الموضوع: داخل علي عمرة...نصايحكم

المشاركة الأصلية كتبت بواسطة alzelafy

اعمل حسابك على 2000 جنيه و لازم الميكانيكى يكون امين عشان اعرف واحد اشترى طلبات للعمرة و الميكانيكى ركبلو الحاجات القديمه و العمرة باظت و لما فتح الموتور تانى ملقاش حاجه من اللى هوا جايبها راكبه يدوبك الشنبر بس

المشاركة الأصلية كتبت بواسطة ellawai

هات باستم ks الماني اصلي انا جبتهم في اللادا كانو ب 600 جنيه تقريباً
هات باقي الحاجه ايطالي اصلي و السبيكه بتبقي مصري تقريباً

جزاكم الله خيرا علي الاهتمام

النهاردة الظهر الموتور اتغسل غسلة كويسة وكان فيه الاتي
طقم شنبر
الصبابات عايزة تتغير
البساتم والميكانيكي نصح ببساتم استيراد
طقم جوانات+جوان وش سلندر
طفم اويلسيلات
طقم كاوتش صبابات
فلتر-ترس-ساعة زيت
بلية دبرياج
سير كاتينة ودينامو
طقم كهرباء كامل
انبوبة سيليكون
بلية درك(فولام)
زيت

بالنسبة للخراطة كانت الطلبات كالاتي
طقم سبيكة كرنك010
طقم سبيكة كامة010
هلالات كرنك
طقم بساتم استيراد(من عند الخراط)020
وكان التعليق ان دي اول عمرة للموتور
فاتورة الخراط كالاتي
1-خراطة سلندر 80
2-تجليخ كرنك 45
3-بورنج كراسي وبيلات 60
4-تجليخ كامة وتركيب جلب 40
5-عمل طبب كرنك 30
6-خراطة طبب بيلات 25
7-5 طبات مياه 25
8-طقم بستم استيراد 100
9-قواعد دلايات 90

المجموع 495 بطقم البستم الاستيراد
طبعا لسه ما دفعتش وحاسس انه زيادة
فهل السعر كويس؟
وهل البساتم الاستيراد دي كويسة؟
الجديد تايواني ومفيش تركي والميكانيكي بيقول انهم ما بيعيشوش كتير
ايه رايكم في الموضوع ده؟
وهل انا كده ماشي كويس ولا فيه ملاحظات؟
الدينامو والمارش ان شاء الله هوديهم بكرة للكهربائي يشوف فيهم ايه ويعملهم طقم اصلاح بالمرة بالاضافة لشوية سمكرة في الحوض

باذن الله تبقى عمره تمام
وربنا يسهلك الموضوع بس للاسف انا معرفش حاجه فى موضوع العمره دى خالص عمري معملته

المشاركة الأصلية كتبت بواسطة yuyu0000yuyu

باذن الله تبقى عمره تمام
وربنا يسهلك الموضوع بس للاسف انا معرفش حاجه فى موضوع العمره دى خالص عمري معملته

ربنا يكرمك وشكرا لذوقك
ربنا ما يكتب عليك تعمر لان دي قصة كبيرة

المشاركة الأصلية كتبت بواسطة samirayad

أهم شىء تكون مقاسات توسيع غرف الحريق صح
ومتناسبه مع البساتم اللى حتتغير بالشنابر الأكبر

ونفس الوضع بالنسبه لمقاسات خراطة الكرنك والكامه على السبايك الجديده

هو ده المهم علشان تضمن نجاح العمره

وياريت لو تحاول تمسكهم بمبلغ لحين تجربة المكنه بعد العمره
ومتدفعش كل الفلوس ( لو تقدر )

لأن الموضوع مكلف
بس يهمنا نجاحه

علشان المصاريف تكون فى السليم

ربنا يخليك يا بشمهندس علي سرعة الرد والاهتمام
لولا ان دي اول عمرة انا كنت ممكن افكر في تسقيط موتور تاني بس اللي سمعته منك ومن الاعضاء هنا ان العمرة بتكون افضل لانك عارف مكونات موتورك وايه اللي اتعمل فيها
ان شاء الله هخللي جزء من المبلغ لغاية ما ندور ونشوف ايه الاخبار
بالنسبة للخراطة فالانطباع الاول ان هما ناس امناء وفاهمين
هما ورشتين جنب بعض وماشاء الله مفيش وقت يتكلموا معاك الشغل كتير
بس برضه ربنا يخليلنا نايل موتورز عشان نفهم الموضوع ماشي ازاي ومانتكلش ع الصنايعية في كل الاحوال
هتعبك معايا في شوية اسئلة ع السريع كده
1-انا مغير طقم دبرياج كامل من سنة ونص
الميكانيكي بيقول الاسطوانة والديسك كويسين بس محتاج بلي ولقيت زباين عنده شافوا الاسطوانة وبيقولوا انها محتاجة تتغير لان الموتور هيبقي(شديد) عليها مين الاصح؟
علما ان معنديش رجة وانا طالع والكباري كنت بطلعها بصعوبة والفتيس بيبقي تقيل شوية اول ربع ساعة لما بطلع بالعربية بالرغم من التسخين
2-بالنسبة لبلية الدرك سمعت ان فيه بلية تانية علي نفس محور دورانها لازم تتغير هي كمان
اسمها ايه البلية دي؟
3-طلمبة الميه هل لازم تتغير علما ان الحرارة عندي لما توصل 90 المروحة بتشتغل وما بتزيدش عن كده(حاليا في الشتا)
4-موضوع المروحة اللي بتشتغل دايركت مع الموتور من غير ترموستات نصحني بيه الميكانيكي عشان الصيف والتليين هل اعملها ولا ليها تأثير سلبي(علي البطارية مثلا)؟
وهل لازم تتشال المروحة الموجودة حاليا؟
5-ازاي اتاكد من كفاءة طلمبة البنزين والزيت؟
6-ممكن التكلفة التقريبية للميكانيكي تكون كام؟والخراطة هل المصنعية كده معقولة ولا مبالغ فيها؟
7-الكربراتير بعافية حبتين ومحتاج طقم اصلاح حسب كلام الاخ الميكانيكي وبرضه الراي السائد في نايل موتورز ان الجديد افضل بس حاليا الماديات مش ولابد فهل اسيب الكربراتير علي حاله لغاية ما يتغير ولا اصلحه؟
مش عارف اشكرك ازاي يا بشمهندس ربنا يخليك لنايل موتورز وجزاكم الله خيرا