ايه رايكم في مرسي مطروح؟؟؟

**ash257** · 03-02-2010 01:42 PM

أنا بعشق مطروح
خصوصا اني اول مرة اروحها رحت قضيت فيها شهر العسل
وبعدها رحت 4 مرات بمعدل مرة كل سنة

**ahmedsamir79** · 03-02-2010 02:00 PM

انا روحت مطروح حوالي 10 مرات
الوصف الصح ليها انها جنة علس شاطئ البحر

**Islam_galal** · 03-02-2010 02:19 PM

مطروح جميلة جدا لكن دلوقتي فاضية جدا و الجو برد
لو غاوي في فندق سعره معقول علي البحر اسمه نيوليدو سعره حيبقي معقول و علي البحر مباشرة (الشقة دلوقتي ممكن في حدود 180جم في اليوم ، حجرتين و صالة بمستوي جيد جدا)و في منطقة حية نسبيا

ممكن حضرتك تكمل و تروح سيوه ، فهيه تعتبر مشتي مناسب

**mohamed_kta** · 03-02-2010 04:59 PM

نصيحتى لحضرتك حاول تسكن قريب من ش الاسكندرية ده افضل مكان فيه خدمات فى الشتاء و إنشاء الله هتقضى اجازه جميلة و سيبك من اللى بيقول متروحش فى الشتاء .

**Ralliart** · 03-02-2010 05:25 PM

انا رحت مطروح كتييير
من الآخر لو عايز جو هادي جداً واسعار رخيصه نسبياً يبقى مطروح هي الاختيار الأمثل
بس لو عايز جو الكافيهات والزيطه واللمه يبقى ابعد عنها
وبالنسبه لنقاء المياه وكده فمياه البحر الاحمر وبالذات الغردقه احسن وانقى مليون مره وبالنسبه للشتاء فانا شايف برضو ان الغردقه هتكون احسن لانها مشتى أساساً واهدى من شرم الشيخ مع اختلاف الأسعار طبعاً

**m2die4** · 03-02-2010 06:15 PM

بجد رد الاستاذ mohamed.mostafa مفيد جداً جداً و فى حاجه بسيطه جداً بالنسبه للتقال , عندهم الالتزام بالسرعه القانونيه اجبارى و كانت 60 تقريباً , انا رحتها الصيف ده و اكتر من صديق حذرنى من النقطه دى , الله اعلم ده كان علشان الصيف و لا هما كده على طول , و اول ما رجعت القاهره قرأتها فى جريده الاهرام , عديت منها دى بس انا لفيت عكسى من قدام المدريه D: بس مكنتش اعرف انها عكسى

**mynameh** · 03-02-2010 06:25 PM

كنت هرد عليك لاني روحتها " من اجمل ما رأت عيني"

لكن بعد اللي كتبة استاذ محمد مصطفي
حبتها اكتر و و صفها وصف دقيق

**m.aligamal** · 03-02-2010 08:16 PM

يا جماعه انا رحت مطروح اكتر من 7 مرات تقريبا حقيقى جميله جدا جدا جدا ولو قعدت لبكره اقول فيها جدا مش هنخلص وليا فيها ذكريات لا توصف مع الاصدقاء و الاهل و الاحباب يعنى مصيف رائع طبعا فيها مزارات زى عجيبه و الابيض و كيلوبترا و روميل و اندلسيه
بالنسبه للشواطى مفيش بعد البوسيت و الغرام
شاطىء الابيض للناس الى بتعرف تعوم صح لان موجه عالى جدا و سحبه شديد
كورنيش مطروح الى حد كبير نسخه من اسكندريه
الخروج بليل بيكون عالكفيهات الى عالبحر او التسوق من شارع اسكندريه او السينما او سوق لبيا
اهل مطروح من اطيب اهل مصرو صراحه ناس كريمه و معرف عنها كده بالذات العرب
الاكل هناك مش قد كده حتى محلات كنتاكى ولا تكا ولا ماك الاسعار غاليه و مش زى الفروع الاخرى بالمحافظات بس فى محلات اكل عربى يعنى طبليه و تقعد الارض و بعدين يجيلك الشاى بتاعهم الاخضر و الاحمر حاجه جميله
الزتون و زيت الزيتون ملوش حل وكمان البهارات حلوه
ويعيبها برضه السكن غالى فيها طبعا عشان احنا فى معظم الاحوال بنكون شباب فمكنش يفرق معانا المكان قوى عالبحر ولا جوه البلد بس مقارنه باسكندريه اسعار الشقق فى اسكندريه افضل بكتير
عيبها بس المشوار الطويل و المرهق يعنى انا من المنصوره كنت بركب القطار المكيف من طنطا الساعه 8 ونص ونوصل فى حدود 2 بعد الضهر
بس من الاخر شواطىء جميله و مزارات روعه و انصح اى حد بيها