حادثة سخيفة بالفانتازيا .. بس الحمد لله
حاجة في منتهي السخافة وتحرق الدم .. الحمد للهة واحد ابن حلال رامي كيس في ركش ودبش على الطريق الدائري بين كلية الشرطة ومدخل التجمع الاول .. المهم الحمد في ملف والدنيا كانت كحل .. لبست فيه بين العجلتين .. نتيجة الحادثة : (شوية شروخ في الاكصطدام ، فوانيس الشابورة لمضها اتكسرت وخرجت بره مكانها ، الخوصة اللي ماسكة سربنتينة التكيف اتعوجت ودخلت في السربنتينة بتاعت التكييف وخرمتها ، والتصفيح اللي تحت حصل فية عوجة ، والشبكة اللي بين فوانيس الشبورة اختفت يعني اتكسرت ومعدش ليها اثر) .
الحمد لله طبعا اني محولتش اخدها تحت العجل الا كنت رحت في ابو نكلة انا والعيال ..
والحمد لله ان قاعدة الفتيس والكرتيرة محصلهمش حاجة والحمد لله برضة على الاكس والمقصات والشاسية متضربوش .. يعني قضي اخف من قضي .. والحمد لله انها جت على اد كدة.
المهم .. بالعلاج تم على مرحلتين اولا اصلاح الاكصطدام وشد الخوصة والتصفيحة اللي تحت العربية وتركيب الفوانيس ولحام الكلبسات الخاصة بها والقصة دي اتكلفت بتاع 750 جنية تقريبا.
المرحلة التانية بدات اسال على قطع الغيار اللي محتاجها (الشبكة واللمبات بتاعت الفوانيس والسربنتينة بتاعت التكييف) .. وهنا العذاب بدأ
اولا كلمت فتحي الباب : ناس محترمة وبترد على اي استفسار وبيقلك السعر في التليفون .. بس للاسف الفانتازيا لسة مجبلوهاش قطع غيار .. سالت طيب المفروض ان سربنتينة الفانتازيا ذي الاي فايف قلولي لا مختلفة وبتاعت الاي فايف متوفرة بتمن 850 جنية.
وبعدين سالت في التوكيل كل حاجة موجودة الحمد لله .. سالت على الاسعار الراجل بكل احترام قلي : السربنتية 1350 جنية قلتلة طب ذي الاي فايف قلي هي هي (خلي بالك دا كلام التوكيل ومعرفش هما معندهمش بتاعت الفانتازيا وبيسكتوني وخلاص وعايزين يبيعوا بتاعت الاي فايف ولا هي فعلا كدة)
سالت على الشبكة قلي 250 جنية (بس الاسعار دي هيتحط عليها 10 % ضريبة ومعرفش 15 % بتاعت اية غير المصنعية والتركيب واعادت الشحن للتكييف ) يعني السربنتينة في الاخر هتقف بي 2000 جنية
اتصلت بنور الدين في اسكندرية قالي السربنتينة من غير اي حاجة 1750 جنية (لاحظ الفرق الكبير في الاسعار)
اتصلت بوهدان .. ناس محترمة الراجل حسبلي كل حاجة بالمليم وهو هو تقريبا نفس اسعار التوكيل
اخيرا بقي قلت اتصل بالاقصي وهو جمب البيت .. الراجل شوية شوية كان هيسالني عندك كام عيل واية اكلتك المفضلة .. اولا هو رفض يديني سعر اي قطعت غيار وبعدين يقلي هتلي السريال كامل بتاع العربية بقلة يا سيدي دي فانتازيا .. هي كيمياء يقلي لا معلش اصلي عندي كذا شبكة اقلة الفانتازيا كلها شبكة واحدة يقلي لا عندنا مختلفة في كل موديل .. اقلة طب السربنتينة يقلي معلش لا مقدرش اقلك كدة (قلتلك انا عايز اعرف علشان مجيش على الفاضي اركبها عندكم الحاجة دي موجودة ولا لا) قال اة ان شاء الله موجودة بس انت تعالى .. المهم زهقت منهم وقرفت منهم وجبت اخرى لامهم مبيرعووش حتى ان الواحد المفروض انه في مصيبه والدنيا ميش ناقصة لوع .. وحلفت ميت يمين اني مرحش الاقصي دة ولو حتى بيعمل الصيانة ببلاش
طولت عليكم .. المهم انا لسة في انتظار صديق محترم هيرد عليا وادعولي بقي ربنا يسهلها ان شاء الله ويخلف علينا افضل مما فقدنا .. الحمد لله.