الموضوع: Proton Test Drive Event...وانطباعي عن الجين 2..

باسم الله الرحمن الرحيم...

إزيكم يا رجالة, عاملين ايه, كله تمام ؟

أنا انهارده رحت ال Test Drive Event اللي عاملاه Proton, وبصراحة الجو كان سيء جدا, ومطرت علينا شوية للأسف.

ماعلينا, كان فيه عدد من الناس لا بأس به, بتاع 40 واحد كده كتوتل منهم أستاذ محسن صالح المحترم, و بعض الاعضاء التانيين من التوكيل (معرفش اساميهم بصراحة).

المهم أنا قعدت اتكلمت مع أستاذ محسن صالح شوية, وأحلى حاجة في وسط الكلام جه واحد صورنا وقام أستاذ محسن قال لي أصل الصور ده هتروح ماليزيا... يعني ماتتخضوش لو لقيتوني في مجلة ولا على سايت, ههههههههههه.

المهم, قعدت فضلت اصور فيديو شوية بالموبيل, قعدتلي بتاع ساعة كده أو أكتر عبال ماجه دوري (كان فيه عربيتين من كل فئة بس ماكانش فيه غير نمرتين تجاريتين بس وعاملين يبدلو النمر )

أخيرا, جه دوري, بعد ما الانسة اللي بتنظم قالتلي أنا حاسة فعلا إنك قعدت كتير, المهم, جت العربية, وكان اللي بيركب مع الناس واحد اسمه "وائل حسين" وده هارجعله بعدين.

المهم ركبت العربية, واحنا كانوا زنقنا كلنا في حتة صغيرة كده والعربية كانت ركنا بضهرها فال مهم كان المفروض أرجع ل ورا عشان أطلع.

جت أحاول أجيب مارشدير معرفتش بصراحة الفتيس كان ضيق قوي مقارنة باللانوس, وأنا مكنتش متعود. المهم بقول للراجل هو مش عايز ييجي ليه, قال لي برخامة كده: لأ هو بييجي بس إنت تلاقيك مافطرتش.. (لذيذ قوي). المهم جبنا reverse وجاي ابوص ورا مش شايف حاجة خالص بصراحة, الظَهر ال left back ده مش مخليني عارف أشوف حاجة والمرايات مش متعود عليها, بس الحمد لله عرفت أطلع.

طلعنا بقى على الطريق (ال test drive كان قصير اويي. يادوبك تلف من قدام ملف كارفور وتلف تاني من الملف اللي بعديه... المهم طلعت وابتديت أمشي, العربية ما شاء الله استجابتها هايلة وتسارع ممتاز قوي, وكنت حاسس إني بجري وحاسس بالأمان على عكس لما بجري باللانوس على 100 كيلو أو أكتر بأحس إن شوية هوا بيلعبوني.

وصلت ل أول u-turn ولسة بلِف وطالع أجري شوية لقيته بيقولي خد بالك هنلف من الملف الجاي ده.

رحت لفيت من الملف اللي بعده وطالع أجري برده..مش عارف فيه ايه, غصب عني واللهِ. لقيته بيقولي خد بالك عشان هندخل يمين بقى. دخلت يمين ركنت, وفعلا خلص التست.

نييجي بقى للانطباعات:

1- العربية صوت متورها وإنت جوه وقافل الازاز مش علي خاااااااااالص!!! أنا مش عارف الناس اللي بتقول صوت المتر علي حسستني إني هاركب نص نقل ليه. أنا كنت بنقل على 4 rpm تقريبا وكان صوت المتر عادي جدا, اللانوس عندي صوتها أعلى بكتير في أي حالة من الحالات على فكرة. سواء أول ماتدور, أو وانتا ماشي. ده أنا لما دورت الجين وانا قافل الازاز واللهِ ماحسيت, صوت هادي جدا في الأول.

2- صوت الموتور وإنت سمعه من بره عالي سِنة صغيرة.

3- وانا بجري عالطريق وبنقل, كنت حاسس بصوت rpm عالي سنة مابين النقلات, يا ترى ده طبيعي ولا أنا اللي مش متعود على قصر الدبرياج والنقلات القريبة ؟

3- المرايات يمين شمال في النص بنسبالي كانوا صعبين إلى حد ما, وانا بارجع ل ورا فعلا كنت حاسس إني محتاج حد يوجهني. يا ترى ده طبيعي ؟

4- العربية ما شاء الله نعمة قوي في السحب وتحس إنها عايزة تجري.

نيجي بقى للاخ "وائل حسين" ده, الراجل بصراحة لو مكنتش حابب العربية والناس اللي هنا فالقسم, كنت سبت العربية ومشيت. الراجل حسيته قرفان مني من قبل مانبدأ. في الأول بيقولي إنت معاك رخصة ؟ سؤال بصراحة عاصبني, يعني تفتكر لو ماكانش معايا كنت جيت, أو كانوا سمحولي أملا الفورم فالاول ؟ لأ و طول الطريق بحاول أتكلم معاه عن العربية وهو مبيردش. بصراحة يكره الواحد في العربية ويخليه عايز يسيبها ويمشي. أنا حاولت أكلم أستاذ محسن صالح عليه بعد مارجعت بس بصراحة مالقيتوش ساعتها فقمت ماشي. بصراحة الراجل ده كان أسوأ مافي ال يوم. يمكن أسوأ من الجو.

قابلت الأستاذ مدحت سكيك هناك على فكرة, وقال لي إنه كان بيعمل صيانة ال 20 ألف ولقى ال event فـجه يعمل test drive لل Saga.


بصراحة أحسن حاجة حصلت انهارده هي الحبة الصغيرة اللي سقت فيها الجين 2 والتعرف عالعضو المحترم أستاذ مدحت سكيك.

وده فيديو للتست أخويا كان صوره:

http://www.youtube.com/watch?v=naE7Fs4jKjA

تحياتي.

ازيكم يا شباب عاملين ايه؟؟
أنا زميلتكم نورين (نور ده اسم الدلع)
البنت الوحيدة اللي كانت في التست درايف النهاردة بعد ما زميلي هيثم jisso82 حجزلي فيه علشان أجرب الجين2
وأنا اللي موِت الشخص اللي اسمه وائل حسين ده من الرعب والخوف باللي عملته فيه النهارده
بالنسبة ليك يا Raul_7 متزعلش منه
هو فعلا راجل غلس جدا وانا وهيثم كنا رحناله زمان في الأول علشان نسأل علي الجين وأنا فاكرة اننا أول ما خرجنا قلت لهيثم انه يبان (سوري في اللفظ) فتوة مش مندوب مبيعات خالص!
المهم أنا انتقمتلك منه النهاردة شر انتقام لما طلعت بالجين المانيوال حتة طلعة كانت هتخليه يموت في الكرسي اللي جنبي
والناس كمان كلها اتخضت ورجعت لورا
بس والله الحمد لله علي ده، لانه بجد خلاني أقتنع الجين بنسبة مليوووون في المية مع اني كنت مقتنعة بيها 100% أصلا
أنا متخيلتش ان دواسة البنزين بجد شعرة أوي كده يا دوب باللمس بتبقي العربية والله عايزة تنط وتجري ومحدش يحصلها!!
والمشكلة ان عربيتي الحالية موديل قديم وأهه باين من بياناتها ومن صورتها
فلما بدوس بنزين بدوس جامد وانا اتعودت علي الدوسة دي، بس لما جيت عملتها النهاردة مع الجين متخيلتش الاستجابة الرهيييبة دي وبجد العربية ماشاء الله فوق الوهمية
بس أنا مبسوطة بس في اللي اسمه وائل وياريت كنت دخلت بيه في أي صخرة علشان غلاسته دي
يلا ولا تزعل يا Raul

وبجد فعلا انا اتعلمت ان الواحد لازم يجرب الأول وبعدين يحكم علي الحاجة، العربية اللي كتير بيقولوا عليها ناشفة ووحشة والدركسيون تقيل والله محستش بأي حاجة من دول النهاردة في اللفة السريعة اللي عملناها، بالعكس حسيت الدركسيون مية تحت ايدي والعربية مش بالخشونة دي يعني، عارفة طبعا انه ده فرق تكنولوجيا السنين بين موديل حديث وموديل قديم أوي زي عربيتي وده اللي بيخليني أقول وأؤكد يا جماعة جربوا الأول وبعدين احكموا، مش الناس اللي تيجي تقول سماعي كده مش اكتر العربية ناشفة والعربية الدركسيون بتاعها مش عارف ايه!
بس علي فكرة مراية الصالون بالصدفة كانت مضبوطة أوي بالنسبة لي وشفت منها كويس جدا الطريق ورايا ومجال الرؤية كان واضح وسهل وبجد ظهر العربية مضايقنيش في حاجة

وبجد بالرغم من الجو السيئ النهاردة بس كان Event جميل وظريف واتشرفت فيه بمعرفة مهاب وأ. أحمد ابراهيم وأ. مدحت سكيك وأ. محسن صالح ده غير كمان زملاء لينا من منتدي سيارات تاني
وعصير الفراولة كان بجد وهمي
وادعولي بقي انشاء الله أنضم لنادي بروتون قريب (بس من غير طلعات هجومية انتحارية تاني)

تحياتي