رجاااااااااااااء من مالكى النوبيرا

**soltan** · 20-12-2007 10:52 PM

انا استلمت نوبيرا 2008 يوم السبت قبل العيد مباشره والحمد لله . ولما العربيه دارت وانا لسه بستلمها سمعت صوت تكتكه عالى فى الماكينه . فتحنا الكبوت صوت غريب جدا . كأن فى حاجه بتخبط او ( بتلق ) جوه الماكينه _ كأن فيه حديد بيخبط فى بعضه جوه _. سألت ايه ده ؟ قالوا اصل العربيه ما مشيت خالص وبتيجى متحمله على تريلات والعربيه عامله 18 كم بس واصبر عشر دقايق لما العربيه تسخن والزيت يطلع اصله لسه متجمع تحت .. صبرنا العشر دقايق مافيش فايده زى ماهو .. لكن لما داسوا بنزين شويه الصوت هدا شويه لكن مارحش .. قالولى الصوت ده طبيعى وهيفضل معاك لحد ما تخلص ال 1000 كيلو .. سألتهم هى العربيه مش بتكون متلينه فى المصنع قالوا ايوه . والصوت ده طبيعى . لكن انا مش حاسس ان الصوت ده طبيعى ابدا ..
دلوقت انا عملت 400 كم والصوت زى ما هو وللاسف فتحت الكبوت لكن مش قادر احدد هو منين .. فياريت يكون حد كده فهم من شرحى .. دلوقت الصوت ده انا خايف منه جدا ومش حاسس انه طبيعى لانى عمرى ما سمعت عربيه جديده مطلعاه ابدا ..
دلوق حد يقدر يقولى الصوت ده احتملاته ايه ؟؟ وممكن يكون ايه ؟ وهل كلامهم صح ولا لأ ؟
معلش فيه حاجه كمان .. الماكينه عاليه . ال Rpm دايما على 1 ما بينزلش ابدا ابدا .. فهل ده طبيعى كمان ؟؟
كمان العربيه فيها حدفه يمين مع صوت حاجه بتحف فى الجنب اليمين ..
ياريت حد يفهمنى انا اخدت مقلب ولا ايه ؟
واعمل ايه ؟

**bassam nagy** · 20-12-2007 11:18 PM

الف الف مبروك
تقريبا الصوت دة صوت التاكيهات جوة الموتور والفروض بيهدى لما العربية بتسخن .. هل بصيت على مستوى الزيت جوة الموتور؟ اتاكد برضوا
rbm عادى على 1 وكل حاجة هاتظبط فى صيانة الف ان شاء اللة

**ahmedsrs** · 20-12-2007 11:41 PM

ممكن تبعت لنا الصوت ده
بس
1- هل الصوت ده من السيور
2- هل السيور مشدودة كويس
3- صوت شبيه لصوت صغاره متقتعة او قطعتين حديد بيخبطو فى بعض
4- دوس على السير بصباعك والعربية مبطلة

مفروض مايدخلش لجوة اكتر من سنتى متر واحد مهما كانت قوه الضغط بصباعك

لو بيدخل اكتر من كدة يبقى السير محتاج شد

لو السير مش محتج شد جرب تمشى حتة صابونة او Wd40 او شحم على السير

لو الصوت منع يبقى معنى كدة ان السير خامته مش كويسة ومحتاج يتغير

لو الصوت ماراحش بيقى ممكن يكون فيه مشكلة فى بلى الدينامو او بلى طلمبة المياه

وده مقتبس عن سبعاوى باشا
5- نوع البنزين المستعمل

**memoo305** · 21-12-2007 09:07 AM

إتأكد االأول من مستوى زيت الموتور. لو كان مظبوط يبقى ممكن يوجد كستبان أو إثنين معلقين(الدايو لايوجد بها تكيهات ولكن يوجد كستبنات.) .فصوت التكتكة بيبان لما تكون العربية باردة وبهدى شوية لما العبية تسخن .روح التوكيل وخليهم بغيروها(لأنها مش يتتظبط)

**soltan** · 21-12-2007 07:37 PM

متشكر جدا لكل اللى ردوا عليا ... وكل سنه وانتم طيبين ..
بالنسبه للاستاذ memoo305 ممكن يشرح لى ايه هى الكستبانات ؟وهل يوجد خطوره لو مشيت بالعربيه كده ؟
وهل اروح التوكيل دلوقت ولا فى صيانه 1000 ؟؟

**pampino** · 22-12-2007 11:09 AM

الف مبروك وربنا يبارك ليك فيها بالنسبة لى Rpm لازم يكون تحت ال 1 بشرطة دة وضعة الطبيعى

**soltan** · 22-12-2007 07:09 PM

ايه يا جماعه كل سنه وانتم طيبين ..
مافيش حد عاوز يرد عليا ليه ويشاركنى فى مشكلتى ؟
بصراحه ماكنتش متوقع كده من المنتدى خالص !!

**ahmedezzat78** · 23-12-2007 12:06 AM

مشكله حضرتك لا يمكن الحكم عليها الا من المعاينه
لكن اكيد ده مش طبيعى ومش مفروض يروح لوحده ولا حاجه

بلاش تلعب فيها بره التوكيل وروحلهم دلوقتى ما تستناش صيانه الالف ولو قالولك استنى الالف اعملهم هوليله

**dr_3eshoo** · 23-12-2007 01:20 AM

لو العربيه جديده بتهيقلي رجعها و ارميها في وشهم لان العربيه دي مشاكلها كتير
و صدقني كانت معايا و لما بعتها صليت صلاه شكر لانها ورتني ايام طين
كمان مكنش لازم تستلم العربيه دي منهم دي جديده و على الزيرو وبتعمل كده طب و بعدين
ارجع للوكيل و شوف ايه المشكله و لو عرفت ترجعها رجعها و هات بتمنها اي عربيه تانيه ان شاله لانوس
صدقني انت اخدت مقلب و عن تجربه
طبعا الف مبروك بس دي نصيحه
كمان ال ار بي ام يكون اقل من 1 بسنه
رجع العربيه دي انت الكسبان

**soltan** · 24-12-2007 12:27 AM

شكرا جزيلا لكل الاخوه اللى تجاوبوا معايا ..
وشكر خاص للاستاذ ahmedezzat78 على نصيحته بإنى اروحلهم بدرى .. انا كلمتهم فى ابورواش وقالولى ماتستناش لصيانه ال 1000 ... هات العربيه دلوقت ..
ادعو لى ان المشكله تكون حاجه بسيطه .. وتتحل بسهوله .. لان الواحد زعلان ومش حاسس انه اشترى عربيه والله ..
وياريت حد يوصف لى ابو رواش ده فين بالظبط .. ويكون وصف تفصيلى معلش .. اصلى انا من الدقهليه ...
وشكرا ليكم