انا هقول اللي حصل معايا عشان الافاده العامه وبس
حتي لو مكنش كلامي علي هوي البعض*
انا مهندس متزوج وعندي بنوته صغيره 3 سنوات كنت عايز ارحمها هيه وامها من بهدلة الموصلات كانت امكانياتي متسمحش اني اجيب عربيه غاليه يعني حد اقصي 50 الف فكرت في الصيني وكانت نظريتي بتقول ان صيني زيرو احسن من ياباني مستعمل المهم اللي زود تمسكي بيها ان والدي كان عنده اختها ال516 بس كنت كل ما اسالوا يقللي يا ابني بلاش الماركه دي وكنت ارد عليه اقوله يا والدي علي قد لحافك مد رجليك
بعديها بفتره طلب مني والدي اني اروح اعمله الصيانه الدوريه وكتب لي كذه حاجه عشان يعملوها في الصيانه (رجه في الموتور-الفرامل بتصفر-الباب فيه عضه-زرار نور الصالون-السي دي بايظ)ده اللي انا فاكره ونبه عليا اني اروح بدري عشان الزحمه
فعلا كنت هناك اول واحد(الصيانه في طريق مصر اسكندريه وانا ساكن في المريوطيه) سلمت العربيه للمهندس مش فاكر اسمه بس شكله خريج جديد وفضلت قاعد شويه اتفرج علي الخناقات وشويه اخرج اتفرج علي العربيات واسال اصحبها
واحده ست كبيره هيه وابنها كانوا بيخانقوا عشان في حاجه باظت في الموتور عشان مغيرتش زيت في الصيانه اللي فاتت المصيبه انهم حاسبوها علي غيار الزيت
واحد كان بيتخانق عشان كل مره العفشه بتبوظ ولازم يربطها وقاللهم سعتها انو لو متربطتش هيطلع الدور اللي فوق وكل شويه يجي الراجل بتاع الامن ينزله من علي السلم (تقريبا الدور اللي فوق فيه المديرين) ومن ده كتير
اثناء ذالك كنت بحاول افتح حوار مع الناس اللي معاهم 113 حلم حياتي(سابقا) ولا واحد قاللي كلمه حلوه في حقها
وفي واحد عرض عليا اني اشتري عربيته وكانت لسه زيرو(قولولي بقه ليه) معرفش اليوم عدي ازاي علي الساعه3 لقيتهم بيندهوا عليا عشان اروح اجرب العربيه رحت لقيت الكراسي كلها شحم بس الشخص اللي طلع معايا اكدلي انهم هيغسولوها(والله ماحصل)
طلع بينا امريكاني و لف لفه وقاللي العربيه زي الفل(ياسلام)
قلتله بس انا مجربتهاش قاللي جربها ركبت وبدوس بنزين لاقيت الرجه بتاعت الموتور موجوده تخيلوا يقول لي ايه يا بيه ده الاستاندرد بتاعها(عشان يسكتني) المهم كل ما اقول له حاجه يقول لي لالالالا ده كده عادي حتي الكاسيت يقول لي التوكيل بتاعه في المهندسين
والعضه اللي في الباب قالي تجيبها في يوم تاني تكون العمليه رايقه(علي اساس اني بكلم حلاق)
دفعت الفلوس واخدت العربيه وهيه مش نظيفه وروحت (علي فكره انا اول واحد كان هناك واخر واحد مشي من هناك)
اللذيذ في الموضوع ان كل اللي اتخانقوا مشيوا بدري(عشان لما تشتروا العربيه وتروحوا الصيانه تبقوا تاخدوا معاكوا شوم)
وانا بلف بالعربيه سمعت التيل بيصفر ساعتها دعيت علي ابوالفتوح وابنه
قابلت والدي وصعب عليا انه بيروح يعمل الصيانه بنفسه اكيد بيتبهدل الغريب ان كل مشاكل العربيه كانت من يوم ما اشتراها وكل مره يروح الصيانه ويرجع زي ما راح(اشتري عربيه زيرو ومفرحش بيها)
سالته انت اشتريت العربيه دي ليه
قاللي علي قد لحافك مد رجليك
ولما سالني عاملوا ايه في الصيانه
قلتلوا صلحوا نور الصالون
-------------------
* م ع 5