ثقل في الدريكسيون بعد حشو العلبة
في اطار تظبيط العربية رحت لعفشجي يشوفلي اخبار العفشة ايه
فك علبة الدريكسيون وقاللي محتاجين شوية حاجات بحوالي 100 جنيه
اقترحت نشوف واحدة جديدة احسن والتكلفة قريبة خصوصا اني سمعت ان حكاية الحشو دي مش بتقعد كتير بس الراجل شكرلي في العلبة وقاللي دي ايطالي وماتلاقيهاش دلوقتي لان كله مضروب والمشرشر بتاعها سليم
طيب يا عم محتاج ايه؟
- 2كاوتش مزيكا(اسمه كده) 10جنيه
- 2كاوتش مدور 10 جنيه
- حشو علبة دريكسيون 10 جنيه
- 2 طرف بارات 56 جنيه(اعتقد بيسموه بيض)
- علبة شحم كبيرة 18 جنيه
ظبط العلبة وشحمها وركبها وكان فيه اكس اللي هو متوصل من العجل للدريكسيون(حد يعرف اسمه ايه؟) كبسه وبص علي باقي العفشة وقاللي محتاجين مساعدين ادام وبطاحات بس ممكن
نصبر عليهم شوية وباقي العفشة تمام
الملاحظة الاولي ان الدريكسيون بقي تقييييل جدا عما كنت متعود عليه
الملاحظة التانية العربية طبعا محتاجة ظبط زوايا
الراجل كويس في تعامله وباين عليه فاهم واخد مصنعية 25 جنيه
سؤالي هل الدريكسيون هيخف مع الوقت ولا هيفضل كده خصوصا ان العفشجي بيقوللي ان احنا حكمنا علبة الدريكسيون عشان كده بقت تقيلة بس هتخف مع الوقت
والكاوتش عندي علي 30
الدريكسيون كان كويس معايا لدرجة اني كنت ممكن اركن بايد واحدة