الفساد الاداري في وحدة مرور الدقي : رشاوي عيني عينك ومافيش رقيب.

الاسبوع الماضي كنت اقوم بنقل ملكية السياره من مرور الجيزة... وإذا بي اواجه حاله من الفساد الاداري وطلب رشاوي عيني عينك...

بدأ المشوار من وحدة مرور الجيزة : الدقي...

براءة الزمة : بتسلم الرخصه وتنتظر لما ينادي اسمك ( انا قلت هو ده النظام ولا بلاش )...
طيب اللي ماعليهوش مخالفات ييجي عند الشباك ده ويدفع 10 جنيه...
رحت عند الشباك لما اتنده إسمي ودفعت ال 10 جنيه ((( بتوع ايه بقي ال 10 جنيه ))) 6 ورقات تبرع لجمعيه خيريه وكل ورقه ب 50 قرش. يعني كده 3 جنيه. طيب ال 7 جنيه (في كرش الباهوات )...

ما علينا مش مبلغ كبير وانا برده مش مسامح في الجبايه. والله لا يبارك لكم فيهم.

نزلت تحت اجيب شهادة بيانات.
كلهم موظفات علي شبابيك شهادة البيانات... (قلت خير دول مالهومش في الرشاوي ) ايشي محجبه وايشي كبيره في السن وايشي شكلها بنت ناس...
شباك 12 للموتوسيكلات و 13 و 14 للملاكي. و15 الارشيف.
- يامدام عاوز شهادة بيانات.
* هات الاصول وصورهم ...
- موجودين.
اعطيتني ورقه وقالت هات الملف ده من الارشيف... رحت طابور الارشيف وماحدش عاوز ياخد الورقة (مجندين لابسين زي عساكر ميري )...
استني حد يعبرني ولا الهوا والكل بيكلمك بتناكة وكأنك بتشحت منهم... (لازم تلف 2 جنيه في الورقه علشان يرضي ياخدها منك... ولو عاوزه يدخل يجيبها لك الاول لف له شلن "5جنيه")
فين وفين الملف وصل. رحت للمدام...

- الملف وصل يا مدام...
* ماردتش عليا. فتحت الملف واعطيتني ورقه ادفع في الخزينه. دفعت ورجعت لها.
خلصت الورق واعطته لموظف جنبها (شكله محترم وكبير في السن 45 - 50 سنه )...
استني البيه المحترم يخلص الملف بتاعي (اللي كان تالت ملف) الاقيه سلم بتاع 13 - 14 ملف وبتاعي لسه...
- لو سمحت يا استاذ خلصني انا لسه قدامي سفر...
* المدام قالت لي بالدور.
- يامدام انا ملفي كان تالت ملف...

ابص الاقي ملفي هو اللي فوق والبيه بيسحب الملفات من تحت...
واحد ةاقف جنبي قاللي اغمزه ب 5 جنيه علشان يخلصك...
انا مش مصدق نفسي.
........* احترم شيبتك.
........* احترم سنك ده انت رجل جوه ورجل بره.
........* حتخسر دينك علشان 5 جنيه.

المهم زعقت وعليت صوتي ولا الهوا... وفين وفين البيه خلصني لما لمحني طلعت كاميرا الموبايل وبدأت اصور المهازل اللي بتحصل ...

عدا يومين ورجعت اجيب مطابقة بصمه...

دخلت علي شباك مطابقة البصمه (المهندس المرتشي المحترم )...

اعطيته اورنيك مطابقة البصمه... وكنت اول واحد يوصل.
* مش حنشرب شاي.
- اعطيته 5 جنيه ( بس كده عينينا ) ما انا خلاص بقي اتعلمت الادب من الرمه الاولانيه.

الملف جه وطابق البصمه وركن الورقه جنبه 1/2 ساعه....
يا باشمهندس.
يا محترم.
يا بيه (وبيني وبين نفسي. يا ابن ... ) خلصني...

لا قيتي بيميل عليا وبيقول لي. ( احنا خالصين كده )
- قلت له أأمرني.

* هات ورقه ب عشرين وده علشان خاطرك... ( بجاحه وعيني عينك )
- اديته 10 جنيه وقلت له يبقي كده 15 ... قام رد وقالي. خلاص يبقي لي عندك 5 جنيه.
قام واخد الورقه وختمها ورجع لي...


فساد اداري. وحكومي..

انا عاوز حد مسؤول محترم يكلمني وينفي اللي انا باقوله


وعلي فكره انا مصور احداث الابتزاز مني ومن غيري صوت وصوره بكاميرا الموبايل...
وفي انتظار مسؤول محترم يقولي هات الدليل...
(ده لو ماكنش عنده فكره عن اللي بيحصل ودي تبقي كارثه أكبر )...



انتظروا الصور وبقية المسلسل الهزلي في وحدة مرور الدقهلية.

يا باشا نفس الكلام في مرور السلام

ياريت متسكتش وتعمل محضر في القسم وتثبت كل الحصل صوت وصورة عشان الناس تتربى شوية !

على فكرة دول عندكم غلابة
عندنا بقى مرور اكتوبر العشرين جنية ودى اقل حاجة وفية ناس بتدفع 50 لازم تبقى فوق الورق واضحة زى عين الشمس والظباط قاعدين فى قفانا وطبعااا عاملين مش واخدين بالهم
وبعدين مرة تقريبااا ناس اشتكت عشان الموظفين بتدفعلهم وبرضو بيقرفوك
فلقيت مخبر جة زقنى وانا واقف فى الطابور وكلة مطلع الفلوس وماسكها فى ايدة .فبصيتلة بقرف وانا مفكرة واحد متخلف عاوز يخلص حاجة بس بنظام الزق
ولاقيتة مسك فى واحد شكلة غلبان جداااااا ومن الارياف تقريباااا من لبسة وماسك فى ايدة خمسة جنية وراح واخدة لمكتب الظابط عشان يلبسوة قضية رشوة موظف عام .عشان يقولو احنا شغالين ومباحث المرور شغالة .والموظف قاعد بيلم الفلوس منانا ومش اقل من 20 جنية وعمال بيقول والله انا مباخد الفلوس دى لوحدى دة الكل بياخد وانا مبينوبنيش حاجة والعيشة غالية وشوف كيلو الكافيار كان بكام وبقى بكام
وطبعااا انا بفتكر حاجة واحدة بس اننا نفسى اقفل كل البيبان عليهم واولع فيهم بجاز وسخ
والادهى من كدة انك لو فكرت انك تروح لظابط وتشتكيله من عمايل الموظفين هيعاملك اكنك جاى تتبلى عليهم وهيزحلقك دة لو طلع ظابط محترم
انا رحت لرائد عشان الملف بتاعى ضاع فى المرور قالى استنا فلان الفلانى لما ييجى من اجازة عشرة ايام ويبقى يشوف الموضوع دة .وفى الاخر الموضوع خلص فلوس وحسسونى انى بشحت منهم

أحسن حاجة تطلع بالفيديو ده على برنامج من البرامج الحوارية زي 90 دقيقة و العاشرة مساءا وتفضح الدنيا

http://img695.imageshack.us/img695/2043/img0062ao.jpg

البيه الشايب المرتشي (في الدائره الحمراء)



ودي صوره تانيه ليه...
وصوره للمدام اللي كانت بتقولي انت بتصور ايه..

http://img716.imageshack.us/img716/3923/img0067a.jpg


وصوره تانيه ليها عن قرب.

http://img716.imageshack.us/img716/4728/img0065at.jpg

http://img716.imageshack.us/img716/757/img0064a.jpg

http://img716.imageshack.us/img716/757/img0064a.jpg

http://img222.imageshack.us/img222/9435/img0063agj.jpg


وان شاء الله ارفع لكم الفيديو (فلوس بتطلع عيني عينك) علي اليوتيوب بس لما اضغطه لان المساحه كبيره... ولو انه يجيب الضغط لوحده.

وعلي فكره كل الناس اللي حوالين صورتها دايره متصوره وهي بتقبض... ماعدا الرئيسه بتاعتهم. (للامانه ماشوفتهاش اخدت حاجه) ماعرفش بيقسموا في الاخر ولا ايه النظام.

حضرتك لو معاك فيديوهات..حطها عاليوتيوب باسم رمزي كده وابعت مثلا ل عَمر اديب أو منى الشاذلي لينكات الفيديوهات..وياسلام لو للراجل بتاع واحد من الناس ده اللي بيجي على دريم..عمرو الليثي وساعتها هتبقى قضية عامة وياريت متكشفش شخصيتك و اسمك..وأنا مستني الفضيحة دي لما تنتشر :b4_033:

اقتباس:

---

المشاركة الأصلية كتبت بواسطة justs

أحسن حاجة تطلع بالفيديو ده على برنامج من البرامج الحوارية زي 90 دقيقة و العاشرة مساءا وتفضح الدنيا

---

+1111111111111111111111111111111

اقتباس:

---

المشاركة الأصلية كتبت بواسطة mnbahr

حضرتك لو معاك فيديوهات..حطها عاليوتيوب باسم رمزي كده وابعت مثلا ل عَمر اديب أو منى الشاذلي لينكات الفيديوهات..وياسلام لو للراجل بتاع واحد من الناس ده اللي بيجي على دريم..عمرو الليثي وساعتها هتبقى قضية عامة وياريت متكشفش شخصيتك و اسمك..وأنا مستني الفضيحة دي لما تنتشر :b4_033:

---

يعني ماتكسفوش وهما بيبتزوا الشعب. ولا خافوا من ربنا ولا من رؤساؤهم... وانا حاخاف اكشف إسمي... طب ازاي يعني هو الخوف وصل بينا للدرجة دي.... ولا الدنيا حالها اتقلب ولا ايه اللي حصل.

انا باتعامل مع مرور الدقى من سنين، كل اللى حضرتك قلته مظبوط، بس انا عمرى مادفعت مليم لحد فيهم، و مابيقدروش يعطلوا ورقى دقيقة واحدة علشان عارفينى من ساعة ما اشتكيت فى التفتيش، من اصغر واحد لغاية الظابط اسامة الجوهرى نفسه اللى عارف و شايف كل اللى انت بتقول عليه بس بيبقى مشغول بهوايته المهمة فى تجميع نماذج الطائرات.

خدها نصيحة منى، ماتدفعش و ماتزهقش و ماتحطش حدود للى ممكن تعمله علشان تاخد حقك.

اقتباس:

---

لغاية الظابط اسامة الجوهرى نفسه اللى عارف و شايف كل اللى انت بتقول عليه بس بيبقى مشغول بهوايته المهمة فى تجميع نماذج الطائرات

---

لا حول ولا قوة الا بالله...
الله يكون في العون .

هو حضرتك يافندم ازاى اشتكيت للتفتيش ؟؟؟

اقتباس:

---

المشاركة الأصلية كتبت بواسطة rockana9112007

هو حضرتك يافندم ازاى اشتكيت للتفتيش ؟؟؟

---

هتروح مقر وزارة الداخلية، هتلاقى معاملة كويسة جدا، تكتب شكوتك و ممكن كمان تصر على مقابلة مسئول و محدش هيقولك لا و هيتابعوا معاك الشكوى.

النقطة المهمة انك ماتسيبش حقك، لأن اى واحد من الفاسدين دول مجرد حرامى و الحرامى لو تخلص من خوفه نتيجة سلبيتنا و تكبير دماغنا، هيتحول لبلطجى و بجح كمان و هيعتبر سرقاته حق مشروع و ليه لا مادمنا احنا اللى بنتسرق بمزاجنا و ماقلناش لا.

طب هحكيلك على موقف فى مرور الدقى، الراجل اللى بيسلم الرخص اسمه رجب شغال زى المنشار من سنين و بقى مركز قوى، فى يوم كنت هناك وواحدة ست دفعت المعلوم و اتاخر عليها ، راحت داخلة للضابط اسامة الجوهرى وقالتله، راح ندهله و قاله انت اخدت حاجة من المدام، يقوم يرد بكل بجاحة لا هى اللى اديتنى، يقوم الباشا يبص للمدام و يقولها مش عيب و انتى دكتورة و متعلمة تعرضى رشوة على موظف حكومى؟ وراح قايل لرجب، اديها فلوسها و محدش ياخد حاجة من حد تانى.

لا حول ولا قوة الا بالله

انا كنت زيك , اول مرة كنت بطلع الرخصة مدفعتش ولا مليم و الست بتاعت النظرى خلتنى اجاوب على سؤالين غلط و هى عارفة انهم غلط و كنت بسالها متاكدة ؟؟ تقولى عيييييييب ده انا ممكن اقولك ايه السؤال الجاى كمان , و طبعا عرفت ان السؤالين غلط و يا ريتنى ما سمعت كلامها و عرفت انها عملت كدا علشان مطلعتش لها " اصطباحة " يعنى فلوس ..

تانى مرة رحت دخلت على الموظف بتاع الشباك و كان الاختبار العملى هيبدا و لازم اخد الورق فى خلال خمس دقايق , قعدت اقولوا يا باشا هات الورق يا عم هات الورق يا سيدى هات الورق و هو عامل نفسه بيدور على الورق و مش لاقيه , قلت له اوك .

طلعت 10 جنيه و اديتهاله قالى ثانية يا باشا و راح قايم و طلع لى الورق فى 10 ثوانى ..

كذلك الرجل بتاع التصوير , كان هيقفل و ماشي و قلت له ازاى تمشي فى وقت العمل يعنى ! قالى تعالى بكره هكون موجود , و طبعا لو اشتكيت محدش هيسال فيا لان كل واحد عامل فيها مهم و مشغول ..

رحت مديله 10 هو كمان راح فاتح المكتب و مصورنى :(( ..

ده بقي العادى خلاص بجاحة عينى عينك ..

اقتباس:

---

المشاركة الأصلية كتبت بواسطة amroman2006

يا باشا نفس الكلام في مرور السلام

---

ونفس الكلام في مرور فيصل

كل اللي انت بتقوله ده على مرأى و مسمع من اكبر مسؤل في مصر

Hossam_Hassan سلوك أيجابي ياريت نحتذي حذوك

كل دة حصل معايا فى مرور مصر الجديدة بس على تقيل وكله بياكل عيش ويسترزق حاجة بقيت مقرفة البلد كلها ماشية كدة

هى الست ده لسه عايشة
اعوذ بالله من ده ناس
انا اخر مرة زعقتلها وهزقتها ولواء كان معدى ظبطها
واشتغلت زى التيييييييييييييييييييت

طيب ايه رأيكم يا جماعه. اننا نعمل موضوع بعنوان الصفحه السوداء في وحدات المرور... و نحط فيها اسم وحدة المرور واسم او صورة الموظف المرتشي او المهمل او المقصر...

ويا جماله لو كان الاسم والصوره.
احنا عاوزين نشهر الناس دي.
علشان تبقي وصمة عار في حق اولادهم ومعارفهم ورؤساؤهم...

على فكره دا حال 90 %من وحدات المرور مش وحده واحده ولا اثنين
وأنت بتتكلم على الموظفين ما بالك بقى بأمناء الشرطه وبعض الظباط
اللى طالعين واكلين نازلين واكلين فى مره واحد خد منى فلوس المخالفه ومدليش أيصال قلتول فى الأيصال قالى الدفتر خلص قلتلو يبقى مفيش مخالفه وتردلى فلوسى تانى رد عاليا قالى متقلقش هتدخل خزينه الحكومه مش جيبى وطبعا كان العكس قلتلو مفيش مشكله بس خليك فاكرهم عشان هعدى عليك فى وقت تانى أخد الأيصال

اغلب المصالح الحكومية فى مصر كده حاجه تقرف وتخليك حتطلع من هدومك ربنا يخرجنا منها على خير

كل وحدات المرور فيها فساد وعدم نظام وبيتعملوا مع الناس بشكل غير ادمى ، انا مبسوط جداً ان فى حد قدر يصور الكلام ده ونفسى كلنا نحاول نضبط اى فساد و ننشره على المنتدى ونبعته لكل الجهات المختصة يمكن حد منهم يتحرك .....