الموضوع: Jeep Cherokee Liberty 2008

اتيحت لى امس فرصة تجربة الشيروكى الجديدة اللى اسمها الكودى (KK) وده للتفرقة بينها وبين سابقتها الليبرتى (KJ) واللى قبلها الشيروكى (XJ)
الحقيقة الTest Drive كان فى الرملة فقط فمقدرتش احكم عليها على الاسفلت انما اللى اقدر اقوله انها بتمشى فى الرمل احسن من اللى قبلها وده لزياده الالكترونيات اللى بتتحكم فى توزيع العزم بين العجل الامامى والخلفى مما يقلل فرصة دوران عجلة عالفاضى وبالتالى غرزها.
انا جربت اطلع بيها مطلع رمل طويل شوية وقصدت اشوفها هاتغرز امتى وفعلا اقدر اقول انها استمرت فى اصعود لمسافة اكتر بكتير من اللى كان XJ او KJ توصله.
الجديد فى ال 4WD انه بقى الكترونى. فتم تغيير الوضعين اللى كانوا Part Time و Full Time وتم الاستعاضة عنهم بوضع اسمه 4WD Auto وده بيقوم بتوزيع العزم بين العجل الامامى والخلفى حسب الحاجة وممكن يوصل 100% من العزم للعجل الامامى فقط لو استدعى الأمر.
وحتى التحكم فى الأوضاع بقى بمفتح الكترونى بدل الذراع اللى كان الواحد لازم يتخانق معاه علشان يحركه.

حجم العربية زاد فى الطول والعرض وده خلاها اوسع من الداخل وخاصة فى الخلف وبالذات الشنطة اللى بقت متناسبة مع حجم العربية ، يعنى تقريبا بحجم شنطة الXJ لأن ال KJ كانت شنطتها صغيرة زيادة عن اللزوم.

العزل بقى احسن من سابقتها والصوت بقى اهدى كتير.

نظام التعليق تم تغييره وبقت اطرى من ال KJ واطرى كتييييييير من ال XJ بس ماقدرتش اعرف تأثير ده على ثباتها فى الملفات السريعة لعدم التجربة، بس المعروف ان كل ماتكون العربية اطرى كل ماتميل زياده فى الملفات وده بيأثر على ثباتها.
المساعدات الالكترونية واخدعه حقها فيها فيها ABS, ESP, EBD, ESR, Tyre Pressure Monitor, Seat Memory, Parking Sensor وشوية حاجات تانية مش فاكرها .
الTrip Computer اللى كان فى السقف نزل وبقى فى وسط العدادات (مكانه الطبيعى، مش عارف كانوا ليه مصممين بقالهم 10 سنين يحطوه فوق) والتحكم فيه بقى عن طريق زراير فى الدركسيون.
كمان الكاسيت اللى راكب فيها محترم جدا فيه CD Changer وبيشغل MP3, DVD, VCD وفيه بلوتوث يمكن التحكم فيه برضه من الدركسيون.

هى مجملا كده ارقى من الموديل السابق، ولو انى مش قادر ابلع شكلها لغاية دلوقت ومصمم ان الموديل السابق(KJ) كان احلى، بس ده من بره
انما لما تركب العربية تحس انها افخم بكتير من ال KJ
عموما هى كانت فرصة اخد بيها انتباع عن الموديل الجديد.

شكرا يا حازم على تقيمك للعربية ومن الواضح ان الموديلده أفضل بكتير من الى قبله

العربية واضح انها اتحسنت .. المهم ياترى هي دي اللي هتتجمع في مصر .. و يا ترى بنفس المواصفات

المشاركة الأصلية كتبت بواسطة الريس

العربية واضح انها اتحسنت .. المهم ياترى هي دي اللي هتتجمع في مصر .. و يا ترى بنفس المواصفات

ماهى اللى جربتها دى اللى متجمعة فى مصر وتأكدت من ده من الزجاج الجريش
هو بس السؤال هل هاتفضل تتجمع بنفس الجودة والخامات؟؟
اظن الاجابة ايوة لأن الشركة الأمريكية من أول ما بدأت تجمع الشيروكى فى مصر ماحصلش ان الخامات او التقفيل اتجه للأسواء. هو بس اللى ممكن يحصل انها تغلى شوية خاصة ان السعر المعلن 319 ده للحجز والاستلام خلال 6 شهور حاليا.يعنى الطابور طويل .