حكاية الشباب الصيني في سوق السيارات

**Karim_Monir** · 17-05-2007 01:02 AM

[align=justify:78819999f2]بصرحة شوفت موقف بعيني يوم الجمعة الماضي في سوق السيارات وصممت اني احكيلكم عليه بدون تحيز

بعد ما بعت السيارة البرايد قولت اخد جولة في السوق اشوف اخر الاسعار
لقيت 3 صينين شباب واقفين جنب سيارة فليشيا بيخلصوا فيها ويكتبوا عقدها
لفت نظري المنظر قوي قولت اتكلم معاهم شوية -هانقلكم معني الحوار لان لغتهم العربية والانجليزية زي الزفت

انتم بتعملوا ايه في مصر ؟ بنشتغل
طيب ما جيبتوش عربية معاكم من هناك ليه ؟ عشان تاشيرتنا سياحية وكلفة النقل غالية جدا ومش هانقدر نقعدها اكتر من 6 شهور
طب ناويين تقعدوا اكتر من 6 شهور ؟ احنا بقالنا اكتر من سنة
طب ليه ما بتشتروا عربية مستعملة موديل تسعينات وبنفس التمن ممكن تشترو QQ كسر زيرو وكيلو متر قليل ؟
لاء QQ نصدرهالكم انتم (وعلي وجهه ضحكة خبيثة غاظتني جدا) لكن دي ضعيفة جدا وماتستحملناش واحنا عايزين عربية تستحمل
طب ايه رايكم في العربيات الكوري ما جبتوش هيونداي بنفس التمن ليه؟
احنا نركب الكوري بتاع بلاده مش التقفيل المصر ومفيش حاجة في الكوري بنفس التمن وقال كلمة ان الكوري زي اليااني بالظبط وفي بعض المصانع الصينية هاتلحقهم قريب بس هاتكون اسعار منتجاتها غالية ومش منافسة لو جت مصر
طب ايه افضل السيارت الصيني ؟
قالي كام ماركة مافهمتش منهم حاجة لكن اللي لفت نظري قوي كلمة زيالي
قولتة زيــــــالي دي كويسة !!!!!
قاللي اه زيالي الصيني مش بتاعت جبــــــــــــــــور (قصدة غبور )

للعلم كان معايا في السوق وشهد الحوار احد اصدقائنا في المنتدي وكان مستغرب زيي تمام
ولا عزاء للصناعة المصرية والمستهلك المصري
كريم منير
[/align:78819999f2]

**Dr Ahmed** · 17-05-2007 01:43 AM

أنا بعد ما قريت الحوار دا كان نفسى أكسر دماغه زى الطبق الصينى ، مش فاضل غير العيال بتوع كل حاجة بجنيه ييجو يتريقوا علينا..

**hazem_khidr** · 17-05-2007 05:01 AM

طيب و الله ناس بتفهم
مش متحيزين لبلدهم و عارفين ان صناعتهم تعبانه لسه و عندهم نره في التقفيل المصري لا باس بها

**baher** · 17-05-2007 05:08 AM

والله احنا اللي عملنا كده في نفسنا

**memo_hefnawy** · 17-05-2007 07:44 AM

الحوار ده كلمة مستفز عليه شوية :) ده فى بعض اللقطات كريم عملها مونتاج عشان النــاس هنا دمها مايفورش أكثر من كده

بجد إحنا إللى جايبينه لنفسنا :) .....تخيلوا إن تقريبا الموديلات الصينى إللى عندنا كلها محدش بيركبها عندهم ؟ و لما سألناه ليه الإسكودا ...... قال أنا عايز حاجة heavy duty تستحمل الشغل و الشوارع بتاعت مصر ومش تصرف كثير .... يعنى أدى الشباب الصينى و آدى الشعب المصرى

فى بلدنا و بتمألسوا علينا

**sh_masry** · 17-05-2007 09:30 AM

انا متأكد انك سألتهم عن الأسبرانزا بس مش عايز تقول علشان ماحدش يزعل منك و ده لأنك site admin و مش عايز تزعل حد منك بس ماحدش هايزعل منك و لو زعل منك شويه مش هايزعل كتير و مايزعلش منك علشان انت ماحدش يعرف يزعل منك علشان انت مابتزعلش حد فأكيد ما حدش هايزعل ....... وللا ايه ؟؟؟؟

a7'ook
Sherif

**osman hisham** · 17-05-2007 10:16 AM

للأسف هيه دى الحقيقه الواضحه اللى أحنا مش عايزين نصدقها و الدليل الأتى :
1-أين العربيات الجيلى أول عربيه نزلت مصر الأن , أين الفروته الأن فى الشوارع ........لا توجد !!!!
2-كم عدد العربيات الشيرى (ما عدا الأسبيرانزا) المباعه اللى بتشوفها فى الشارع المصرى بالنسبه للفيرنا مثلا ...قليله جدا .......
3-الأسبيرانزا لو دخلت جواها حتلاقى تابلوه بلاستيك سىء و تفنيش أسوأ و موتور ضعيف على العربيه و مشاكل صناعه و مشاكل تفنيش وللأسف الناس تتهافت عليها و التجار يدفعوهم على ذلك حتى يستفيدوا بأعادة بيعها بأسعار أغلى مما تستحق و حجتهم أن الدايو كانت كده
مع أن الدايو لم تكن لها نفس الظروف لأ الدايو عندما نزلت كانت كوريا تصدر السيارات من قبلها بعشرات السنين بعكس الصين الأن
4-أكبر الشركات فى الصين لأنتاج السيارات الأن هيه شركه مملوكه لجنرال موتورز و التانيه لفولكس واجن و هى تنتج سيارات بمواصفات هاتين الشركتين.
5-هات أى عربيه كورى أو يابانى متجمعه و قارنها بمثيلاتها المستورده حتلاقى العجب أنا مثلا كان معايا سيفيا مصرى عانيت من تقفيل الأبواب و رداءة الكراسى و الخراطيم (خرطوم موصل على الردياتير أنفجر بعد 4 سنوات )
كفانا أستيراد بضاعه فاشله بحجة السعر مناسب للمصريين و لنرى السوق المصرى الأن الهيونداى رقم واحد رغم أن أسعارها ليست الأرخص و العربيه الباسات منتشره أكتر من الأسبيرانزا على الغم من فارق السعر الرهيب
و الأولى للمنتدى عمل رابطه تقف أمام المنتاجات السيئه

**وائل عطية** · 17-05-2007 10:43 AM

-هات أى عربيه كورى أو يابانى متجمعه و قارنها بمثيلاتها المستورده حتلاقى العجب أنا مثلا كان معايا سيفيا مصرى عانيت من تقفيل الأبواب و رداءة الكراسى و الخراطيم (خرطوم موصل على الردياتير أنفجر بعد 4 سنوات )

إذاً المشكلة في التقفيل المصري وأنا معك في ذلك
وجهة النظر العملية بقي بتقول إيه :
أنا ممكن هاجيب مرسيدس عيون متقفلة في مصر، وممكن أجيب بي إم الفئة السابعة متقفلة في مصر وممكن أجيب نيسان صني متقفلة في مصر، وممكن أجيب كورسا متقفلة في مصر وسيفيا متقفلة في مصر واسبيرانزا متقفلة في مصر
كل الماركات السابقة دي متقفلة في مصر وبحكم وسلطة القانون لابد من وجود 45% من مكونات العربية من المنتجات محلية الصنع في مصر وما أدراك ماهي !!!
إذاً الـ 55% المتبقية من مكونات العربية هاتكون من بلد الماركة صح كده؟ تمام يبقى كل واحد زي ما بيقولوا متعلق من عرقوبه وكل واحد حسب إمكانياته يعني إيه اللي يخليني أدفع في عربية مئات الألوف من الحنيهات أو حتى 100 ألف حنيه وانا عارف إن نصف مكوناتها تقريباً مصري.. طيب ماأنا أوفر جزء كبير من المبلغ ده وأجيب حاجة زي الاسبيرانزا برده نص مكوناتها تقريباً مصري ويبقى استفدت من فرق السعر ، وأغيرها بعد سنه ولا اتنين وبرده هاتكون لسه كويسة وبتتباع كويس.
صح الكلام ده ولأ؟

**AlmAhAtmA** · 17-05-2007 11:06 AM

الموقف ده ما هو الا تجسيد لفلسفه الشعب الصيني
و بعيد عن السيارات
هوه ده النظام بتاعهم في كل حاجه
يا جماعه انا شفت عماره من دورين زي العشوائيات عندنا كده
اكتشفت ان العماره الظريفه دي بيخرج منها كل سنه 4 كونتينر 40 قدم بيصدروا لمصر
تفتكروا فيهم ايه يا حلووووين
فوانيس رمضان
كل فوانيس رمضان اللي بتنزل مصر بتتصنع في البيت البسيط ده
تدخل البيت كل حجره فيها ماكينه و بيشتغل عليها شاب او اتنين
و يا عيني علي شراثح الميديا اللي بتيجي علشان تتركب في الفانوس و عليها الاغاني و هيه جيه في صندوق من العماره اللي قدامهم
حاجه تفرح
ده الشعب الصيني اكلمك بعدين عن الشعب الياباني

الموضوع: حكاية الشباب الصيني في سوق السيارات

LinkBack

أدوات الموضوع

عرض

حكاية الشباب الصيني في سوق السيارات - انشر الموضوع فى :

-

-

-

-

المواضيع المتشابهه

لماذا تهاجم السيارات الصيني؟؟؟

السيارات التجارية الصيني

السيارات الصيني. . . .لمـــاذا !!!

السيارات الصيني. . . .لمـــاذا !!!!

قائمة مصانع السيارات الصيني

الكلمات الدلالية لهذا الموضوع

المفضلات

المفضلات

ضوابط المشاركة