الموضوع: سؤال عن سواقة الستات

المشاركة الأصلية كتبت بواسطة windsofchange

معاك بس اغلبنا اضر من سواقتهم ولازم اللي يعلمهم يتقي الله في ارواح الناس وعربياتها ويعلمهم السواقة صح مش الفرق بين الدبرياج والفرامل واقلب.....واحد معانا في المنتدي فانوسين ورا فولكس شيروكو اتكسروا بسبب واحدة سايقة لادا ريحت عليه مش مرة لأ مرتين وبتقولوا بوظتللي عربيتي.....الشباب للأسف حوادثهم مدمرة

+1

لو كل واحد عرف ان الى سايقه ممكن تكون امه او اخته او مراته او بنته كان فكر الف مرة قبل مايخليها تسوق وكان علمها السواقة صح ولو لقى انها بتخاف و تتلخم يبقى متنفعش تسوق و الموضوع ينتهى
انما الموضوع ماشى ان البنت كبرت ودخلت الكلية يبقى نجيب لها عربية مكافآة بغض النظر عن ان قلبها جامد وتستحمل الزحمة والتعامل مع العربيات الاخرى ولا هتتلخم وتخاف

وسواقة الستات مفهاش مشكلة من الناحية الفنية يعنى فى ستات بتسوق كويس جدا جدا جدا احسن من رجالة كتير انما المشكلة فى الخوف واللخمة وسرعة التصرف

انما من الناحية السياسية لو صدرت اوامرعسكرية عليا بشراء سيارة للمدام هيكون ايه العمل

المشاركة الأصلية كتبت بواسطة Islam_galal

من حق كل حد يسوق و لكن في حدود الحفاظ علي الآخرين

لما يكون أكثر من 70% من الستات اللي بقابلهم بيسوقوا يوميا بالحالة دي:

- واحدة بتسوق و هي متعرفش تسوق لأن كله بالكوسة
- واحدة تسوق و لما تعمل مصيبة تهلل و لا تعيط و طبعا حيضيع الحق لأننا مجتمع شرقي
- واحدة تسوق و مش فارق معاها لأن في بني آدم تاني بيدفع التصليح
- واحدة تسوق و تأكل العيال و تتكلم في التليفون و تأكل نفسها كمان كأنها قاعدة في بيتها

يا سيدي إحنا أمام ظاهرة و هي اللامبلاة من الجنس اللطيف بالإضافة لنسبة لا يستهان بها منهم لم يتعلم القيادة من الأساس

أقسم بالله بقيت باعرف أن قائدة السيارة التي أمامي سيدة من نوعية القيادة فقط و بقيت أتحدي زوجتي في ذلك لدرجة انها هي نفسها اتعقدت من قيادة الستات

دي أرواح ناس و حقوق و ممتلكات أشخاص ، لازم يبقي فيه وقفة

أنا رأيي يتعمل مرور للسيدات كل العاملين به سيدات منها للمحافظة عليهم و منها تلافي جزء كبير من المجاملات
يا راجل ده حتي المخالفات ، الظابط تلاقيه بيحن و يطنش لما الأنسة تتكلم معاه بلطف شوية و تمشي تتكلم في التليفون قدامه

المشاركة الأصلية كتبت بواسطة mohamed_momi88

في فرق بين سواقه هاديه و سواقه مضرةةةة

السواقه الهاديه جميله بس في وقتها و يكون الشخص عارف قواعدها يعني في شارع مثلا علي الاقل 3 او 4 حارات و الواحد ياخد اليمين و ياخد حارة واحدة بس مش يمشي في النص و بعد كدة يمشي براحته

لكن مش شارع زحمه و حارة واحدة و الواحد يمشي يدلع و فعلا نسبة كبيرة من اللي بيعملوا كدة سيدات و برضة مفيش شك ان في سيدات محترفين و بيسوقوا حلو

و برضة بصراحه في رجاله كتير لما بيشوفوا واحد بتسوق بيقعدوا يطلوا القطط الفطسانه في سواقتهم و يشتموا عمال علي بطال و تلاقيه تحوا فجأة لمايكل شوماخر اللي عايز يطير في الشارع و الست معطلاه

و الله كتير ببقي راكب مع زمايلي و تلاقيه ماشي سلحفاة ببقي نفسي ادوسله علي البنزين علشان يمشي و يشوف واحد ست قدامه يركبه 100 عفريت و يقعد يكلكس و عايز يعدي باي وسيله

كنت راكب مع واحدة زميلتي في الشغل قبل كدة و هو بتسوق ماشاء الله كويس جداااااااااا و بتمشي في حارتها و بسرعه يعني سواقه مثاليه و طول الطريق عماله تتشتم و الله صعبت عليا يعني واحد يكسر عليها و هي في طريقها و هي متعديهوش و تكمل يقوم شاتم مكروباص يجي يمين فجأة و يقف و يقوم شاتم مش عارف ليه انا طبعا حرمت اركب معاها تاني من كتير الشتيمه

فياريت السيدات اللي مش متعلمه سواقه كويس تتعلم الاول كويس و الرجال اللي بيشتموا عمال علي بطال لانها سيدة يحترموا نفسعهم لانها فعلا ممكن تبقي اخته او امه او بنته اللي بتسوق

المشاركة الأصلية كتبت بواسطة Sameh

معلش هو مش موضوع سواقة هادية ، هو موضوع سواقة تجيب حوادث وتخلى الناس يخبطوها ، ماينفعش أسوق فى عرض الشارع على 40 وانا على طريق كله ماشى 80 على الأقل ، ده يساوى نفس خطورة واحد بيجرى أو أكتر شوية ، وماينفعش يبقا الإشارة قدامى ب 500 متر واضرب فرامل فى مكانى تخلى اللى ورايا يلبس فيا ، ولا ينفع امشى فى نص الطريق بين حارتين عشان مش شايفة حدود العربية واللى وراها يولع ، وغير ده كتير

+ 11111111111
هوه ده الكلام اللى فى نفسيتى من زمان ..