شوفتوا إنتوا ظلمتوا الراجل إزاى؟!!! .....

بالطبع فاكرين اللى حصل مع الأخ مينا
و كنتوا طالبين توضيح منه


أنا هقول اللى حصل من الأول
الأخ مينا جه و عمل موضوع بيحكى معجزة خاصة بأشخاص مسيحيين و لم يذكر أى شىء عن الدين سواء بآيات أو بعقائد ... كل ما ذكره فقط هو قصة معجزة

فهم بعض الأعضاء أن الأخ مينا كان يقصد يجرح مشاعر المسلمين أو يهزأ بدينهم
و بدأ الهجوم من واحد تلو الأخر
و طبعاً كان فى اللى بيدافعوا عن الأخ مينا فى حقه فى نشر مواضيع زى ديه

المهم خلص الموضوع إن الأستاذ ميمو حفناوى جه و قفل الموضوع لكن قبل ما يقفل الموضوع منسيش يقول رأيه إن ده كلام لا يصدقه عقل و طبعاً أنا مش موافق حضرتك على الكلام ده ... كان ممكن حضرتك تكتبه فى رد تانى كعضو و ليس كفرد من الإدارة (يا ريت حضرتك متضايقش من كلامى بس ده اللى حصل) ... المهم حصل خير و إتقفل الموضوع

أنا طلبت من الأخ مينا فى رسالة خاصة يقوللى لو فى حد هاجمه فى رسائل خاصة (طبعاً لو هو موافق يقوللى) و يوضحلى ليه هو نشر الموضوع ده

و كان رده :

اقتباس:

---

سيدي العزيز...
شكرا لإهتمامك أولا و لكنني عاهدت نفسي الا أعود لهذا المنتدى مرة أخرى نظرا للهجوم الذي تعرضت له بضراوة و بعدم احترام لديني أو لكوني قبطي مصري,و أن ما قام به الزملاء أمثال من وصفوا صورة حبيبي البابا كيرس بالصورة المستفزة أو بغيرها من الأوصاف و الإستخفاف و الشتائم البشعة.....الخ
فلا يحتاج احد لأن يرسل شيئ على الخاص لأنهم قاموا بالواجب و زيادة على العام
و أيضا عدم اتخاذ أي إجراء من قبل الادارة إلا بالحذف لموضوعي و الذي يتشابه من الكثير من الموضوعات الإسلامية التي تحث ايضا على الأخلاق الحسنة و صلاح المجتمع و عدم اليأس من رحمة الرب

و لكن أن ما حدث من أصحاب دين السماحة و التراحم لا يدل على أنهم كما يقولون فعلا
بالرغم ان اغلب اصدقائي الأعزاء من المسلمين و لكنم قد يكونوا طفرة أم انهم يظهروا ما لا يبطنوا
و تستمر الأصولية في بلادنا تعبر عن وضع الأقليات كما هو واضح مما حدث معي ... و لسذاجتي ظننت نفسي مخطئا فيما اسمعه أو أقرأه
ولكن يبدوا أنها الحقيقة للأسف

لك حق التصرف بالنشر أو الحذف

و أعيادا سعيدة علينا جميعا

---

و أدينى نشرت رده للناس اللى كانت بتطلب توضيح

و واضح طبعاً الفكرة اللى أخدها .......

و أنا حاولت أقنعه إن المنتدى فيه ناس محترمة و دافعوا عنه و اللى غلط فيه أخد إنذار من الإدارة زى ما أستاذ ميمو قاللى.

لكنه أصر على ترك المنتدى
و طلبت منه نشر التوضيح بنفسه ... لكنه قاللى : كفاية اللى حصل بس صدقني مش قادر اهين نفسي اكتر من كده

أنا هنا مش بحاول أفتح مواضيع قديمة ... أنا عاوزكم تستفادوا من اللى حصل و منقعدش نقفل فى مواضيع من غير ما نشوف حل........

و بلاش نتسرع فى الحكم على الناس !!! :(

و كما توفعت و الله يا Meza طلع الراجل محترم و مظلوم من الاعضاء اللي كانوا قاسيين في الرد عليه بلا مبرر
بس انا فعلا زعلت من الموقف الشبه جماعي من الاعضاء عليه
بس خلاص خير
و يا ريت مينا مش يزعل
شكرا يا ميزا انك كلمته علي الخاص و اهتميت علشان نعرف الحقيقة

يا اخ ميزا كل عضو مسؤل عن ارائة وردودة، وادارة المنتدى وظيفتها التنظيم اي ان تحذف ما يخالف من هذه الردود ومحاسبة اصحابها اذا لزم الامر وهو ما قد حدث بالفعل وانت على علم بهذا، والاخ مينا يشاهد في هذه اللحظه هذا الموضوع ... يعني لم ينسحب كما قلت انت ... الموضوع انتهى ولن يفتح مرة اخرى وكل عام والجميع بخير وعيد سعيد.

أنا لم أقصد إنى أفتح الموضوع مرة أخرى يا أستاذ نادر... أنا عاوز أناقش مشكلة و كان فى أعضاء طلبوا توضيح من الأخ مينا و ده اللى أنا عملته .... و مش كل ما يبقى فى مشكلة نقفل عليها من غير ما نحلها و بالتالى هتتكرر ...
و لو الموضوع ده تحول لحاجة تانية أنا هطلب من الإدارة تقفله .... لكن إحنا ممكن نستفاد من اللى حصل عشان ميتكررش ...

و بالنسبة للى عملته الإدارة .. أحب أوضح لحضرتك إن فى ردود فيها هجوم على الأستاذ مينا فى كام موضوع شارك فيه و لم يتم حذفها أو حتى التعامل معها .... إلا فى موضوع واحد تم غلقه تماماً ... رغم إن كان ممكن يتم حذف المشاركات المخالفة فقط بدون غلق الموضوع ..

كمان هو قاللى إنه هينسحب ممكن يكون قصده إنه مش هيشارك فى المنتدى تانى و كمان هو من حقه يتابع اللى أنا نشرته على لسانه ...

و كل سنة و إنت طيب يا أستاذ نادر ...

إعادة فتح الموضوع مرة أخرى لن تحل أى شئ ولن تغير أى شئ، كما أن رد مينا لم يظهر أنه ظالم أو مظلوم ، ولو سمحت يا أخ ميزا ياريت فعلا نكتفى بهذا القدر طالما الموضوع أساسا لا يخصك.

أنا عندى رأى فى الموضوع، أو بمعنى أصح طلب من أخونا مينا و ياريت تنقله له يا ميزا يا أخويا، و الطلب انه يا ريت يشرفنا فى المقابلة الجاية، أولا لنتشرف بمقابلته و ثانيا ليرى بنفسه ان الصورة مش بالقتامة اللى هو راسمها لأن ما قاله عن علاقته الطيبة بأصدقائه المسلمين ما هو الا واقع مجتمعنا و أى شىء غير كده بيكون سوء تفاهم و قلة اطلاع على الأوتار الحساسة فى الديانات المختلفة و التى قد يستغلها البعض لخلق الفتنة.

يا مينا يا أخويا ان شاء الله مستنى اشوفك فى المقابلة

اقتباس:

---

المشاركة الأصلية كتبت بواسطة Hossam Hassan

أنا عندى رأى فى الموضوع، أو بمعنى أصح طلب من أخونا مينا و ياريت تنقله له يا ميزا يا أخويا، و الطلب انه يا ريت يشرفنا فى المقابلة الجاية، أولا لنتشرف بمقابلته و ثانيا ليرى بنفسه ان الصورة مش بالقتامة اللى هو راسمها لأن ما قاله عن علاقته الطيبة بأصدقائه المسلمين ما هو الا واقع مجتمعنا و أى شىء غير كده بيكون سوء تفاهم و قلة اطلاع على الأوتار الحساسة فى الديانات المختلفة و التى قد يستغلها البعض لخلق الفتنة.

يا مينا يا أخويا ان شاء الله مستنى اشوفك فى المقابلة

---

+1

الأخ مينا فعلا انسان محترم , لم يسيء الى اي شخص من قبل. و يا ريت فعلا نشوفه المقابله الجايه

أنا بجد معرفهوش غير من المنتدى

ممكن حضراتكم تطلبوا منه إنه يجى المقابلة على الخاص ... و أكيد هو هيكون سعيد بحكاية زى دى


و أنا برضه نفسى أجى المقابلة و متأكد إنى هلاقى ناس محترمة جداً و ده اللى بيميز نايل موتورز ...

إن شاء الله ألاقى وقت و يلغوا الإمتحانات كده شوية و يريحونا :rolleyes: .... قولوا أمين :D

اقتباس:

---

أنا هنا مش بحاول أفتح مواضيع قديمة ... أنا عاوزكم تستفادوا من اللى حصل و منقعدش نقفل فى مواضيع من غير ما نشوف حل

---

الأخ العزيز ميزا
إذا لم تكن تحاول فتح موضوعات قديمة ، وإذا كنت معترض على قفل المواضيع من غير ما نشوف حل .. فما هو الغرض وراء هذه الرسالة غير المفهومة .
واسمح لي أن أضع بعض النقاط على الحروف في هذه الرسالة التي قمت بإرسالها بالنيابة عن أخيك العزيز مينا .

• أنت تعلم أنك قمت بطلب لتدخل الإدارة ، وقامت الإدارة بواجبها وأكثر حيث أنذرت المخالفين ، وأغلقت الموضوع بناء على طلبك أنت ، وحذفت الموضوع لما يحتويه من إهانات من وجهة نظرك أنت ، حيث كنت أنت المتصدي لكل الأمور نيابة عن مينا ، وأعتقد أنه ليس من اللائق على الإطلاق أن تهاجم الإدارة لكونها استجابت لطلباتك ، وفعلت ما يمليه عليها واجبها بالتصدي لأي فتنة .
• وعلى هذا فإذا كنت ترى أن حذف الموضوع أمر غير سليم ، فالإدارة على استعداد لإعادة فتح الموضوع مرة أخرى ، وسحب الإنذارات من المخالفين ، وترك الأمر للأعضاء ، فهذا هو البديل الوحيد المطروح بعد كل الإجراءات التي تم اتخاذها .. أليس كذلك .. وإن لم يكن هذا هو الخيار الذي تريد ، فرجاء أن تذكر لي تحديداً ما هو الإجراء الذي تريده بصدق ووضوح وشفافية .
• لم أر في رد مينا أي بعد إيجابي كما ادعيت ، بل إنني أجد فيه سيلاً عارماً من الاتهامات غير المقبولة التي تمس هذا المنتدى وإدارته . والتي تمثلت في :

a. عدم احترام الدين المسيحي أو استهدافه لكونه قبطي مصري .
b. الادعاء بأن حذف الموضوع كان بمثابة العقاب له .
c. التعريض بالدين الإسلامي (دين السماحة ) واتباعه الذين يظهرون خلاف ما يبطنون .
d. الاتهام الرخيص بأننا منتدى أصولي يضطهد الأقليات .

• وهذه الأمور السابقة تكفي لإشعال فتنة في المنتدى وليس لتبرئة ساحة هذا المدعو مينا .
• مسألة تركه للمنتدى ، وسعيك الدؤوب لإقناعه أن هذا المنتدى به أناس محترمة تدل على عدم الصدق مع النفس ، فكيف ترك المنتدى وكيف تابع الردود ، وكيف تلقى رسالتك الخاصة ، إذاً هو لم يترك المنتدى ولا حاجة ، ولو أراد أن يترك المنتدى فليفعل فهذه حريته الشخصية ، أما أن يستغلك ليثير فتن ويلقي اتهامات جزافية على المنتدى والإدارة فهذا أمر يؤكد بصرامة عدم وجود نية خالصة وسوية لديه .
• انت ذكرت ألا نتسرع في الحكم على الناس ، وها نحن لا نتسرع ونعطي كل ذي حق حقه ، وأعيد التأكيد أنه لو رغبت في إعادة فتح الموضوع مرة أخرى فسنفعل .
• ذكرت في ردك الثاني أن هناك ردود فيها هجوم على مينا في الموضوعات التي شارك فيها ولم يتم حذفها ولا التعامل معها ، وكان حري بك أن تراجع هذه الموضوعات لتتأكد من حذف كل هذه الإهانات قبل أن تلقي بالتهم جزافاً .
• مسألة تعليقك على رد ميمو حفناوي على ان المعجزة المذكورة لا يصدقها عقل ، فخبرني أنت أي معجزة في الدنيا قابلة للتصديق العقلي ، إن أساس أي معجزة هو مناقضتها للعقل والعادة ، وتظهر لتدعيم الإيمان في النفوس .. أليس كذلك ؟؟
• تلقت الإدارة الكثير من طلبات الإخوة المسيحيين أنفسهم بغلق الموضوع لأسباب دينية مسيحية ، ولو أردت قائمة بهؤلاء الأعضاء الذين طلبوا هذا لأرسلناها إليك .

الخلاصة : أظن أنه من الواجب علينا جميعاً أن نرتفع عن هذه الأمور ، وألا نجعل من أنفسنا أدوات لمن يريد أن يوقع بيننا العداوة والبغضاء والمشاحنة بقصد وسوء نية ، أو من دون قصد وحسن نية ، واعلم أن هذا المنتدى يفترض في جميع أعضائه حسن النية ونبل الغاية ، ومرحباً بك وبجميع المصريين أياً كانت انتماءاتهم العقدية أو المذهبية أو الفكرية إخواناً أعزاء ، نتكاتف معاً لتحقيق أهداف المنتدى دون أن نسيء لبعضنا البعض .
تقبل خالص مودتي

أستاذى الفاضل دكتور أحمد سمير

بعد قرائتى لرسالتك ... أحسست بإنى بالفعل أخطأت فى بعض الأمور ... و أعترف بذلك
أنا كبرت حاجات زيادة عن اللزوم و فى نفس الوقت تجاهلت حاجات تانية

بس صدقنى أنا نيتى كويسة .. أنا كنت عاوز الأعضاء اللى أخطائوا فى حق مينا ميكرروش ده مع أى حد تانى .. لو إتكرر نفس الموضوع .

و أنا يا أستاذى لم أهاجم الإدارة .. أنا إعترضت إن الأستاذ ميمو يبدى رأيه كفرد من الإدارة و ليس كعضو ... و دى بصراحة حاجة صغيرة أنا مش شايف إنها تستاهل ده كله .. بس كنت عاوز أوضحها بس ... لكن واضح إنها إتفهت إنى بهاجم الإدارة .. و أعتذر على ذلك للأستاذ ميمو و لحضرتك.

بالنسبة لتعامل الإدارة مع الموضوع .. أنا بالفعل طلبت غلق الموضوع و الإدارة مشكورة قامت بغلقه .. لكن كان فيه موضوع تانى (و ده اللى كنت أقصده) شارك فيه الأخ مينا و هاجمه عضو من الأعضاء و أنا دافعت عنه و بدل ما الإدارة ما تحذف مشاركة العضو المخالف قامت بغلق الموضوع و حذفه بعد عدة أيام .. و ده مبالغة فى التعامل مع المخالفات

و برضه حضرتك فيه موضوع تانى (يخص أحد الأعضاء قام بعرض صور سيارته السيفيك) برضه شارك فيه الأستاذ مينا و هاجمه نفس العضو للمرة التانية ..... و قبل ما أكتب الموضوع ده رحت شفته و لقيت إن الإدارة لم تتعامل مع المخالفة أو حتى حذفت المشاركة .... لكن ممكن تكون الإدارة مأخدتش بالها من المخالفة دى. ... و ده عادى
و أنا مش هينفع أهاجم إدارة المنتدى و فى نفس الوقت أشكر فيها ... و هى بالفعل إدارة محترمة و عادلة ... و ده مش نفاق .

بالنسبة لقول حضرتك إن اللى ذكره الأستاذ مينا فى رسالته كافى لإشعال فتنة فى المنتدى .... حضرتك أنا معرفش نيته لأنى عمرى ما قابلته....عشان كده أنا نشرت رسالته كما هى
لكن ملاحظتى من كلامى معاه و بعد إطلاعى على مشاركاته إنه ميقصدش أى حاجة ... والله أعلم. ... بس الفكرة بلاش تكون أول حاجة فى دماغنا هى سوء نية العضو ... لأنى بصراحة مشفتش أى حاجة تدل على سوء النية .... ممكن تكون حضرتك لاحظت حاجة و أنا مأخدتش بالى منها.
و الغضب اللى ظهر فى رسالته قد يكون سببه الهجوم غير المبرر من بعض الأعضاء عليه.

و أنا هدفى من الموضوع هو التوضيح لا أكثر عشان محدش يتظلم.

و حضرتك أنا أعتز بإنى عضو فى هذا المنتدى و عمرى ما فكرت إنى أسئ ليه أو لأى عضو.

و خالص إحترامى لك دكتور أحمد و أعتذر لحضرتك و للإدارة عن الأخطاء اللى وقعت فيها. :)

و لو يا دكتور أحمد حضرتك شايف أو الإدارة ... إن الموضوع ده ممكن ميفدش حد أو هيضر أكتر ما يفيد

حضرتك ممكن تقفله و أنا هوافق على قرار حضرتك مهما كان

:eek: و مش هرجع أقول قفلتوه ليه :D

أعزائى الأعزاء
لا إلله إلا الله محمد رسول الله

أستأذنكم لى راى مختلف

فى موضوع عن ما هى الاقتراحات لحل أزمة ازدحام المرور فى مصر.

كانت احدى المشاركات لعضو مسلم عن حرمانية التحكم فى عدد المواليد ... و استعان بأيات
من القرآن و الحديث ... الخ

و لم يقم أحد بالتعليق على استعانته بالدين فى الموضوع او للرد على موضوع.

و بالتالى حين يقوم عضو مسيحى بكتابة ما يشاء عن المسيحية .

فـلـــــه هـــــــــذا ...

أما لا كلام عن الدين بأى شكل
أو
فليتكلم كل منا بما شاء عن دينه

و العبد لله مع الرأى الثانى

و للعضو الذى يقرأ أن يعقب على المشاركة أو لا يفعل

يجب أن نخرج من عنق الزجاجة الذى يقول
مسيحى و مسلم

دعونا نلعب منتخب ...

اقتباس:

---

المشاركة الأصلية كتبت بواسطة Hossam Hassan

أنا عندى رأى فى الموضوع، أو بمعنى أصح طلب من أخونا مينا و ياريت تنقله له يا ميزا يا أخويا، و الطلب انه يا ريت يشرفنا فى المقابلة الجاية، أولا لنتشرف بمقابلته و ثانيا ليرى بنفسه ان الصورة مش بالقتامة اللى هو راسمها لأن ما قاله عن علاقته الطيبة بأصدقائه المسلمين ما هو الا واقع مجتمعنا و أى شىء غير كده بيكون سوء تفاهم و قلة اطلاع على الأوتار الحساسة فى الديانات المختلفة و التى قد يستغلها البعض لخلق الفتنة.

يا مينا يا أخويا ان شاء الله مستنى اشوفك فى المقابلة

---

فعلا بما إن الاستاذ مينا بيتابع الردود فى المنتدى و لم ينسحب فأرجو منه الحضور المقابلة القادمة للمنتدى و طبعا حضور الأستاذ Meza كمان
أرجو من الاستاذ مينا و Meza قبول دعوة أعضاء المنتدى و عدم رفضها
حتى لو عندك إمتحانات يا Meza ساعة واحدة مش حتفرق معاك و متهيألى المقابلة دى حتكون أحسن من أى موضوع يكتب و ممكن تقرب الجميع من بعض لذا أرجو منك حضورها و إقناع أستاذ مينا بالحضور

منتظرين رد مينا و Meza

على فكرة انا زعلت من حجم وكيفية الردود
هوا لما حد بيروح يشتري قطع غيار من التوفيقية وللا من وكالة البلح و يدخل المحل و يشوف صور السيدة العذراء و السيد المسيح و كثير من القديسين و الأنبوات , هل يقدر يفتح بقه و يقول صور مستفزة؟؟؟؟؟؟
وهل بيحس انها مستفزة من أساسه؟؟؟؟؟؟

لا والله ؟ دي بلدهم زي ماهي بلدنا ان ماكانش اكتر و الرسول وصى عليهم (وأدخل رسل المقوقس حاكم مصر الذين حضروا مع السيدة مارية (((القبطية)) أم المؤمنين الى المسجد النبو ليصلوا صلاة المسيحية.

الراجل ماغلطش
و ماقالش حاجة عيب
واللي علق لحساسية الموقف , كان أولى يحسب كلامه لحساسية الموقف
و الصورة مش مستفزة (بالنسبة ليل على الأقل)

أنا اسف يا مينا على اللي حصل
ويا ريت ترجع للمنتدى مش كلام كام واحد(مع احترامي للكل مش قصدي الاهانة - قصدي قلة العدد) هايمشوك من المنتدى .
في كتير عادي يا عم تعالى تاني , أنا مستني أشوف مشاركتك ولو على الخاص

انا اكيد مش هاعرف اقول كلام تاني حلو بعد كلام شاركي و احمد سامي
الا اني بكرر كلامي في الموضوع الاولاني
ان المنتدى و الشارع و الحي و المدينة و البلد بتوعنا كلنا مصريين .. مسلمين و مسيحيين
و اكيد كل الرموز المسيحية و الاشخاص و المقدسات ليها منا كل احترام و تقدير
و قبل ما ميزا يرد و يدافع عن مينا ..شوفوا في كام واحد مسلم رد ردود ايجابية
الدنيا بسيطة متكلكعوهاش
مرحبا بالجميع

والله ردودكم تفتح النفس ..... شكراً ليكم كلكم

و أنا يا أستاذ شاركى نفسى من أول ما عرفت موضوع المقابلات ده إنى أجى و أتعرف على الأساتذة المحترمين أعضاء المنتدى ... لكن مشكلتى تتلخص فى الوقت ... فعلاً السنة دى فى الكلية صعبة جداً و مش عاتقينا من الإمتحانات .. حتى أجازة العيد لازم نذاكر فيها عشان عندنا إمتحان بعد العيد بيومين ....... أنا هحاول أجى بس أرجوكم تعذرونى لو مقدرتش .

و شكراً أستاذ شاركى و كل الأعضاء على دعوتكم الجميلة.

اقتباس:

---

المشاركة الأصلية كتبت بواسطة الريس

انا اكيد مش هاعرف اقول كلام تاني حلو بعد كلام شاركي و احمد سامي

---

ياباشا كلك ذوق

يا اخوانى يا ريت كلنا نعمل زى ما ربنا قال
" لكم دينكم ولى دينى"

بسم الله الرحمن الرحيم ((لن ترضي عنك اليهود والنصاري حتي تتبع ملتهم)) صدق الله العظيم .......... الاخ اللي اسمه ميزا بيقول ان احنا بنظهر عكس ما نبطن من ناحيتهم والكلام ده هما اللي اساتذة في مش احنا. وبعدين اساسا المسيحيين مابيصحبوش غير بعض وانا في منطقة فيها مسحيين كتيير ومابيصحبوش غير بعض واللي بيقول غير كده يجي يشوف هما اساسا مش بيحبونا فبلاش الكلام ده. هم اساسا ميعنوش لينا شئ نحبهم او مانحبهومش دي مابتفرقش معانا ولا عايزنهم يحبونا وكل واحد يخليه في دينه احسن وياريت بقي يا عم ميزا انت كفاية كدة مش قصة هي كل شوية تفتح الموضوع ده طالما مالكش دعوة بيه يبقي صاحب الموضوع هو اللي يتكلم مش عايز يرد و يتكلم هو حر

اقتباس:

---

المشاركة الأصلية كتبت بواسطة ahmed_gamal

بسم الله الرحمن الرحيم ((لن ترضي عنك اليهود والنصاري حتي تتبع ملتهم)) صدق الله العظيم .......... الاخ اللي اسمه ميزا بيقول ان احنا بنظهر عكس ما نبطن من ناحيتهم والكلام ده هما اللي اساتذة في مش احنا. وبعدين اساسا المسيحيين مابيصحبوش غير بعض وانا في منطقة فيها مسحيين كتيير ومابيصحبوش غير بعض واللي بيقول غير كده يجي يشوف هما اساسا مش بيحبونا فبلاش الكلام ده. هم اساسا ميعنوش لينا شئ نحبهم او مانحبهومش دي مابتفرقش معانا ولا عايزنهم يحبونا وكل واحد يخليه في دينه احسن وياريت بقي يا عم ميزا انت كفاية كدة مش قصة هي كل شوية تفتح الموضوع ده طالما مالكش دعوة بيه يبقي صاحب الموضوع هو اللي يتكلم مش عايز يرد و يتكلم هو حر

---

مبدئيا : ارجو من حضرتك انك تهتم شوية لما تيجي تنقل اية من القرآن .. لانك كاتب من دماغك وكاتب غلط
{وَلَن تَرْضَى عَنكَ الْيَهُودُ وَلاَ النَّصَارَى حَتَّى تَتَّبِعَ مِلَّتَهُمْ قُلْ إِنَّ هُدَى اللّهِ هُوَ الْهُدَى ....}البقرة120
كفاية استهتار بقى في التعامل مع القرآن .. ده كلام مش مقبول.. ده غير ان الاية وردت في سياق مختلف تماما .. و ممكن ابعت لك اسباب النزول على الخاص .. لو عاوز

ثانيا: اكيد تعميمك غلط على الاخوة المسيحيين .. وعلى اي حال.. هواحنا بنعامل الناس باخلاقهم ولا باللي الاسلام بيؤمرنا بيه .. يا راجل يا مؤمن يا مسلم ياللي بتنقل القرآن غلط افتكر فعل الرسول صلى الله عليه وسلم مع جيرانه من اليهود .. افتكر ان من اول من بشر بنبوته هو ورقة بن نوفل وافتكر ان الرسول تزوج مسيحية و يهودية كمان
ثالثا: انت بتتكلم بصيغة الجمع .. ده تفخيم و لا معاك حد و لا ايه بالضبط

اقتباس:

---

المشاركة الأصلية كتبت بواسطة ahmed_gamal

بسم الله الرحمن الرحيم ((لن ترضي عنك اليهود والنصاري حتي تتبع ملتهم)) صدق الله العظيم .......... الاخ اللي اسمه ميزا بيقول ان احنا بنظهر عكس ما نبطن من ناحيتهم والكلام ده هما اللي اساتذة في مش احنا. وبعدين اساسا المسيحيين مابيصحبوش غير بعض وانا في منطقة فيها مسحيين كتيير ومابيصحبوش غير بعض واللي بيقول غير كده يجي يشوف هما اساسا مش بيحبونا فبلاش الكلام ده. هم اساسا ميعنوش لينا شئ نحبهم او مانحبهومش دي مابتفرقش معانا ولا عايزنهم يحبونا وكل واحد يخليه في دينه احسن وياريت بقي يا عم ميزا انت كفاية كدة مش قصة هي كل شوية تفتح الموضوع ده طالما مالكش دعوة بيه يبقي صاحب الموضوع هو اللي يتكلم مش عايز يرد و يتكلم هو حر

---

بعد اذنك يا اخ احمد... يا ريت لو ليك وجهه نظر (شخصيه) متعممهاش على الجميع.. يعني انت حر في رأيك... بس متتكلمش بلسان الجميع. يعني كلام من نوع "هم اساسا ميعنوش لينا شئ نحبهم او مانحبهومش دي مابتفرقش معانا ولا عايزنهم يحبونا وكل واحد يخليه في دينه احسن" حضرتك مش من حقك تقوله لأنك مش ممثل للجميع.

الكلام اللي حضرتك بتقوله ده غلط في غلط و عاري تماما عن الصحه.

السادة والاخوة اعضاء المنتدى الاعزاء
اعتقد ان الامر سوف يتطور الى امور لانرغب فى الدخول فيها وهى امور يجب ان نبتعد عنها وهى خط الدين ومن قال ومن لم يقل واننى اؤيد الاخ الدكتور احمد فى توضيحة الاول ، واتمنى ان يستوعب من لم يستوعب كلماتة ، ويجب إلا نحاول الدخول فى امور فلسفية وبيزانطية خاصة بالديانات وكفى ما قيل حتى الان وارجوا ان تتدخل الادارة واقفال الموضوع وللجميع منا كل الحب والتقدير 0

انا اسف علي خطئي في نقل الاية بس انا كنت بكتب بسرعة وبدل ما اعمل معاينة للموضوع عملت رد سريع بس انا فعلا والله حافظ الاية صح بس كتبتها غلط و ده مايعفينيش من الخطا انا عارف ياريت يا استاذ ريس تتقبل اعتذاري لهذا الخطا و ثانيا اللي انا اعرفة ان مش كل ايه ليها سبب نزول و بصيت في ايسر التفاسير مالقتش سبب نزول ليها لو ليها سبب فعلا ياريت تبعتهولي علي الخاص لاني فعلا عايز اتكلم معاك وانا مش بفخم من نفسي ولا حاجة بس كل المسلمين اللي قبلتهم واللي اعرفهم رايهم من راي و انا بجمع علشان كدة مش اكتر

اقتباس:

---

وانا مش بفخم من نفسي ولا حاجة بس كل المسلمين اللي قبلتهم واللي اعرفهم رايهم من راي و انا بجمع علشان كدة مش اكتر

---

مره تانيه... تعميم غير مقبول

خلاص يا جماعة ... الموضوع مش مستاهل

اللى مش قابل من جواه إنه يتعامل مع المسيحيين أو واخد فكرة وحشة عنهم ... خلاص هو هيفضل كده و مش هيتغير .. و هو حر محدش هيغصب عليه

و بعدين يا أستاذ أحمد جمال
أنا مغلطش فيك عشان تنادينى بالأخ اللى إسمه ميزا
حضرتك هو فى خلاف شخصى بينى و بينك .. أو أنا زعلتك فى حاجة
حضرتك مش عاوز تتعامل مع المسيحيين .... إنت حر ... لكن دى حدودك .. و مش من حقك تتكلم عليهم بطريقة وحشة.

ثانياً حضرتك لو هتتعامل معايا أو مع أى حد على أساس دينه ... يبقى حضرتك عمرك ما هتقبل الأخر ... و دى بصراحة مشكلة كبيرة.
و كمان كلامك إن هما بيصاحبوا بعض و مش بيرضوا يصاحبوا مسلمين .. ده فعلاً موجود ... لكن المشكلة من الناحيتين مش من ناحيتهم بس.

ثالثاً أنا عمرى ما قلت فى المنتدى إنى مسيحى و حضراتكم ممكن تراجعوا كل مشاركاتى... لأنى عاوزكم تعاملونى على إنى مصرى .. عايش معاكم فى نفس البلد.

و دفاعى عن مينا .. صدقونى مش عشان هو مسيحى زيى ... لكن فى ناس إفترت عليه و لغاية دلوقتى .. عشان كده أنا دافعت عنه.... و لو حصل الموضوع ده مع أى حد أنا هدافع عنه ..مهما كان إعتقاده ... وحصل قبل كده مع واحد إتقال إنه ملحد.

و لو حضراتكم هيكون التعامل معايا على أساس إنى مسيحى و نقعد نجامل فى بعض ... خلاص حضراتكم ممكن تقولولى و أنا هنسحب من المنتدى ... لأنى فشلت إنى أخلى الناس اللى هتعامل معاها متبصش لدينى و تبص إنى مصرى.

اقتباس:

---

المشاركة الأصلية كتبت بواسطة meza

خلاص يا جماعة ... الموضوع مش مستاهل

اللى مش قابل من جواه إنه يتعامل مع المسيحيين أو واخد فكرة وحشة عنهم ... خلاص هو هيفضل كده و مش هيتغير .. و هو حر محدش هيغصب عليه

و بعدين يا أستاذ أحمد جمال
أنا مغلطش فيك عشان تنادينى بالأخ اللى إسمه ميزا
حضرتك هو فى خلاف شخصى بينى و بينك .. أو أنا زعلتك فى حاجة
حضرتك مش عاوز تتعامل مع المسيحيين .... إنت حر ... لكن دى حدودك .. و مش من حقك تتكلم عليهم بطريقة وحشة.

ثانياً حضرتك لو هتتعامل معايا أو مع أى حد على أساس دينه ... يبقى حضرتك عمرك ما هتقبل الأخر ... و دى بصراحة مشكلة كبيرة.
و كمان كلامك إن هما بيصاحبوا بعض و مش بيرضوا يصاحبوا مسلمين .. ده فعلاً موجود ... لكن المشكلة من الناحيتين مش من ناحيتهم بس.

ثالثاً أنا عمرى ما قلت فى المنتدى إنى مسيحى و حضراتكم ممكن تراجعوا كل مشاركاتى... لأنى عاوزكم تعاملونى على إنى مصرى .. عايش معاكم فى نفس البلد.

و دفاعى عن مينا .. صدقونى مش عشان هو مسيحى زيى ... لكن فى ناس إفترت عليه و لغاية دلوقتى .. عشان كده أنا دافعت عنه.... و لو حصل الموضوع ده مع أى حد أنا هدافع عنه ..مهما كان إعتقاده ... وحصل قبل كده مع واحد إتقال إنه ملحد.

و لو حضراتكم هيكون التعامل معايا على أساس إنى مسيحى و نقعد نجامل فى بعض ... خلاص حضراتكم ممكن تقولولى و أنا هنسحب من المنتدى ... لأنى فشلت إنى أخلى الناس اللى هتعامل معاها متبصش لدينى و تبص إنى مصرى.

---

استاذ ميزا ..
في حاجة في ادب و علم الحوار .. اسمها الصمت الجميل
يعني ايه
يعني حضرتك شايف اتجاه ما .. ايجابي من كثير من الاعضاء لتخطي الموقف .. و حتى لما الاستاذ احمد جمال رد باندفاع انا و غيري ردينا عليه
ممكن افهم عاوز ايه؟
ابسط شيء انك لا ترد باعتبار غيرك رد
حتى لا يبدو انك تريد ان توقد نارا كلما اطفأناها
ده اولا
ثانيا .. لو احمد جمال تجاوز في كلامه .. مينا كمان تجاوز كما وضح لك الاخ احمد سمير
و كل اللي ردوا بعد كده تجاوزوا عن تجاوزات مينا على اعتبار انه تمت الاشارة ليها
يعني الصمت الجميل اللي بحاول احكيلك عليه
ثالثا كلامك ان لسة في ناس بتفتري على مينا .. ده بقى غير مقبول .. و اظن كفاية كده كلام على لسان حد .. اتفقنا؟
و تقبل مودتي

أولا يا جماعة
إن الله ..... مولانا جميعا ( كل البشر ) خلقنا جميعا و يرزقنا جميعا
و ترك لنا الله أختيار الدين -- لا إكراه في الدين --
فإذا أعطانا الله هذه الحرية ...... لماذا نسلبها أنفسنا بأنفسنا ؟؟؟
و على فكرة أنا لا أتفق مع رأي الأستاذ أحمد جمال فكما قال أخي الريس فيه تعميم غير مقبول
لأني و الله كان لي أصدقاء مسيحيين كثيرون أيام الجامعة و كنا زي السمن على العسل ( على رأي المثل )
المسيحيون أحرار فيما يعبدون ......... هل سنحاسبهم يوم القيامة ؟ ..... بالطبع لا
فنحن أيضا محاسبون .......... و ممن ؟؟؟؟ كلنا محاسبون من الله عز و جل
اذن فليعبد المسيحيون ما يشأؤن و هم أحرار في ذلك كما نحن أحرار في أن نعبد الله و نتدين بدين الإسلام الذي يؤمن بكل الأنبياء و منهم النبي العظيم عيسى عليه السلام
و أهلا بكل المصريين على صفحات ذلك المنتدى الذي يجمع المصريين جميعا ....... كما يجمعنا وطن واحد

و أطالب الأستاذ ميزا أن لا يذهب بعيدا و أن لا يدخل في حوارات جانبية مع أحد ........ و أرجوا أن نحترم بعضنا البعض .....لأننا في النهاية ندخل على هذا المنتدى لتلقي معلومات عن السيارات أساسا و شكرا

أظن بعد كلام الريس و tutankhamon أرجو إنهاء الحوار فى هذا الموضوع لأن أى حوار لن يفيد فى شئ بل سيزيد المشاكل فى المنتدى

فإذا أردتم أن ينعم منتدانا بالهدوء و المحبة بين أعضاءه و التركيز على هدفه الأساسى و هو عالم السيارات أرجو قبول دعوتى بإنهاء الحوار فى هذها الموضوع

و أخيرا أكرر دعوتى للأخ مينا و Meza لحضور المقابلة الشهرية القادمة حتى يتعرفوا على أعضاء المنتدى أكثر

جالى 14 Sms تهنئة بالعيد، منها 6 من أصدقاء مسيحيين و 4 من ال 6 ماشفتهمش من أكتر من سنتين و المكالمة الوحيدة اللى جاتلى من برة العيلة كانت من أخويا رامى من بلجيكا و قعد يرغى مع ليليا اللى ما بتقلش غير (دغا دغا) حوالى 10 دقائق و معايا تلت ساعة و على فكرة هوه لما بيبقى محتاج يفضفض و (يبكى) من الغربة ما بيكلمش حد غيرى.

بس خلاص


الأخوة الأفاضل...
برجاء تقبل غلق الموضوع بعد أن عرض الجميع وجهات نظرهم بحيث لا يوجد مجال جديد لجدال أكثر فى هذا الموضوع وللجميع الشكر...
مشرف المنتدى