حتى في العربيات الزيرو

**ecybrarian** · 16-12-2007 11:50 AM

كنت في مرينا الحرفيين يوم الجمعة ولقيت ثلاث عربيات زيرو بدون نمر وعليها البلاستيك بتاع النقل البحري بتصلح سمكرة ودوكو في اجزاء منها..فلما سألت قالوا لي ان السواقين بيخبطوا العربيات وهما بينقلوها من المخزن للمعارض. تخيلو بقى واحد يستلم عربيته الزيرو وهي راشة خوارج...حسبي الله ونعم الوكيل في قلة الضمير إللي في البلد دي

**memo_hefnawy** · 16-12-2007 12:00 PM

أه ده بيحصل كثير جدا

إتفرج على رعونة السائقين بتوع الأجانسات و المعارض دوول

تلاقيهم بيحرقوا و يأمريكوا بالعربيات و ياخدوا غرز نار ولا كأنها عربية زيروا ولا بتلين ولا مش بتاعتهم

عشان كده أحسن حاجة تشترى من التوكيل مباشرة و كمان تشيك على العربية كويس قبل ما تستلم

هى دى مصر يا رشوان قصدى يا دكتور هشام :)

**Eng.Ahmed** · 16-12-2007 12:07 PM

وانا رايح اعمل صيانه ال1000 فى ابو رواش بعد ما كنت محافظ على انى مجريش و محرقش على الrpm ، لقيت عربيات فيرنا زيرو طالعه من ابو رواش طايره دى اقل كلمه ممكن اقولها ، يبقى تليين ايه و بتاع ايه بقه

**sab3aawy** · 16-12-2007 12:07 PM

انا بيتحرق دم أهلى لما بكون راجع من اسكندرية وألاقى عربيات ماتريكس وللا كورولا وللا إلانترا، بدون نمر وبتراب الشحن والسواقي طايرين بيها فوق ال160 كيلومتر فى الساعة، ماهى مش فلوس ابوهم وابو بلاش كتر منه والزبون المحسوك اللى عامل حسابه ياخد العربية يلينها 5000 كيلومتر على 80 العربية بتيجله موتورها متاكل من الحرق علية وهو جديد

وفى الآخر نقول ان بلاوينا كلها سببها الحكومة، ده شعب عايز حرقه اصلا

**memo_hefnawy** · 16-12-2007 12:15 PM

هدى أعصابك يا سبع مش كده :)

و بعدين إللى شارى من التوكيل بتاعه مباشرة بتكون مشحونه على عربيات نقل إللى بيسوقوها دى الخليجى أو اللى بتروح للموزعين و التجار

كلمة فى ودنك يا سبع الشعب ده فيه حد رباه على كده هو مكنش كده زمان طبعا إنت عارف الحد ده مين :) و خلينا ساكتين

**tarekkasaby** · 16-12-2007 12:19 PM

حمد لله على السلامه يا باشمهنس سبعاوى ;)
وحشتنا ياراجل و يا ترى انت شلت العربيه الصنى ليه من التوقيع اوعى تكون غيرت :d

**TAG_Turbo0** · 16-12-2007 12:25 PM

ممكن حضرتك تقول لنا ايه كان نوع العربيات دى؟

**aboalm** · 16-12-2007 12:32 PM

اه عادى لو فاكر من مده فى كونتاكت كان واحد شغال فى المصرية ة قال نفس الكلام عن العربيات الزيرو اللى عندهم و انهم بيصلوحها قبل الزبون ما يشوف حاجه

**ahmedfd** · 16-12-2007 01:40 PM

المشاركة الأصلية كتبت بواسطة memo_hefnawy

هدى أعصابك يا سبع مش كده :)

و بعدين إللى شارى من التوكيل بتاعه مباشرة بتكون مشحونه على عربيات نقل إللى بيسوقوها دى الخليجى أو اللى بتروح للموزعين و التجار

كلمة فى ودنك يا سبع الشعب ده فيه حد رباه على كده هو مكنش كده زمان طبعا إنت عارف الحد ده مين :) و خلينا ساكتين

+1
العربيات اللي من التوكيل من غبور و بتتسلم في معرض عمارات العبور بتكون عاملة من 45 إلى 55 كم على العداد إللي هيا تقريباً المسافة من المخازن في أبورواش + تقريباً الإختبارات و التحميل على المركب في كوريا و التفريغ و النقل لحوش التخزين في ميناء إسكندرية في مصر، فأعتقد إنها فعلاً بتتنقل من إسكندرية على تريلات دورين.
لكن دة ميمنعش إن السواقين برضه ممكن يكونوا بيجروا في المسافات دي.

**bassam nagy** · 16-12-2007 01:53 PM

المشاركة الأصلية كتبت بواسطة ahmedfd

+1
العربيات اللي من التوكيل من غبور و بتتسلم في معرض عمارات العبور بتكون عاملة من 45 إلى 55 كم على العداد إللي هيا تقريباً المسافة من المخازن في أبورواش + تقريباً الإختبارات و التحميل على المركب في كوريا و التفريغ و النقل لحوش التخزين في ميناء إسكندرية في مصر، فأعتقد إنها فعلاً بتتنقل من إسكندرية على تريلات دورين.
.

انا معاك ان 55 كيلو هما الية مشيت بيهم العربية فى الاختبارات والميناء فى كوريا اما بمجرد انها نزلت ميناء اسكندرية او بورسعيد بيتفصل فيشة العداد انا مستلم العربية هاعملة 34 كيلو وكانت فيشة العداد مفصولة

الموضوع: حتى في العربيات الزيرو

LinkBack

أدوات الموضوع

عرض

حتى في العربيات الزيرو - انشر الموضوع فى :

-

-

-

-

-

المواضيع المتشابهه

موضوع الفصال في اسعار العربيات الزيرو

تجار السيارات بيبيعوا العربيات الزيرو فى مواقع المستعمل

العربيات الزيرو غليت يا شعب

اللى عاوز سمكرى استاذ فى رد العربيات الزيرو على البارد

الكلمات الدلالية لهذا الموضوع

المفضلات

المفضلات

ضوابط المشاركة