الموضوع: بطارية نيسان صنى 2007 ..العربية وقفت منى خالص

سلام عليكم
اولا العربية صنى 2007 مانيوال
انهاردة حصلى موقف زى الزفت بس الحمد لله على كل شىء
طلعت من الشغل بفتح العربية بالريموت ملقتش اى استجابة قلت يمكن الريموت حصله حاجة
فتحتها بالمفتاح عادى وجيت ادور مفيش اى استجابة ومفيش كهرباء نهائى واصلة للعربية
المهم ناس ولاد حلال قعدوا يشحنوا فى العربية لحد ما الانوار بدات تشتغل بس العربية مبتدورش
المهم فى الاخر دارت بعد الزق ووصلت بيها البيت والحمد لله
جيت ادور تانى العربية مدارتش بس الانوار والكلكس والريموت شغالين وبعد زقة العربية تمشى
المهم يريت اعرف نوع البطارية الاصلية اللى جت مع العربية لانها قعدت معايا سنتين ولما غيرتها جبت واحدة تانية قعدت سنة بالظبط ويمكن اقل من سنة بكام يوم !! او ممكن يكون فى مشكلة تانية غير تغيير البطارية انا مش فاهمها لان الحكاية دى حصلت فجأة وبدون اى مقدمات والعربية كانت شغالة كويس جدا والبطارية كانت كويسة اوى والموتور بيدور الصبح على طول بس مش عارف حصل ايه
يريت حد يقولى على نوع البطارية الاصلية اللى فى العربية عشان اجيبها وجزاكم الله خيرا

وياريت اعرف البطارية بتقعد قد ايه
البطارية الاصلية للعربية قعدت معايا سنتين واللى جبتها قعدت سنة ومكلمتهاش !!!

المشاركة الأصلية كتبت بواسطة sab3aawy

غالبا موضوع البطارية كان سوء حظ معاك لأن البطاريات بتقعد اكتر من سنة واتنين بكتير، عموما اكشف على شحن الدينامو، ولو مظبوط مش هتفرق نوع البطارية، لأن حتىالنوع اللى بينزل معاها هو نوع عادى جدا(نسر فارتا 45 أمبير سائلة يسار "يعنى الموجب بتاعها على الناحية الشمال ويرمز لها بالحرف l -إل الانجليزى") والسوق مليان بما هو افضل منه، هاتلها إما إيه سى ديلكو جافة 55 أمبير l او فارتا جافة 55 أمبير l

الف شكر ى استاذ سبعاوى
طب الدينامو بيتشحن ولا ايه ولا قصدك اغيره خالص وياريت اعرف تمنه معلش انا بعرف اسوق بس واى مشكلة بروح التوكيل بس للاسف مش عارف اروح التوكيل والعربية مبتتحركش

تم الكشف على شحن الدينامو ومفيش اى مشاكل الحمد لله
والبطارية تم شحنها
وربنا يستر متقفش تانى او تقف قبل ما اتحرك بيها من البيت :(
والراجل قال السبب الوحيد للى حصل ان نسين نور العربية فترة الشغل مع انى بروح الصبح ومبشغلش النور اصلا عشان انساه !! بس ممكن الله اعلم
وشكرا لاستاذ سبعاوى

ممكن تكون حضرتك كتير بتشغل التكيف والعربيه واقفه

مش مهم نوع البطارية الأصلى كان إيه ، دى حاجة مش مرتبطة بنوع العربية ، حاول تجيب حاجة نضيفة زى فارتا الألمانى

ليا تعقيب بسيط ان الافضل انك ترك 45 امبير مش 55 لان الاصليه بتاعتها 45 وانا سألت على الموضوع ده فى التوكيل وقالولى 45 وانا شخصيا مقتنع بالكلام لان اكيد ان الحاجات دى بتتحط بناء على حسابات الحمل الكهربى وقدرة الدينامو على اعادة الشحن فانا شايف انك تركب 45 زى الاصلى

انا شايف انك تركب 70 لأن الحاجات الفابريقة بيبقا فيها بعد إقتصادى كبير لتخفيض التكلفة ، لو الفابريقة 45 فعلاً يبقا ده قليل جدا على عربية 1600 بتكييف بكماليات كهربا كتير

البطاريه الأصلى 45 امبير ولكن لو هاتشترى جديد اشترى 55 امبير وده افضل لأن ال55 ممكن تسحب منها قدره اعلى ومش هاتأثر سلبى على الدينامو ولا حاجه.
بس انا عاوز اعرف سعر الجافه ال55 امبير كام