إلى كل اللوجانية بوجه خاص، وكل مالكي السيارات بوجه عام:
يا جماعة أنا الحمد لله عملت حادثة من يومين، والحمد لله ربنا قدر ولطف وعندي شوية تلفيات في مقدمة السيارة، منها الفانونس والإكصدام وعلامة الرينو.
المهم روحت عملت المقايسة في التوكيل وقالي إن المصنعية بس هتدخلها في 3200 (طبعا ده قبل ما مندوب شركة التأمين يفاصل معاهم). والمشكلة بقى إني فوجئت بشركة التأمين بتقولي إني لازم أتكفل ب 15% من التكلفة الإجمالية لو هصحلها في التوكيل، و5% لو بره التوكيل. أنا الحقيقة ما عطتش خوانة وقولت خلاص، الحمد لله...أهو أحسن ما كنت أدفع المبلغ كله لو مش مأمن.
المهم جيه في مخي أبص هنا على المنتدى وأشوف لو حد كاتب عن موضوع زي ده، فدخلت إمبارح ولقيت إن فيه نسبة فعلا بس الناس بتقول إنها 10% بس في مصر للتأمين.
فقومت النهاردة اتصلت بالهيئة العامة للرقابة على التأمين ( اللي بقت جزء من الهيئة العامة للرقابة المالية) وسألتهم، وكانت المفاجأة.....:
الناس كانوا غاية في الاحترام وقالولي الهيئة فرضت نسبة 10% لو جوه التوكيل، ولو بره التوكيل مافيش أي نسبة تحمل على المشترك. وسألوني موديل العربية كام، فقولت 2010...قالولي يبقى زي ما قولنالك لأن لو بقالها سنين النسبة دي بتزيد.
فكلمت التأمين وسألتهم النسبة كام تاني، راح برده قالي 15%، قولتله يا عم اللي اعرفه انها 10% بس، قالي بص هي حوالي 12 أو 13، قولتله انا لسه مكلم الهيئة وقالولي هما فرضوا 10% بس، فاشرحلي جت منين النسبة الزيادة...قالي والله المعلومة دي جديدة عليا ولسه عارفها منك، ولو كده يبقى أوك 10%.
بالله عليكم ده كلام يرضي ربنا؟؟!!!!!
الخلاصة: نسبة التحمل الإلزامية للمؤمن له لحوادث السيارات الجديدة عند إصلاحها في التوكيل هي 10% فقط من إجمالي الفاتورة النهائية. ولو الشركة زمزأت معاك كلم الهيئة على الرقم ده:
19053
02-25798315