سيراتوا خليجي (سعودي-كويتي-أردني)ما الفرق؟؟

**kh_talaat** · 28-01-2010 09:43 AM

السلام عليكم يا أهل السيراتو

بأذن الله الوالد قرر يشتري كيا سيراتو ونزلت معاه وعرفنا ان الفئات كتييير والكماليات كتيير بالأضافه ان فيه توكيل وخليجي

وقررنا نشتري الخليجي على اساس فرق السعر والمواصفات كمان افضل في الخليجي

لكن السؤال هنا الخليجي بيتفرع ل3 أنواع مواصفات سعودي - كويتي - اردني

وسؤالي ليكم يا رجاله ايه الفرق بين التلاته أنا سمعت ان السعودي احسنهم والكويتي مش وحش أما الأردني ففيه اللي بيقول ابعد عنه !!!

أما السؤال الأخير هو ازاي اعرف ان دة سعودي ودة كويتي ودة اردني ، يعني السعودي بيقولوا انه مكتوب على العتب مواصفات سعودي لكن الكويتي والأردني اعرفهم ازاي ؟؟ وآسف على الأطاله

**nakkash** · 28-01-2010 10:43 AM

وعليكم السلام ورحمة الله وبركاته يا أهل الفيرنا
عامل إيه يا خالد واحشنى بقالى فترة ما شفتكش من يوم ما كما فى اسكندرية مع بعض .
و يا سيدى اهلا وسهلا بيك فى قسم الكيا ومبروك مقدما للحج , بص يا عمنا انت طبعا شفت العربية بتاعتى دى كانت خليجى هاى لاين مواصفات سعودية والعربية والحمد لله زى الفل اللى اقدر اقولهولك ان فعلا المواصفات السعودية بتكون افضل من الكويتى والأردنى و دى بتقدر تعرفها من القايم بتاع باب السواق هتلاقى مربع صغير جنب المربع اللى بيتكتب فيه ضغط الهواء بتاع الكاوتش مع كل مقاس المربع الصغير هتلاقى مكتوب فيه ان هذه السيارة مصنعة طبقا للمواصفات القياسية للمملكة العربية السعودية واعتقد ان افضل مكان وارخص مكان ممكن تشوف فيه هو مستورد الخليجى فى مصر الحاج جابر عبد الشهيد هو ليه فرع فى شارع السودان يعنى قريب من البيت عندك هتلاقيه بعد ما تعدى كوبرى جامعة الدول وانت فى اتجاه الكيت كات هتلاقيه على ايدك الشمال والمعرض الأساسى بتاعهم هتلاقيه موجود فى مصر الجديدة ولو حبيت اى مساعدة رجالة قسم الكيا كلهم سدادين

**kh_talaat** · 28-01-2010 11:02 AM

المشاركة الأصلية كتبت بواسطة nakkash

وعليكم السلام ورحمة الله وبركاته يا أهل الفيرنا
عامل إيه يا خالد واحشنى بقالى فترة ما شفتكش من يوم ما كما فى اسكندرية مع بعض .
و يا سيدى اهلا وسهلا بيك فى قسم الكيا ومبروك مقدما للحج , بص يا عمنا انت طبعا شفت العربية بتاعتى دى كانت خليجى هاى لاين مواصفات سعودية والعربية والحمد لله زى الفل اللى اقدر اقولهولك ان فعلا المواصفات السعودية بتكون افضل من الكويتى والأردنى و دى بتقدر تعرفها من القايم بتاع باب السواق هتلاقى مربع صغير جنب المربع اللى بيتكتب فيه ضغط الهواء بتاع الكاوتش مع كل مقاس المربع الصغير هتلاقى مكتوب فيه ان هذه السيارة مصنعة طبقا للمواصفات القياسية للمملكة العربية السعودية واعتقد ان افضل مكان وارخص مكان ممكن تشوف فيه هو مستورد الخليجى فى مصر الحاج جابر عبد الشهيد هو ليه فرع فى شارع السودان يعنى قريب من البيت عندك هتلاقيه بعد ما تعدى كوبرى جامعة الدول وانت فى اتجاه الكيت كات هتلاقيه على ايدك الشمال والمعرض الأساسى بتاعهم هتلاقيه موجود فى مصر الجديدة ولو حبيت اى مساعدة رجالة قسم الكيا كلهم سدادين

المعلم الكبير

انت فين يا باشا واحشني كتير والله وعايزين نشوفك في مقابلة اسكندرية الجاية ودة اللينك لو معندكش فكره
http://www.nilemotors.net/Nile/120279-19-2-a.html

وبالنسبة للعربية انا والدي اهم حاجة عنده هو انها تكون اوتوماتيك وفيها ABS وفي نفس الوقت لا يزيد التمن عن 110 ألف
ورحت فعلا جابر عبد الشهيد بس لقيت اللي عندة السعودي وفيها ABS تمنها معدي ال110

المهم وصلنا للمواصفات المطلوبه بس العربية كويتي لكن العربية مش مكتوب عليها اي حاجة

هل هي كويتي ولا اردني ؟؟؟ مش عارف

خايف تكون أردني والراجل بيشتغلني.... ، للأسف مش قادر أعرف

اللي يهمني في الموضوع ان هل الكويتي تعتبر نفس مواصفات السعودي على أساس انها خليجي بردة (يعني نفس ظروف درجة الحرارة)

لكن الأردني المفروض انها مواصفات مختلفة ويقال انها اساسا مواصفات اسرائيلي وبيسموها اردني عشان محدش ينفر منها في مصر

إية الرغي بتاعي دة .... الملخص يا رجاله هو ازاي نفرق بين الأردني والكويتي ؟؟؟؟؟ وياريت اللي عندة معلومة يكسب فيها ثواب ويقولهالي

**Mshawky** · 28-01-2010 11:20 AM

لا فعلا السعودى افضل حاجه من كل ده

ولازم تبص على الباب وتشوف المواصفات ايه

**M.Mostafa80** · 28-01-2010 11:35 AM

هتعرف من الأفراج الجمركى ومن الورقه اللى ملزوقه على زجاج العربيه العربيه دى جايه منين

**kh_talaat** · 28-01-2010 11:52 AM

المشاركة الأصلية كتبت بواسطة m.mostafa80

هتعرف من الأفراج الجمركى ومن الورقه اللى ملزوقه على زجاج العربيه العربيه دى جايه منين

الله ينور عليك يا باشا

**ALSHARIEF** · 29-01-2010 12:21 AM

السلام عليكم و رحمة الله و بركاته ..........

أخى الحبيب نظرا لأنى ببحث فى العربية ديه بقالى فترة كبيرة و بعد ما قارنت بين الخليجى و الوكيل و تقريبا رسيت على الخليجى و طبعا ديه وجهة نظرى قد تحتمل الصواب أو الخطأ و مش تقليل أو انتقاص من قدر الوكيل و لكن و جهات نظر .......... المهم سألت على أفضل المواصفات الخليجى و عرفت إنها السعودى رقم و احد و بيبقى مكتوب على القايم الشمال إنها مواصفات سعودى و كذلك على ورق الإفراج الجمركى و أيضا على زجاج العربية ( زى ما أشار زميلنا الحبيب بالأعلى )
يليه الكويتى و نصيحة إبعد عن االأردنى لإنه سيىء للغاية و تقريبا هتعرفه برضه من و رقه و كان فيه واحد صاحبى قاللى إن الأردنى بينزل بعشرة اير باج و الله أعلم .