عادت الى نفسى بعد طول هروب ، خائفة منى أن اعاقبها على ما فعلته بى ، وحاولت طمأنتها



  • ياستى ماتخفيش.....هو أنا هعرف اعملك حاجة.....انتى قدرى



  • لالا.....انا زعلانة منك



  • انتى كمان زعلانة......وليه بقى ان شاء الله



  • يعنى أغيب عليك كل ده...ولا تسأل ولا تطمن عليا....مش يمكن حصلى حاجة


وقلت بدون أن تسمعنى.......روحى يابعيده........إلهى تروحى ماترجعى


  • بتقول ايه



  • لالا.....مابقولش حاجة.....كنت بقول انا كنت عارف انك هاترجعى........معلش كنت مشغول شوية.....وسيادتك كنتى فين بقى الفترة اللى فاتت دى كلها



  • ابدا......كنت بروق اعصابى شوية منك



  • شوفى يابنت الحلال.....باين كده ان احنا مش مرتاحين مع بعض......ومش متفاههمين خالص....انا رأيى إن كل واخد يروح لحاله احسن


وبدأت فى البكاء......


  • كده تتخلى عنى بسهولة.....وتسيبنى



  • ياستى انا مش بتخللى عنك ولا حاجة.......إنتى محسسانى انك خطيبتى مش نفسى ........بس احنا مش مبسوطين مع بعض .....فكل واحد يشوف راحته فين.......وباين أوى انك مش مقتنعة بيا ولا بأخلاقى



  • لا طبعا.....ده أنا معجبة بيك جدا.....ده انت جميل خالص .....وأوعدك انى مش هاضايقك تانى أبداااااااااااا



  • مانا سمعت الكلام ده قبل كده ميت مرة



  • لا خلاص ....أخر مرة



  • ماشى ياستى....أما أشوف.... ربنا يهديكى.......تعالى معايا علشان عندى كام مشوار كده عايز أعملهم...ولا تحبى تخليكى انتى واروح انا لوحدى



  • لا..لا..أنا هاجى معاك....بقالنا كتير مخرجناش مع بعض



  • ربنا يستر........تقعدى فى العربية وولاتفتحى بقك


وركبنا السيارة ، أنا ونفسى ، وجلست بالخلف ، وبينى وبينك عزيزى القارئ ، كنت خائفا منها و متوجسا أن تقوم بشئ ما، كأن تخنقنى من الخلف مثلا ، أوتضربنى بأى شئ على رأسى ، فأنت لا تعرفها
وقدت السيارة سيدى على طبيعتى ، وهى صامتة لا تتكلم ولا تعلق على أى شئ ، وسعدت بذلك كثيرا وقلت لها


  • انما ايه الحكاية يعنى....مالك كده ساكته ومبتتكلميش



  • لا مفيش.....علشان تعرف انى اتغيرت وبقيت كويسة



  • ربنا يهديكى كمان وكمان


وبدأت أصدق فعلا انها تغيرت ، فانى ارها الان هادئة ، حليمة ، لا تتحدث ولا تنتقد ......سبحان مغير الاحوال


  • انتى متأكده انك كويسة.....انتى زعلانة من حاجة؟.....طب سخنة ولا حاجة



  • لا ياحبيبى....وهازعل من ايه



  • يارب سترك


واثناء سيرى إذا بسيارة وتقودها امرأة تمر من جانبى ، وتنظر لى .....نظرة عادية .......جدا


  • هى بتبصلك كده ليه دى



  • ماخدتش بالى الحقيقة



  • لا اخدت......وبصيت......وضحكتلها كمان



  • أنا عملت كل ده.......ولا ضحكت ولا حاجة.....انتى عارفة أنا شكلى كده



  • شكلك كده ازاى يعنى......بتضحك على طول....ده انت حتى نكدى وكشرى ودمك تقيل



  • اه فعلا انا بحب الكشرى قوى وخصوصا بالشطة



  • انت بتهزر كمان ياخفيف


وابتسمت ابتسامة عريضة ، وقلت لها


  • ايه ده......انتى بتغيرى عليا ولا ايه



  • انا......أغير......ليه يعنى......انت بس المفروض تحترم نفسك اللى راكبة معاك العربية


وضحكت بصوت عالى


  • لالا....انتى بتغيرى عليا........باين أوى....



  • أنا ...أغير عليك انت!!!!...وانت تطلع ايه انت اساسا



  • طب خلاص.....مفيش داعى للغلط.......محصلش حاجة


وبدون أن أشعر ، زدت من سرعتى ، ولحقت بالسيارة المقصودة ، وأنا بجانبها ، نظرت لها وابتسمت ، وانتظرت لأرى ماذا ستفعل نفسى تجاه هذا الموقف

وياليتنى مافعلت....وقبل أن يعود فمى لطبيعته وينتهى من ابتسامته العريضة، اذا بصوت طرقعة ، يصدر من الخلف ، نعم سيدى ، انها ضربة قوية موجهة على هذا الجزء فى جسم الانسان من خلف الوجه المسمى بالقفا

  • علشان تحرم وتحترم نفسك...اللى هى أنا


ولم أدرى ياسيدى ماذا أفعل ، فانا لا استطيع أن أرد الضربة بالمثل ، أولا ....لأن نفسى ليس لها قفا ، ثانيا.... لأنى لا استطيع أن أضرب أى شئ مؤنث ....والأهم أننى كنت سعيد لأننى أحسست ولأول مرة أن نفسى تحبنى

وأوقفت السيارة ، ونظرت للخلف ، فاذا بها تهرب مرة أخرى ، ولكن هذه المرة........هى الغاضبة...... وليس أنا



الجزء الاول

http://www.nilemotors.net/Nile/101790-a.html


.