رايكم ايه في اللانسر دي؟ موديل 2008
[justify]السلام عليكم ورحمة الله وبركاته
معروض علي عربية لانسر بالمواصفات التاليه
- موديل 2008
- 1600 سي سي
- ماشية 37000 كم
- هاف سبورت
- خليجي
- تامين شامل
- تكملة اقساط للبنك بواقع 2500 جنيه شهريا لمدة 36 شهر باقي
صاحب العربية عاوز 15 الف ليه وانا اكمل الاقساط
لسه ما كشفتش عليها بس شفتها من بره على السريع وسقتها شوية بسيطه على الدائري
لقيت فيها مبدئيا شوية حاجات بسيطه من خلال نظرتي الخارجية :-
- راشش بره بس (هو اللي قاللي) وش نظافه فقط ؟؟؟!!!!
- الاكصيدام الخلفي ناقص كليبسات ومفارق شويه وكان في حد مريح عليه بعربيته
- الفوانيس الاماميه مشبرة من جوه وزجاجهم مش نظيف من الداخل
- المرايه الشمال مكسورة ومركب بدالها قطعة مرايه زجاجيه تصنيع يدوي
- ذراع النور العالي لما احب اعمل رعاش يفتح النور العالي وعلشان اعمل رعاش لازم ايدي تكون حساسه جدا لدرجة اني اتخنقت منه لاني مش قادر اخفف ايدي علشان ما يفتحش مني وكل ما اجي ارعش للي قدامي افتح النور العالي مش عارف ده عيب في العربية ولا ده عادي في اللانسر كله؟ وهل لو كان عيب يتصلح عادي ولا بيبقى مشكله؟
- كرسي السائق لما قعدت علشان اسوق حسيت اني عاوز احط تحتي مخدتين علشان اعرف اشوف الطريق بدل مانا شايف الدركسيون بس (مع العلم اني مش قصير انا طولي 170 سم والله) بس حسيت ان الكرسي مفطوس لتحت مش عارف ليه ولما سالته قاللي ان في بكرة بتعلي الكرسي لفوق بس ما عرفتش استعملها لاني كنت طلعت بالعربيه - فهل البكرة دي بتعلي الكرسي بدرجه ملحوظه ولا الكرسي عاوز تنجيد؟طيب والتنجيد ممكن يدخله في كام؟ وبيرجع زي الاول ولا لا؟
- في صوت صفاره بسيط مع الفرامل ولما سالته قاللي انها مركونه ويمكن شوية تراب
- الدركسيون فيه فرق ناحية الشمال يعني مش معدول والعربيه ماشيه علطول ولما سالته ليه كده قاللي انه كان بيعمل شغل في العفشه والميكانيكي ماظبطش وهو بيركب العفشه
- وبعد مانزلت من العربية وانا باسلم على الراجل لاحظت حاجه في الكبوت خوفتني جدا وقلت اعرفها لما اجي اكشف في اي بنزينه
لقيت الكبوت كانه مفتوح يعني كاني شديت ذراع الكبوت بس لسه مارفعتوش (فاهميني؟)
قلت يمكن هو نسي وفتح الكبوت بس ماقفلوش كويس
قمت ضاغط على الكبوت بايدي علشان يتقفل بس للاسف اكتشفت ان هي دي قفلته بس الفرق بين الكبوت والفوانيس فرق كبير وواضح
يبقى ايه الاحتمالات؟ تكون واخده خبطه من قدام مثلا؟
طيب اللي انا عاوزه من حضراتكم بقه تفيدوني في الكلام اللي قلته ده كله يطمن ولا لا؟
ولو عاوز اكشف عليها عند حد محترم واخد كلامه ثقه تنصحوني اروح فين؟هل في بنزينه كويسه ولا التوكيل احسن ولا ايه ؟
ولو الكشف عليها طمني ونويت اشتريها - هل شوية اللعب اللي حكيتلكم عليهم دول فيهم مشاكل ولا اقدر اصلحهم و بكام تقريبا
وايه رايكم في سعر العربية بالطريقه اللي قلتهالكم غاليه ولا كويسه؟
وفي حالة ان الاقساط حتفضل باسمه في البنك ايه الاوراق والعقود والتوكيلات اللي بتتعمل بيني وبينه علشان اضمن حقي في العربيه لانها بكده حتفضل باسمه لحد ما نخلص الاقساط علشان مايجيش بعد مانخلص الاقساط يقوللي مش بايع
ياريت ما اكونش دوشتكم باسئلتي بس ياريت تردوا علي بالتفصيل الممل
وشكرا مقدما لكل من سيقرا او يرد على موضوعي
[/justify]
