مخالفات عندى اتجاه معاكس فين ؟
فى القليوبية !!!
طبعا فضلت اعصر دماغى ايه اللى تبع القليوبية يمكن رحته الحمد لله افتكرت انها القناطر
المهم فضلت اعصر دماغى امتى تعمدت انى امشي اتجاه معاكس معرفتش خالص امتى مشيت معاكس!!
معرفتش قلت يبقي اكيد كالعادة كان مفيش يافطة تقول ده معاكس ولة لا فدخلت معاكس !!
او يمكن مخالفات جزافية كعادة بتوع المرور الحلويين الطعميين!!
حاولت دخل لوكيل النيابة معرفتش
المشكلة بقي حكاية انها ماشية قاضية يعني ممكن اتأذى فىالشغل بسبب القاضية اللى ماشية و يا عالم حيحكموا بسجن ولة لا فى بلد معرفشش عنها حاجة اخذت فيها اتجاه معاكس و يا ريت فى حالة تلبس لا معرفش اخذتها فين!
و كل المخالفات اللى اعطوها لى مش فى حالة تلبس لكن اكتشتفتها لما عملت شهادة مخالفات
و الاتجاه المعاكس بيكون اغلبه متلبس