تجربة قيادة سيراتو ex موديل 2009
السلام عليكم
نزلت اجازة قصيرة لمصر لزياردة والدى المريض فى المستشفى
ارجو ان تدعو له من قلوبكم بالشفاء العاجل
واجرت عربيه من المطار لمدة 4 ايام
المفروض انى كنت هستلم رينو ميجان ، بس مكنش فيه غير كيا سيراتو
طبعا فى الاول مكنتش مبسوط لانى من محبى الرينو ميجان
المهم العربيه السيراتو كانت موديل 2009 وعاملة حوالى 35 الف كليو
خلال الاربع ايام كنت بسافر كل يوم القاهرة وارجع السويس فقدرت اعرف العربيه اكتر
مواصفات السيارة الكيا
فتيس اتوماتيك
جنوط الومنيوم
مصبايح ضباب
تكييف اتوماتيك
فرش بيج
مسند جانبى بين الكرسين
2 ايرباج
abs
سنتر لوك بريموت كنترول
ازاز كهربا ومرايات كهربا
ده اللى لفت نظرى
داخل العربيه
العربيه فيها وسع ممتاز سواء للركاب الامامى او الراكب الخلفى
الشنطة مساحتها كبيره وحلوة
تقفيل التابلوه كويس والخامات المستعملة جيدة
التابلوه بسيط جدا
الكاسيت متركب للعربيه مش فاكر الماركة ايه لانى مشغلتهوش
القيادة
الرؤية المحيطيه للقيادة جيدة مقارنتة بالعربيه الاوبترا واحسن منها
لم اجد وضعيه مريحة ليا اثناء القيادة، حاولت اعدل الكرسي اكتر من مرة بس لم اجد وضع مريح
عزل الضوضاء والصوت الخارجى جيد
تسارع الموتور جيد جدا وممتاز واستجابته سريعه عكس الاوبترا
اكتر حاجة لم تعجبنى هو ثبات العربيه ، كان بيقل بعد 120 كم/الساعه وبيتاثر جدا بعد 140 كم/الساعه وبالاخص الثبات عند الانتقال بين الحارات على الطرق السريعه واخد المنحيات الناعمة على طرق السفر
مجملا
العربيه عائلية من المقام الاول لوسعها الداخلى الممتاز ونعومتها
استهلاكها للوقود ممتاز مما يجعلها سيارة مدينة فى المقام الاول
يعيبها ضعف ثباتها على السرعات العاليه والمنحنيات
شكلها الداخلى والخارجى يغلب عليه البساطة ولا توجد بها اى شىء يشد النظر
ملحوظة
ده تجربه شخصيه قد تختلف نتائجها تبعا لظروف السيارة وتقييم المجرب