المشاركة الأصلية كتبت بواسطة A. Ibrahim
السلام عليكم
اليوم كان ال test drive للساجا . طبعا زي ما انت شفتوا اليوم كان الجو صعب و لكن اليوم عدي
رحت علي الساعه 12 تقريبا ايمن كان عندع امتحان و مأدرش يجي و حل كويس فب الامتحان. ركنت عند المدخل و دخلت العرض كان في الجراج اللي امام الستروين و كان مقبول لهو جامد و لا ضعف .
انا كنت هناك على الساعة 1 كدة وضح إن كان فيه ناس كتير من المنتدى خسارة ياريتنا كنا إتعرفنا ببعض
معلش ياباش بقى إسمحلي أرخم عليك وأحط تعليقي على العربية جوه التعليق بتاعك :Y_hi_3[1]: علشان انا حاسس إني لو عملت موضوع جديد هنسى حاجات وإنت التقرير بتاعك مرتب وشامل فاقولت احط ملاحظاتي على كل نقطة في مكانها
وإن كنت هاختلف معاك في أي حاجة فا ده طبعا يرجع لكل واحد متعود على إيه وبيبص للعربية إزاي والخلاف في الرأي لايفسد للساجا قضية:8_8_13:
قبلت أ\محسن و مهاب و هيثم و أ \ نادين . الصحافه كانت موجوده الاهرام و الاخبار و motor TV التجربه كانت لكل مودلات البروتون واجا ساجا و الجين 2 و البرسونا و كل العربيات كان في منها المنول و الاوتوماتك.
سجلت اسمي في الساجا الاوتو لاني عاوز اجبها لمراتي. و تقيمي و فيه بعض الصور كلاتي
سعر العربيه بالنسبه للامكانيات مناسب جدا و منافس في السوق لدرجه كبيره. يعني بالنسبه للاوتو ارخص عربيه اوتو هي البيكانتو و الi10 و طبعا استحاله ادفع 72 الف في عربيه من غير شنطه و موتمر 1100
كلام سليم وبصراحة السعر ده كويس جداً حتى بالنسبة للمانيوال 64000 وهي مساوية تقريباً لعربيات ب 74000
الامكانيات و المواصفات:
الموتور 1300 CamproIAFM و ده بيولد 94 حصان تقريبا و عزم 120 نيوتن الموتور اقتصادي و ينفع لجوه البلد . الموتور ده نفسه موجود في الجين2 الاوتو و ديه بتنزل في انجلتري .
اما الفتيس الاوتو هو بتاع الجين 2.
مش عارف موضوع الفتيس ده هوة بتاع الجين ولا لأ بصراحة بس أعتقد صعب يكون هوه نفسه واللي أعرفه إن ميتسوبيشي هي اللي عامله الفيتيس الأوتو.
السرعه القصوه من 155 الي 160 و لكن اعتقادي بعد التجربه ان الموتور سهل انه يدفع العربيه لاكتر من كده. لان الاداء بتاع الموتور عالي و العربيه رشيقه في الوزن. 1050 Kg
تظام التعليق و نظام التوجيه من احد عناصر القوه و التميز و ده لان لوتس كان ليها لمسه قويه .
و لل ميعرفش لوتس هي شركه سيارات رياضيه انجليزيه و تتميز بتصميم احسن و اجود انظمت التوجيه و التعليق احسن من البورش نفسها . و لك ان تطلق خيالك في مدي كفائة التوجيه و استجابه للساجا و ده تميز اكتر عن زميلاتها من اللوجان و اللانوس و الفيرنا و البيكانتو والاي 10 . و ده له تاثير علي نظام التعليق و هو ناشف بعض الشيء و لكن مريح و غير متعب.
الكلام ده ينطبق على الجين والبرسونا والواجا بس لكن الساجا لأ مش (Lotus Ride & Handling)
الامكانيات تكمن في
-بور جيد
(الدركسيون تقيل شوية) بس معقول بردة يتلف بإيد واحدة والعربية واقفة بس مش بصباع ولا
إتنين
-زجاج كهريه امامي
في ناس ممكن تتدايق من إن الخلفي مش كهرباء بس أنا مش فارقة معايا قوي
-سنتر لوك بالريموت
(الريموت في المفتاح مش ريموت منفصل) دي حاجة كويسة طبعا
-كاسيت CD MP3+ اربع سماعات (سيستم محترم)
الكاسيت ويف بس مش إم بي ثري ودي أكتر حاجة إستفزتني بصراحة لأن انا لو جبتها هارمي الكاسيت اللي فيها لأن محدش هيرضى يشتريه حتى ببلاش وأشتري CD MP3
-مرايات كهربه
(المرايات كويسة ومجال الرؤية فيها واسع)
-شبوره امامي و خلفي.
(الشبورة الخلفي اللي مش عاجبني مكانة بصراحة) لأنه في الإكصدام سهل جداً يتكسر
-اماكن كتيره للتخزين داخل العربيه .
مقدرش أقول كتيرلأن درج التابلوه صغير جداً والجيوب اللي في الأبواب ديقة جداً
-مساحة الشنطه 415 لتر و الاحسن هو ان شكل الشنطه يسهل تخزين احجام الكبيره ولايوجد تهدير داخل المساحه
-جنوط اسبور
14"
-ضبط ارتفاع كرسي السائق.
-حساسات رجوع
-Air bag للسائق
اما عن التجربة فكان هناك عربيتين واحدة مانيوال و واحدة اوتوماتيك اختارت الاوتوماتيك .
أنا جربت الأتنين الأوتو السوداء الأول وبعدين المانيوال الحمراء والجين المانيوال كمان :M_yes[1]::Y_hi_3[1]::36_7_7[1]:
اولا انطباعي عن العربية من بره الشكل جيد الفوانيس الامامية و الخلفية واضحة جدا الشبكة الامامية و شبكة الاكصدام بتتدي انطباع رياضي للعربية بالنسبة للصاج فهو مش بسمك الجين 2 و لكن هو عادي التقفيل الخارجي للعربية مناسب جدا و لا يوجد فراغات او تعويجات واضحة حتي مع التدقيق
تمام والله بس العربية الحمراء كانت الشبكة الأمامية من فوق (يعني الجزء اللي بيكون تحت شفة الكبوت) الدهان فيها مكانش مزبوط كانت زي متكون مبقعة كدة حتت فيها بوية كتير وحتت البوية فيها خفيفة بس هي مش باينة ومش أي حد ياخد بالة منها والجزء ده رفيع جداً أصلا يدوب عرضه يجي 2 سم بطول الشبكة ومش هيبان إلا لو الكبوت مفتوح أو حد بص بين شفة الكبوت والشبكة.
من احد المميزات التي تلفت النظر عند فتح باب السيارة الامامي او الخلفي تجد سهولة في الدخول و الخروج من و الي السيارة و ده نتيجة ان الباب بيفتح 90 درجة و السقف ارتفاعه كويس.
100%
اما بالنسبة لارتفاع السيارة فهو مناسب جدا للظروف المصرية و لا يقل عن من 15 الي 17 سم و يمكن اكتر و طبعا مع نظام التعليق الجيد فدي ميزة تانية للعربية
الإرتفاع كويس جداً فعلاً والعربية على الطريق ماسكة نفسها مش بلوظه
داخل العربية الخامات بوجه عام جيدة و انا اديها تقدير جيدة جدا بالنسبة لعربية بالسعر ده من تابلوه و بابان و كراسي بالنسبة لتصميم التابلوه وجهة نظري الشخصية انه جميل و مرتب و سهل
هو فعلا كويس وعملي هو اه بلاستيك بس ده حال كل العربيات اللي أقل من 100,000 بس بصراحة هو نضيف يعني مش تحس إنه معمول له إعادة تدوير زي العربيات الصيني وعملي جداً يعني ولا هيتشقق ولايتقشر وفي تنظيفة 100% فوطة بميه وصابون وإديها يامعلم :C_laugh[1]:
و زي ما قلنا اماكن التخزين هايلة و كتير و مختلفة الاحجام و الاشكال
بردة انا مش موافق على دي :U_thin1[1]:
القاعدة في الكرسي الامامي جيدة من حيث مكان الرؤية و التمكن من كل الحاجات اللي جوه العربية حتي بالنسبة للكنبة الخلفية مع الاخذ في الاعتبار اني طويل187 سم و لكن القعدة اللي ورا مريحة جدا ان كان في طول الرجلان او الراس
مزبوط جداً العربية مش ديقة خالص وانا طولي 183 يعني الطوال شهدولها كدة :vctry:
المرايات تعتبر ممتازة بالنسبة طبعا للجين 2 و مجال الرؤية واضح جدا في التلت مرايات
معلش المرايا اللي في النص الروئيه فيها مش 100% يعني علشان الشنطه عالية بس عموما كل العربيات بقت كدة وربنا يخلي الباركينج سينسور هيعوض ضعف الروئية الخلفية لما نيجي نركن
العدادات سهلة و مريحة و ليها طابع رياضي شوية و طبعا نفس لون الجين 2 البرتقالي هي و الكاسيت
ايوه ومؤشر البنزين والحرارة ظراف ولذاذ جداً هما ديجيتال مش مؤشر عاملين شرطات زي علامة البطارية والشبكة بتوع المويايل كدة فكرتهم جديدة وحلوة
بس طبعا مافيهاش كمبيوتر رحلات هو عداد كيلو متر وعداد رحلات بس
والأر بي إم ومؤشر السرعة شكلهم رياضي
اول مادورت العربية المارش سلس و سهل و الصوت هادي.
تمام
مارشدار و رجعت لورا مجال الرؤية من الشباك الخلفي جامد جدا
مش جدا يعني :unhappy:
و بدأ يظهر اول عيب دواسة البنزين صغيرة و علي الجنب اوي و الكونسول من تحت عريض فمخليها ضيقة شوية
انا بصراحة ماحسيتش إن مكانها وحش انا اللي حسيت بيه إنها كانت خفيفة زيادة عن اللزوم يعني زي ماكون مش دايس على حاجة خالص وده خلاني مش قادر أحكم على تسارع العربية وإستجابتها لدوسة البنزين وطبعا كل شوية كيك داون مانا بدوس جامد وانا مش حاسس :B4_556: وخصوصا كمان إن الشوية اللي بنمشيهم بالعربية حتة صغيرة جداً جداً جداً جداً للصبح يعني كلها على بعضها متجيش كيلو متر فالواحد مش هيلحق يتعود على أي حاجة بصراحة ده كان أكبر عيب في الموضوع كله بطلع أمشي حوالي 300 متر وألاقي الملف اللي قبل بوبة الكارتة يقولك لف من هنا تلف يقول هنلف بئه من الملف اللي جاي ونرجع وطبعا الملف اللي جاي ده على بعد أقل من كيلو متر تيجي تزود بقى علشان تلحق حتى تعدي ال100كم علشان تشوف أخبار السرعة إيه يقولك ماتزودش عن 80 أو 90 علشان فيه هنا رادار طب ياجدعان إنتو جايبنا بقى علشان تحنسونا؟!!!
طبعا انا تقريباً زي ماركبت زي مانزلت ماحستش بأي حاجة مالحقتش ياجدعاااااااان
وكان نفسي أشغل التكييف علشان أعرف تأثيره على الموتور في المشي بس طبعا خفت الراجل يضربني :stink[1]:
حركة الفيتيس سهلة و ناعمة وهو اوتوماتيك مع اول انطلاقة و الخروج علي الطريق فوجئت من الموتور استحالة ان هو يكون 1300 الاداء بتاعه عالي جدا و سلس و انطلاقه في رشاقة و قوة ملحوظة و اللي بيديله ده ان 94 حصان و خفة وزن العربية الكيك دون بيحول العربية من عربية اقتصادية صغيرة الي عربية سبق من حيث القوة و الاداء و الصوت انا وصلت بيها لغاية 90 كم و الاداء كان هايل بالنسبة للموتور و الاستجابة لدواسة البنزين سريعة حتي الاستجابة مع الفيتيس جيدة
انا وصلت 110 علشان كدة الراجل نظر لي شزرا وقالي الجملة الشهيرة اللي لسا قايلها فوق معلش ياباشا ماتزودش عن 80 أو 90 علشان الرادار (مش فاهم رادار إيه ده اللي محطوط بين الملف ده والملف التاني!!!!)
بس الفيتيس نقلاته خصوصا الكيك داون بتاعة كنت حاسس إنه بطي شوية يعني كان الأر بي إم بيرفع والسحب زي ماهو وبعدين الغيار بنزل وتبتدي تحس بالسحب بعد بتاع ثانية وكام فيمتو كدة ولا حاجة (انا أصلا مش بحب الأوتوماتيك)
العفشة علي الرغم من ان الكاوتش بتاع العربية كان منفوخ بزيادة و لكن العفشة كانت جيدة و ادائها كويس من حيث النعومة هي مش ناعمة قوي و لكنها مقبولة و مريحة
هو الكاوتش الأمامي كان مهوي شوية بصراحة وانا قلت يمكن علشان كدة الدركسيون كان تقيل شوية بس فيه ناس كانت قايلة إن الباور بتاعها تقيل شوية (بالنسبالي معقول لأن عربيتي أصلا مش باور :M_yes[1]:) وبالنسبة للعفشة بصراحة الجزء ده من الطريق كويس جداً وقصير جدا جدا فا مش هقدر أحكم على العفشة وعموما أي عربية زيرو حتى لو أوحش عفشة في الدنيا في الحتة الصغيرة دي محدش هايحس إن العفشة وحشة
نظام التوجيه في استجابة عالية جدا و في المناورة و دخول المنحنيات اما عن الغرز فخد ت واحدة كده في السريع و تقديري انها حتبقي جامدة و متماسكة حتي لو الغرز جامدة و ده شئ كان متوقع من بروتون
فرامل العربية استجابتها حلوة و فيها قوة و زي الجين 2 فيها جزء فراغ في الاول و لكن بطريقة مقبولة
اه موضوع الفرامل ده اللي مش فاهمة لأنها معجبتنيش بصراحة ممكن التيل يكون عايز يطبع لسة ولا إيه هي المشكلة إن الناس جايبة عربيات زيرو لسة ملينتش وتخلي الناس تعمل عليها تست درايف مع إن المفروض إن لما أعمل تست درايف لحد علشان أخليه يقتنع بالعربية ويشتريها لازم العربية تكون في أحسن حالاتها
وطبعا كلنا عارفين إن أول 1000كم العربية مش بتكون في أحسن حالاتها سواء من السحب وإستجابة الموتور أو قوة الفرامل
بس واضح والله اعلم إنهم معندهمش إستعداد يضحو بالعربيات اللي إتعمل بيها تست درايف وهايبيعوها بردة زيرو مش مشكلة العداد عامل 40 ولا 50 كم الزبون مش هيعترض!
نيجي بقه للمانيوال
طبعا زي ماقلت إني ملحقتش أكون أي فكرة علشان الماسافة الصغيرة جدا وكمان أنا أصلا مش ناوي على أوتوماتيك وكنت أصلا عايز أجرب المانيوال بس انا لما لقيت العربية اوتو قلت بلاش أبقى رزل وأجربها وخلاص وانا كنت قايلهم من الأول إني عايز أجرب الساجا والبرسونا فلما نزلت من العربية رحت كان فيه واحدة تاني واقفة غير اللي بيتعمل بيها التست قولت اتفرج عليها بقى شوية وقعد فيها تاني علشان انا مالحقتش فتحت العربية وركب وكانت المفاجئة
العربية مانيوال ياجدعااااان قولت ماهو فيه مانيوال أهوه ياريت كنت جربت دي :stink[1]:
بس هو كان في معاهم نمرتين بس تجارية لاحظت إنهم بيركبوهم علي عربيتين والناس تسوق بيهم ولو حد عايز عربية غير اللي عليهم النمر كانو بيركنو واحدة من اللي عليهم النمر وياخدو النمر يحطوها على العربية التانيه وهكذا
المهم انا فضلت بقه اتفرج على العربية فتفوتة فتفوتة وأفتح الكبوت واتفرج على الموتور وكدة يعني لقي واحد بينده عليا غير اللي طلع معايا بيقلي إتضل ياباشا علشان تجرب ولقيه بيشاورلي على نفس الساجا اللي انا سقتها فقلتله طب معلش هو ممكن أجرب المانيوال ؟ لو ممكن يعني لكن لو صعب خلاص مش مشكلة!
بصراحة الراجل كان زوق جداً وقالي طبعا ممكن ثواني بس هخليهم يركبولك النمر على المانيوال وفعلا ركن العربية وخلاهم يبدلو النمر بس هو مش عارف كان حريص شوية وركب هو العربية وطلعها من الركنة وبعدين نزل وقالي إتفضل ياباشا وركب جنبي
ركبت وزعلت لأن العربية كانت دايرة علشان كنت عايز انا اللي أدورها بس ماشي خليها علينا :C_laugh[1]:
دوست دبرياج الدبرياج بصراحة خفيف وزي الفل بس مشواااااره طوييل حبتين
جبت الأول - الفيتيس ظريف مافيهوش أي مشكلة
إطلع يامعلم - العربية مش بتتطلع!
طب سيب دبرياج شويه كمان
لسة مش بتتطلع!!
طب كمان شوية
يا فرج الله أخيراً إتحركت؟!
طبعا الكلام ده كلة بيني وبين نفسي :C_laugh[1]:
الدبرياج عالي جداً فوق الهرم
بس دي حاجة بسيطة يعني ممكن تتزبط
بس قابلتني نفس المشكلة بتاعة موضوع دواسة البنزين الي عاملة زي البلوظة دي مش مخلياني عارف انا دايس قد إيه من الدواسة
مش عارف هي فعلا خفيفة قوي كدة فعلاً ولا انا اللي واخد على الأوروبي (انا معايا فورد فيستا) ماعلينا!
المهم الإنطباع طبعا هو هو لأن مافيش فرق إلا الفيتيس والدبرياج وزي ماقلت الفيتيس كويس والدبرياج ناعم
في المجمل انا شايف ان هي صفقة رابحة جدا من صفقات بروتون امكانيات عالية موتور و ثبات هايل جدا مساحة داخلية و شنطة كبيرة بالنسبة للحجم الخارجي
انا معاك تماماً
اما عن العيوب فهي طبعا سعر اعادة البيع و توافر قطع الغيار و اسعارها و اامل ان في المستقبل الموضوع ده يتحسن
إن شاء الله هيتحسن أن العربية دي انا حاسس إنها هتنتشر بسبب سعرها
العربية مناسبة للفئات (شباب اسري سيدات كبار السن)
مزبوط